السبت، 4 أبريل، 2009

دور وزاره الداخليه حفظ النظام و ليس حفظ النظام



انحصر دور وزاره الداخليه المصريه فى حفظ النظام الرسمى نظام مبارك و ليس النظام العام ليس حفظ الامن و الامان فقد امتلئت السجون المصريه بالعديد و العديد من المصريين و للاسف ليس المصريين الخارجون عن القانون لم تمتلىء السجون المصريه بالبلطجيه و الحراميه و قطاع الطريق او تجار المخدرات او القتله او المجرمون او سارقوا المال العام و الهاربين به

و لكن امتلئت السجون المصريه باصحاب الرأى و الفكر و الكلمه و العقيده
امتلئت السجون المصريه بخيرت الشاطر و ايمن نور و غيرهم و سواء اتفقت معهم او اختلفت ليس مكان هؤلاء السجون

هناك العديد من الادله على تقصير الداخليه فى حفظ الامن و الامان
اولا / زماااان كنا نسمع ان اللى بيتعاطى مخدرات بيعهملها فى الخفا دلقتى على عينك يا تاجر فى الشوارع و الميادين العامه ووصل الحد لساقى التاكسيات و الميكروباصات و هما سايقين ادام الناس علنى كده و ده كلام انا شوفته بعينى و اتحاسب عليه

ثانيا / عمليات الاختصاب و السرقه العلنى و ليس موضوع حادث القطار ببعيد الموضوع
على اللينك ده اضغط هنا
ثالثا / عمليات الخطف العشوائى للاطفال و الدليل اول امبارح كان فى طفله ماشيه مع جدتها امام قسم اول مدينه المحله الكبرى و تم خطف الطفله وسط زهول و صراخ من الجده و لا حياة لمن تنادى
و من اسبوع تم خطف طفل و طالبوا ب ميه الف جنيه فديه من والد الطفل و الكلام موجود و موثق

طبعا دى مجرد امثله من مجموعه امثله عديده مخيفه و مرعبه

و للاسف كل دول احرار طلقاء بينما السجون تمتلىء بالشرافاء


الخميس، 12 مارس، 2009

هل حقا القضاء المصرى نزيه ؟

دائما اسمع مقوله لا تعقيب على احكام القضاء
فعلا لا تعقيب على احكام القضاء لكن فى حاله واحده فقط و هى عندما يكون القضاء نزيه

عندما لا يكون القضاء تابع لوزاره حكوميه مثل وزاره العدل

الملاحظ منذو الفتره الماضيه و بكل ثقه هو تخبط من احكام القضاء و يبدو تدخل السلطه فيها بوضوح

و الادله اهه
اولا تم تقديم مجموعه من الاخوان للمحاكم العسكريه و تم محاكمتهم فى نفس يوم محاكمه هانى سرور

و طبعا اخذ سرور براءه و تم حبس الاخوان ده اكبر دليل على تحكم النظام فى القضاء و ان الاحكام مسيسه ( محدش يفهم انى بدافع عن الاخوان انا كنت بدافع زماااان )

كمان من فتره تم محاكمه ممدوح اسماعيل و اخذ براءه لانه قتل من الف مصرى و الغريب ان القاضى كان بيدافع عن الحكم و بيقدم ادله باقناع الناس و الراى العام
و بعد تدخل النائب العام تمت المحاكمه من جديد و اخذ سبع سنين و الغريب برضو ان القاضى كان بيدافع عن الحكم
و بعد تدخل النائب العام تمت المحاكمه من جديد و اخذ فيها براءه و برضو القاضى كان يبيدافع عن الحكم
و برضو لا تعقيب على احكام القضاء
بالذمه دى مش حاجه تزعل ؟





الخميس، 19 فبراير، 2009

الاخوان لا يهمهم الا الاخوان

اولا انهم يدعون اهتمامهم بالشعب و يسعون لتحقيق رفاهيته و سعادته

طبعا الكلام ده غلط و الدليل السنه اللى فاتت لما الشعب كان بيعانى من غلو الاسعار
و الكل دعا لاضراب شامل و جميع القوى الوطنيه استجابت للدعوه الا الاخوان بحجه انه لا يوجد اجنده و لا يوجد برنامج للاضراب و لا غيره

و السبب زى ما كلكم عارفين ان وقتها كان فى محاكمات عسكريه لقاده الاخوان امثال الشاطر و غيرهم و طبعا الاخوان ارادوا عمل صفقه مع الحكومه و يقولوا مش هنضرب و انتم طلعوهم براءه بس للاسف الحكومه برضو عملوا اللى هما عوزينه

بعد كده الاخوان اعلنوا مشاركتهم فى اضراب 4 مايو و برضو مكنش فى لا اجنده و لا غيره اللى اختلف بس انتهاء المحاكمات العسكريه

ثانيا انهم يدعون دفاعهم عن الاسلام و الاراضى الاسلاميه
و ظهر ده واضح اوى فى الحمله اللى تبناها الاخوان ضد مصر فى حرب غزه الاخيره (تصفيه حسابات ).
و بيقولوا انهم عملوا كده لان غزه مسلمه و اراضى اسلاميه و الارض الاسلاميه وقف للمسلمين كلهم و يجب ان يدافعوا عن غزه و غيره من الكلام

نيجى نشوف نفس الاراضى الاسلاميه و نفس المسلمين مهانين فى العراق و السودان و الصومال و افغانستان
المسلمين فى العراق كان الامريكان بيغتصبوا رجالهم و نسائهم و اطفالهم و على عينك يا تاجر
و بالرغم من ده مشوفانش من الاخوان ربع اللى عملوه على شان غزه ليه بقى ؟
لان حماس تبع الاخوان
لكن بالنسبه للعراق و افغانستان و السودان و الصومال اكتفوا بشويه مظاهرات الحزب الحاكم عمل مظاهرات افضل من مظاهراتهم

و فوق ده و ده بقى كل اللى بيختلف معاهم
يبقى مش مسلم و كافر و خرج عن المله و خاين و عميل و لا يستحق ان يكون مسلم
و التعليقات فى المواضيع السابقه اكبر شاهد على كلامى


ياااااااااه يا جماعه كنت من المحبين لهم و المدافعين عنهم و لكنكم اثبتوا لى انكم لا تهتهمون الا بمصالحكم الشخصيه لا غير
الحمد لله انكشفت لى الحقيقه
ربنا يرزقنا بجماعه فعلا تهتم بالمسلمين و ليس جكاعه ساعيه للسلطه و الحكم

الجمعة، 13 فبراير، 2009

الاضرابات فى مصر هتودينا لفين ؟

منذو فتره و السمه الاساسيه فى مصر هى الاضرابات

بدأت الاضرابات فى مدينه المحله الكبرى عندما تجمع حوالى 27 الف عامل للمطالبه بحقوقهم

و نجحوا فى لوى ذراع الحكومه و الحمد لله اخذوا حقوقهم

بعد كده شوفنا اضرابات موظفو الضرائب العقاريه و اعتصامهم و الحمد لله برضو اخدوا حقوقهم من الحكومه

بعد كده اضرابات المحله تانى و اضراب 6 ابريل اللى العالم كله شفها

و بعد كده توالت الاضرابات بدرجه غريبه و كبيره جدا

لدرجه ان الاضرابات فى عام 2007 وصلوا الى 255 اضراب تقريبا

يعنى بمعدل تقريبا اربع اضرابات اسبوعيا

و استمر مسلسل الاضرابات

ووصل الى دمياط على شان شركه اجريوم

و برضو الدميطه لوى زراع الحكومه و انتصروا عليهم

و من الوقت ده و المصريين لو عوزين اى مطلب

مفيش غير سكه واحده بس هى الاضراب

و شوفنا اضراب السكه الحديد
و اضراب السواقين
و اضراب الاطباء
و اضراب المدرسين
حت التلاميذ فى المدارس الابتدائى اضربوا عندما نقلومهم لمدرسه تانيه

و بكره ان شاء الله الموافق السبت 14 / 2 و فى عيد الحب عندنا اضرابين
الاول / اضراب الصيادله
و اللى بيهددوا فيه باغلاق الصيدليات من غد و كل الصيادله اخدوا هدومهم و خيامهم للاضراب امام النقابه غدا ان شاء الله و عدم فتح اى صيدليه

و التانى / اضراب سواقين اللورى
و اللى بيهددوا فيه انهم يوقفوا العربيات اللورى فى الطريق السريع و قطع الطرق
يعنى شلل تام

و ان شاء الله الصيادله و السواقين برضو هيلوا زراع الحكومه و هيركعوا الحكومه

السؤال بقى
ليه كل الاضرابات دى ؟

المفروض اننا زى ما بيقولوا دوله مؤسسات
عندنا البرطمان سيد قراره
و اعضاء البرطمان اللى الشعب انتخبهم على شان يجيبوا لهم حقوقهم
و لو فى اى مطلب للشعب ينفذه البرطمان


كمان عندنا النقابات
و كل مهنه او حرفه لها نقابه الان
و فى نقيب بياخد فلوس اد كده على قلبه

بتعمل ايه النقابات دى ؟
المفروض ان كل مهنه عندها مطلب المفروض ان النقيب يجيب لهم حقوقهم

بدل ما يضربوا مباشره


ده كل دليل على ايه ؟

ده دليل على ان مجلس الشعب لابد من اعاده هيكلته
و حل النقابات دى

و لو ده مش جاب نتيجه يبقى اعاده هيكله كامله للنظام

و لو ده مش جاب نتيجه يبقى تغير النظام برمته من اكبر راس لاقل فراش

ملحوظه

طبعا عارف ان المحبطين هيقولوا صباح الخير يا عم مارو انت مش عايش فى مصر و لا ايه يا عم صلى على النبى و قول يا باسط
انا بقولهم بدل ما نكون سلبيين نشوف حلول و بلاش السلبيه
و ادينا بنفكر بصوت عالى مع بعض

الثلاثاء، 3 فبراير، 2009

بلاغ عاجل لوزير الداخليه ووزير المواصلات و الى كل واحد مهتم

اولا دى رساله اى كل واحد ارجو الاهتمام و نشرها على اد ما تستطيع

النهارده فى قطار السادسه و النصف من محطه المنصوره و المتجه الى مدينه طنطا حصل هذه الحادثه
كان فى سيده تبلغ من العمر ما يقرب من 30 عام راكبه هى و ابنتها القطار و زى اى واحده اتجهت لشباك التذاكر و اشترت التذكره و جلست بجوار الشباك اللى بجوار الباب و تحرك بنا القطار و مرت قريه بعد قريه و هى فى امان الله تلاعب طفلتها و اذ بنا نصل الى محطه ميت خلف فجاه نجد احد الشباب يقف على الرصيف و يقف بجوارها و هى طبعا فى امان الله لان مصر بلد الامن و الامان و مش واخده خوانه و عندما بدا القطار يتحرك اذ بهذا الشاب يخرج مطوه من جيبه و فجاه يضربها فى وشها

هذه السيده اخذها الذهول و مش عرفت تتكلم و لا تصرخ و لا تعمل اى حاجه الا بعد اما القطر كان اتحرك بالفعل فاقت من الصدمه و فضلت تصرخ
اتجهنا اليها وجدناها بتبكى و بتقول هو وشى فيه دم بنبص لاقينا وشها غرقان دم
بنسالها فى ايه ؟
قالت انا اللى عاوزه اعرف فى ايه ؟
هو عمل كده ليه ؟
انا عملت له ايه ؟
بيضربنى ليه ؟
طبعا و هى منهاره و كل شويه تسال عن وشها هل حدث له اى حاجه و احنا بنحاول نهدى فيها
و هى منهاره و عماله تبكى
دى صوره السيده بعد الضربه




دى بقى مجموعه صور للقطر تبين ازاى القطر مفهوش الاختراع اللى اسمه شباك
زمان كانت الشببابيك بتكون مكسره
يعنى كنت ممكن تلاقى حدود الشباك و معاه بواقى من الشباك
خشب مثلا ازاز مكسور اى حاجه ممكن تحمى من اى حاجه
الايام دى مفيش اصلا حاجه اسمها شباك
مفيش حدود للشباك
زى ما هتشوفوا
href="http://3.bp.blogspot.com/_H3h84mVWhPc/SYiGQPhkomI/AAAAAAAAAy0/VuFYK_LZkPU/s1600-h/4.jpg">



انا بعتذر عن ردائه الصوره لان فوق كل البلاوى دى القطر كمان مظلم

كل واحد فيكم اكيد مفكر ان القطر ده بتاع الغلابه زى ما بيتقال
متعرفوش انه اغلى من العربيات او المواصلات العاديه
يعنى مثلا على شان اركب ميكروباص من المنصوره لسمنود دى فى الميكروباص ب 75 قرش لكن فى القطر ب جنيه و نص من داخل القطر

المهم
كل واحد هيفكر ان دى حادثه فرديه عاديه عابره
محدش يعرف انها كل يوم بتتكر
على طول الخط من المنصوره لطنطا
و فى محطات معروفه كده زى مثلا قريه ميت خلف دى و ميت الكرما و صفط تراب و شبشير الحصه و غيرها كتير

و اكتر من مره حصل ادامى مواقف زى دى
و طبعا مكنتش بقدر اصور ولان القطر بيكون ظلاااااااااااام
و الناس بتروح تعمل بلاغات و بيرجعوا زى ما راحوا

و لو عاوزين تفاصيل موجوده عندى كتييييييير
اكتر من مره اعتداء على بنات و شباب بالضرب بالمطاوى و الامواس اى سرقه الموبايلات و غيرها
و الملفت للنظر ان العمده عارف العيال دى و عارف انهم بيطلعوا على المحطات اما يقلب الناس او يشربوا مخدارات او يسرقوا فى القطارات او يعملوا زى ما عملوا مع الست دى

تخيل لو الموقف ده لا قدر الله حصل معاك انت او مع اهلك او اختك او والدتك
هتسكت ؟

اتمنى ان كل واحد يبقى ايجابى و يحاول ينشر البوست ده
او ياخده عنده فى مدونته

و اخيرا شعار القطارات
كده كده هتموت لو مش بحادث يبقى اما محروقا ( فى حوادث القطارات المحروقه )
او مقتولا ( ممكن تاخد لك مطوه من حيث لا تدرى و لا تعلم )
او من البرد ( القطرات مفيهاش اصلا حاجه اسمها شبابيك )

يبقى اختار موتك بنفسك



......................................................................................

الاثنين، 26 يناير، 2009

اوكامبو بين باراك و البشير

اعلن المدعي العام لمحكمة الجنائية الدولية لويس مورينو أوكامبو انه لا يستطيع فعل اى شىء مع اسرائيل بعد ان توجه وزير العدل الفلسطينى الى محكمه الجنايات الدوليه بشان توقيف مسئولين اسرائيل و اتهامهم بارتكاب جرائم حرب اثناء العدوان الاسرائيلى على اهلنا فى غزه

فقد رفع وزير العدل الفلسطينى و معه كثير من المحامين العرب قضايا ضد الكيان الاسرائيل و اتهمامهم بالاتى
1/ استخدام الفلسطنيون كا دروع بشريه اثناء العدوان الاسرائيلى
2/ استخدام اسرائيل اسلحه محرمه دوليا ( الفسفور الابيض )
3/الاستخدام المفرط للقوه
4/ قصف مؤسسات تابعه للونوروا
5/ قصف المدنين و الاطفال و الشيوخ

قال اوكامبو انه لا يستطع فعل اى شىء مع دوله غير موقعه على محكمه الجنايات الدوليه

فى حين انه قد قدم مذكره توقيف بحق البشير فى شهر ديسمبر عام 2008 و قال ان البشير قام بارتكاب سبع جرائم حرب وجرائم ضد الإنسانية في إقليم دارفور الذي تمزقه الحرب. وتوقع أوكامبو أن يصدر قضاة المحكمة الجنائية الدولية حكما بشأن طلبه في أي وقت من شهر ديسمبر

و الغريب ان السودان ايضا غير موقعه على محكمه الجنايات الدوليه

اخيرا مش قادر اقول الا سبحان الله
ما البشير مش موقع و باراك مش موقع اشمعنى و اشمعنى ؟

خليكوا ساكتين يا عرب خليكوا ساكتين
خليكوا متفككين
افضلوا خونوا فى بعض
افضلوا كل واحد كل همه يبقى الزعيم
و محدش همه المصلحه العامه مطلقا
حسبى الله و نعم الوكيل

الجمعة، 16 يناير، 2009

قطر ! اللى بيته من ازاز ميحدفش الناس بالطوب

غريب اوى موقف اللى تدعى دوله قطر دى

غريب جدا جدا جدا


انها عامله نفسها حاميه حمى العرب و تدعوا لرمه عربيه بشان غزه

بالرغم انها

1/ فى اراضيها قاعدتين امريكيتين بهما اكبر مخزن للاسلحه

2/ تقوم بتصدير البترول لتل ابيب سنويا بحوالى 5 مليون طن سنويا

3 / قطر لديها مكتب للتمثيل التجارى و الدبلوماسى الاسرائيلى بالرغم انها لا تتفاوض مع اسرائيل مباشره مثل مصر

السؤال

ليه بقى قطر بدل ما هى بتدعوا لقمه عربيه و عمله نفسهم حاميه الحمى ليه مش بيوقفوا كل هذا
؟

ليه لا يطردوا القواعد الامريكيه
ليه مش بيمنعوا البترول
ليه مش بيقفلوا مكاتب التمثيل التجارى ؟

لييييييييييييييه مش بيخلوا قناه الجزيره تلم نفسها شويه

بدل ما الجزيره و لاد الكلاب بيعمولوا اللى بيعملوه ضد ستهم مصر

ملحوظه

خدوا الفضيحه دى ضد قناه الجزيره

فضيحة "الجزيرة"
فبركت تصريحات لأمين الاتحاد المغاربي
لم تحترم المشاهدين ولم تعتذر عن الخطأ
التتبع الفضائي .. سوف يكشف "اللعبة

الثلاثاء، 13 يناير، 2009

مبارك لا و الف لا لقرارك الغير منصف

خبر مفاجا
مصر ترفض المشاركه فى القمه العربيه التى دعت اليها قطر

و تقبل فقط بعقد قمه تشاوريه على هامش قمه الكويت الاقتصاديه

سيدى الرئيس

انا متفهم موقفك جدا و عارف انك رفضت لانك عارف انهم هيرجعوا زى ما راحوا و لا هيعملوا حاجه و لا محتاجه كل اللى هيقدروا يعملوه نندب و نشجب و نستنكير و ندين

فانت قررت اخذ موقف اكثر فاعليه و حاولت التركيز على اقناع الجميع بمباردتك ( الفاشله )
و بدل ما تضيع وقت فى الفسحه فى قطر فانت قررت التركيز على تفعيل المبارده

و لكن سيدى الرئيس

بالرغم من كل هذه المبررات التى اسوقها لنفسى
الا اننى معترض جدا على قرارك الغير منصف للشعب المصرى
كان ممكن اوى تعلن قبولك للقمه و انا متاكد ان كل اللى وافقوا متاكدين من فشلها
فلماذا لم تفعل هذا حتى لا تعطى فرصه للمتطاولين على مصر بالتمادى

سيدى الرئيس هكذا تعطى لهم الفرصه و الفرصه السانحه
و قد بدات بشايرها الان
فكل القنوات الفضائيه و على رئسهم الجزيره ماسكين فى رفض مصر وبمجرد الاشاره لرفض السعوديه

الجزيره تخصص لهذا الخبر اكثر من 10 دقائق متواصله
و التاكيد على عرض قطر عقد القمه

سيدى الرئيس
حرب غزه الكل بيحاول الاستفاده منها على قدر المستطاع ع حساب الاخوه الفلسطنين

الجزيره فرصتها لتشويه سمعه مصر
قطر عاوزه تبين انها صاحبه المباردرات و الساعيه للحل
ايران بتخلى حماس تجرب لها صواريخها و الانشغال العالمى عن برنامجها النووى
سورريا و حزب الله محاوله لانهاك اسرائيل عسكريا

انا اعلم انك على علم بكل هذا و لكن معذره قرارك غير منصف



لا أحد في الكون يقترب مني أو يجبرني على قول ما لا أؤمن به أنا رجل أحترم نفسي وكلمتي وأتعامل بمسؤولية عالية


عندما أطرح موضوعا، فأنا لا اطلب أن يتفق معي أحد، لكن أتوقع أن يحدث فكرا وعلما ومنطقا

الاثنين، 29 ديسمبر، 2008

حمااااااااااااااااس احييييييييييييييه عليكى و على اللى يتشددلكى

قريت خبر بيقول

عناصر حماس تقتل رائد على حدود غزه وتصيب جنديين

قولت الله اكبر
اكيد ده اسرائيلى
قالوا لاء ده مصرى

قولت يبقى اكيد ده يهودى ( مع انى متاكد ان مفيش يهود فى جيشنا )
قالوا لاء ده مسلم

قولت يبقى اكيد كان بيمنع فتح المعابر و بيمنع وصول المساعدات لغزه
قالوا لى لاء ده كان بيودى مساعدات هناك

قولت
احييييييييييييييييييييه
احييييييييييييييييه
احييييييييييييييه

احيه عليكى يا حماس
بدل ما تقتلوا المصريين
خلوا مدافعكم و ناركم ضداليهود

كملت الخبر و عرفت ان الباشوات بتوع حماس رافضين نقل المصابيين الى مصر
مع ان فى 35 عربيه اسعاف منتظره تحمل اى مصاب

مع انى اتمنى انها تمتلى بجثث عناصر حماس الجبناء
اللى ولا واحد منهم ظاهر لحد الان

اللى يشوف هنيه الاسدالمغوار وهو بيعلن انتهاء الهدنه
مش يشوفه حاليا وهو مستخبى بين الجحور زى الفران

اين انت يا اسد
يامغوار
يا صاحب الصواريخ البلاستيك
اللى مش بتجيب من وراها غير الويل للمسلمين ؟

ملحوظه
مش عاوز واحد غبى يفهم انى زعلان على الرائد المصرى
ومش زعلان على مئات الجثث و الجرحى

انا كلى اسى و اتعصر حزنا من مناظر الموتى
انا كلى اسف وحزن على ما يحدث للابرياء فى حين ان اللى يستحق مستخبى زى الفران

كل قطره دم من واحد غزاوى برىء بحياة اى عنصر من عناصر حماس

الله يرحمك يااحمد يا ياسين
الله يرحمك يا رنتيسى

ياللى كنتم بتقاوموا وانتم تحت النيران عمركم ما استخبيتم
الله يرحمكم ياللى كنتم جمعين شمل القضيه الفلسطينيه مش بتحاربوا فى بعض

للاسف ضاعت القضيه الفلسطينيه و اصبحت القضيه
الغزويه

بسبب حب السلطله لكل من ابو فصاد اللى اسمه ابومازن
و سى هنيه باشا اللى من يوم ما جه و القضيه ماتت

انا اعترض و بشده على كل من يقول ان حماس منظمه ارهابيه
بل هى منظمه غبيه
غبيه
غبيه
غبيه

السبت، 27 ديسمبر، 2008

اين انت يا سوريا ؟ اين انت يا ايران ؟ اين انت يا حزب الله

شاهدنا فى الايام القليله الماضيه تصاعد الهجمه الاعلاميه من قبل كل من سوريا و ايران ضد الحكومه العميله الجبانه الحكومه المصريه

بسبب تخليهم عن اخواننا فى غزه

و يريدوا هم و كل العرب من مصر التدخل فى فتح المعابر و التدخل لحل المشكله الغزويه و للاسف اقول الغزويه و لا اقول الفلسطينيه

انا اسالهم و اقول لهم اين انتم ؟

اين انتم فيما يحدث فى غزه حاليا ؟

ألن يعلن حزب الله امتلاكه لعدد كبير من الصواريخ القادره على الوصول لتل ابيب ؟

ألم تعلن ايران انها تمتلك صواريخ قادره على تدمير اسرائيل ؟

الم تضرب اسرائيل سوريا من فتره ليست بالبعيده ؟

اذن اين انتم ؟

بدل ما تطالبوا الحكومه الجبانه بالتدخل

تدخلوا انتم

فلا يوجد رجاء و لا امل من الحكومه المصريه

اذن افعلوا انتم

او ان تستكوا كما انتم ساكتون حاليا

فى البدايه قلت الهجمه الاعلاميه لانها فعلا هجمه لا يريدون من ورائها شىء

اذا كانوا يريدوا التدخل المصرى

اذن اقول لهم بيدى لا بيدى عمر

تدخلوا انتم يا عرب يا جرب يا جبناء يا عملاء

كلكم جبناء
كلكم عملاء
كلكم خونه


الثلاثاء، 2 ديسمبر، 2008

بيان بخصوص ما حدث و ما يحدث لميت

بخصوص ما يحدث لاخونا و زميلنا الاخ محمد عادل صاحب مدونه ميت

و انطلاقا باننا كلنا فى مركب واحد سواء اختلفنا مع بعض او اتفقنا

فبما اننا مصريين و مدونينين و يهمنا الصالح العام ضد الهمجيه الامنيه

التى لا تهدف سوا لتكميم الافواه و قصف الاقلام و كسر الايدى التى تكتب

و بما اننى عضو فى رابطه مدونى الدلتا


اعلن اولا باسمى محمد مارو و باسم الرابطه اننا متضامنون كامل التضامن مع الزميل محمد عادل

الى ان يفرج الله كربته

و رساله منى للامن

هكذا و دوما سنقف ضدكم مهما اعتقلتونا
مهم اخطتفتونا
مهما فعلتوا بنا
حتى لو فعلتم بنا ما فعلتموه بعماد الكبير او غيره
فلن نخاف و لن نرجع
الى ان نطهر وطننا من اى ظالم
سنقف ضد الدكتاتوريه و ضد التعذيب و ضد تكميم الافواه

و اذا كان محمد عادل خارج عن الامن قدموه للمحاكمه و حاكموه لكن لا تختطفوه او تعذبوه
فقد ولى زمن البلطجيه
و ها هو زمننا نحن

نحن معك يا ميت راجل واحد و كلنا ميتون الى ان نحيا بجد



الجمعة، 14 نوفمبر، 2008

عااااااااااوز حقى

من منطلق اهميه دور الاعلام و الفنون المختلفه

اخذت الحكومه المصريه من فيلم عايز حقى للفنان هانى رمزى المبادره

و اشاروا الى حق كل مواطن فى المال العام

المره دى تلعب الحكومه المصريه دور البطوله

تعالوا نعيد تقسيم الادوار

فى الفيلم كان البطل هانى رمزى
فى الواقع البطل و البطوله للحكومه المصريه

فى الفيلم كان الفنان العظيم عبد المنعم مدبولى هو الذى جعل هانى رمزى يفيق فى نهايه الفيلم
بعد مقوله بيع يا عواد بيع
فى الواقع ان شاء الله هتكون الدور للمجتمع المدنى و الصحافه و الاعلام

فى الفيلم كان اللى ميتسموش هما اللى بيسعوا لشراء البلد
فى الواقع هما برضو اللى عاوزين يشتروا البلد

فى الفيلم كان التمن مليون دولار قابله للزياده
فى الواقع كل مواطن 2000ج و يمكن تقل

فى نهايه الفيلم بعد كلام عبد المنعم مدبولى مع هانى رمزى فاق هانى رمزى و عرف قيمه البلد دى
يا ترى فى الواقع و بعد كلام الصحافه و الاعلام هتفيق الحكومه المصريه و تعرف قيمه البلد دى ؟

لا اعتقد ذلك
فما يديرها مجموعه من العملاء الذين لا يهمهم البلد فى شىء

و فى النهايه نقول
بيييييييييييييييييييييع يا عوااااااااااااااد

ملحوظه
فعلا شر البليه ما يضحك نقلا عن الصحف بيقولك مبارك بيتوسط ع شان الجندى الاسرائيلى جلعاد شاليط و ناسى الطبيين المجلودين فى السعوديه و بيقولك يا رتنى كنت فلبينى كنت هلاقى حكومه تحمينى و انا بقولك لو لم اكن مصريا لتمنيت ان اكون هنديا او فلبينيا حتى

الجمعة، 31 أكتوبر، 2008

يبقى انت اكيد فى مصر

مالى انا هى مصريه او اسرائيليه او حتى هنديه

اكيد كلنا تابعنا الفتره اللى فاتت موضوع اجدع بنت اللى تسببت فى حبس و سجن احد الشهوانيين لما حاول ان يلعب بمفاتنها

انا واحد من الناس و انا بسمع عن قصتها صقفت لها و اعجبت بموقفها جدا و اكيد كل واحد اعجب زى ما انا اعجبت بيها

الايام دى بقى الاقى الناس حالها اتغير بعد ما كانوا معجبين بيها الاقى الناس بتشتم فيها و قال ايه بيقولوا دى اسرائيليه

و بالرغم من كده مالنا احنا لو لو هنديه ايه المشكله

دى بنت جدعه و نالت اعجاب الكل و لو كانت اسرائيليه يبقى على بناتنا انها تتعلم منها و من موقفا

لكن بما اننا فى مصر يبقى لازم يحصل كده ............................................................................................................................
الازمه الماليه العالميه
اكيد برضو كلنا تابعنا و بنتابع موضوع انهيار الاقتصاد الامريكى و تداعياته على كل العالم

و اكيد برضو عرفنا ان بسبب الازمه دى اسعار برميل النفط اصبحت دون الستين دولار للبرميل

السنه الماضيه لما برميل البترول سعره ارتفع بجنون و قرب من الميه و خمسين دولار للبرميل

الاسعار اتجننت هى كمان و زادت فى لمح البصر الى ال الميه و خمسين % و بالرغم ان كتير من التجار كان عندهم مخزن بالاسعار القديمه
الا انه بمجرد الارتفاع ارتفعت كل الاسعار

و اليوم العالم فى كساد و الاسعار بتنزل و البترول بينزل حتى اوبك خفضت الانتاج على شان الكساد

ليه بقى اسعار المواد الغذائيه زى ما هى ؟
منزلش غير الحديد و الاسمنت
فين باقى المواد اللى ارتفعت بجنون
طالما حصل كده يبقى انت اكيد فى مصر التى لا تعرف معنى لانخفاض الاسعار
...........................................................................................................................................................


رزق الهبل على المجانين
معروف للكل ان عندنا فى مصر مفيش غير شركه اتصالات ارضيه واحده ( تليفون ثابت يعنى ) و هى المصريه للاتصالات و بالرغم من كده نلاقى الاعلانات لها مليه الشوارع و الجرايد و التلفزيونات
الله !
هى فلوس على الفاضى و الله ؟ انت بتعمل اعلان ليه هو فى غيرك فى مصر على شان تعمل اعلان ؟
و بالرغم من كده رئيس الهيئه بيقول انهم بيخسوا على شان كده زود تمن الاشتراكات و تمن المكالمه
نفس الكلام بالنسبه للحزب الوطنى هو فى غيرك فى مصر واكلها ولعه و لا ايه يا عم ده انت الحزب الوحيد بتعلن عن نفسك ليه ؟
يلا ما هو رزق الهبل على المجانين
يبقى انت اكييييييد فى مصر
........................................................................
المعلم و التلميذ
تانبعنا موقف المعلم الذى ادى لوفاة الطالب اسلام
و تابعنا ان الدنيا قامت و مش قعدت على المدرسين
طبعا انا لا اشجع مثل هذا التصرف او حتى لا اشجع ضرب التلاميذ و لكن سؤالى
لماذا تقوم الدنيا على المدرسين و ننسى ما يفعله الطلاب ؟
هل نسينا ما حدث للمدرسه من الطالب صدام ؟
هل نسينا ان طالب تسبب فى شلل لمدرسه ؟
هل نسينا ان الطلاب يضربون المدرسين بالسنج و المطاوى ؟
لماذا لا يكون هناك قانون رادع للطرفين يحمى حقوق الطرفين ؟
..............................................
لقطه و صوره














بالصور دى اعتقد انه يبقى انت اكيييييييييييييييد فى مصر

الجمعة، 3 أكتوبر، 2008

عديه السكه الحديد ! زياده اسعار التذاكر



فى اول ايام عيد الفطر المبارك الناس اتفأجأت بالعديه
لاقوا ورقه مكتوب عليها

تقرر توحيد الاجره لجميع المحطات 1ج حتى 29 كيلو متر

تعالوا بقى نشوف عواقب هذا القرار الجميل

زى ما احنا عارفين ان فى قرى كتيره مش فيها مواصلات او مواصلاتها صعبه زى قريه ميت الكرما اللى بتبعد عن المنصورة 2 كيلو متر

او قريه كفر العرب اللى بتبعد تقريبا 4.5 كيلو متر

و فى قريه ميت عساس بتبعد عن المنصورة حوالى 6 كيلو متر

التلت قرى دول فيهم كتير من الشباب اللى بيشتغلوا فى المنصورة

منهم الترزى و اللى واقف فى محل ملابس
او اللى بيشتغل ع عربيه تباع او او او

الشباب دول كل مرتبهم بيتراوح من 150 و 200 ج

ازاى بقى يا عم الوزير شاب بياخد 150 او 200ج و بين بيتهم و بين الشغل بالكتير 5 كيلو
و يدفع اتنين جنيه يوميا رايح و جاى ؟

فى حين ان من المحله الكبرى للمنصورة 27 كيلو متر و برضو التذكره ب جنيه
ازاى تساوى ده بده ؟

و فى حوار مع احد الشباب بعد رفع تمن التذكره اللى كانت ب 30 قرش ثم بقت ب 40 ثم 75 ثم جنيه

قالى انا بروح الشغل كل يوم من 11 الصبح ل 11 بالليل
يعنى بفطر و بتغدى و احيانا بتعشى فى الشغل

ازاى ادفع اتنين جنيه مواصلات و بيتى قريب من المنصوره ده غير الاكل و الشرب
قولت له طيب و الحل هتعمل ايه ؟
هتسيب الشغل ؟
قالى شغل ايه اللى اسيبه ؟
هو بالسهل انى الاقى شغل ؟
قولت له امال هتعمل ايه ؟
قالى طبعا مش هدفع

انا الاول كنت بدفع و بجيب التذكره لكن الان مش هدفع
قولت له يعنى هتعمل مشاكل مع الكمسرى كل يوم ؟
قالى لاء مش هعمل مشاكل بس انا لى طريقتى فى الزوغانى من الكمسرى انا و شباب كتييييير
قولت له ازاى ؟
قالى احنا بنشوف الكمسرى جاى بننزل و نركب عربيه تانيه هو فتشها او بندخل دوره الميه او بنقف على السوسته بتاع القطر
( السوسسته دى يعنى بيقف على العجلات او جمبها مش عارف اوصف بالظبط ) .
لحد ما الكمسرى يعدى


شوفوا بقى الوزير اللى كان عاوز يحل مشاكل التزويغ من الكمسرى
هو اهوه اللى بيساعد ع انتشارها
و ان شاء اله هبقى اصور لكم الشباب و هما بيزوغوا من الكمسرى
بسبب قرارات الوزير اللى بياخدها و هو فى مكتبه المكيف

كل سنه و احنا طيبين و هما محرومين

الثلاثاء، 30 سبتمبر، 2008

كل عام و انتم بخير كارت معايده لكل المدونين الاعزاء

الاخوه المدونين و المدونات

كل عام و انتم بخير بمناسبه عيد الفطر المبارك

اعاده الله علينا بالخير و اليمن و البركات

و جعل الله كل ايامكم افراح و اعياد

اول كارت معايده طبعا لامى ست الكل و ست الحبايب

ربنا يخليها لنا يارب و معاها اخويه المسافر و يجى لنا بالسلامه و معاه مراد صديقه و كل اخواتى و اهديهم احلى باقه ورد



و احب ان ابعت كارت معايده لكل المدونين و اهديهم الصوره دى




و دول كمان




دى بقى لاعضاء رابطه مدونى الدلتا


دى للاستاذ حسن مدتى فى البحرين و الاخ العزيز الاستاذ ارسلان من الجزائر




دى بقى خاصه بمدونى القاهره اصحابى الاعزاء منهم

ابى و كواكبها
ميرا و عقلها
الجيزاوى و زوجته
و منذر صديقى العزيز





اما دول فلاصدقائى و الناس الاريبين منى اوووى

صاحبى حماده زيدان
بطه
عمار
ريمان
دكتور زهران
ريهام
استاذ عادل نجم
يارا
رامز
قلب ابيض
دكتور محمد يوسف
شيماء جمعه
تامر المنصورى
محمد جمعه
محمد عطيه
حسن حنفى
حسام يحيى
الاستاذ يوسف الشافعى
و كل اصحابى ع شان محدش يزعل لو نسيت حد
اعذرونى على شان الزهايمر بس



الأحد، 28 سبتمبر، 2008

فى اربعينيه حريق الشورى و قبل عيد الفطر مباشره عديه الحكومه للشعب حريق المسرح القومى

لم يكد يمر على كارثه حريق مجلس الشورى اربعين يوما

و لم يكد يمر على كارثه الدويقه ايام

الا و بالحكومه المصريه و قبل عيد الفطر باشره تعطى العديه للمصريين


و تحرق لهم المسرح القومى
كده نقدر نقول

مازال مسلسل الكوارث الخاص بأسوا حكومه جات للشعب المصرى مستمر

فمن بدايه تولى المدعو نظيف شؤن الحكومه و كل يوم الشعب المصرى بيطلع من كارثه على كارثه


بدايه بكارثه غلاء المعيشه و ما صاحبها من اضرابات و تخريب و تكسير و ضياع حياه بعض المواطنين و اصابه البعض بالعجز الكلى بعد فقدهم اعينهم

ثم الانتقال لحريق مجلس الشورى

ثم كارثه الدويقه

ثم حريق المسرح القومى

و لسه و لسه و لسه

و مش غريب و لا عجيب بالرغم من كل الكوارث و المصايب دى

يطلع علينا صاحب الجلاله و السمو و العظمه السيد مبارك و يقول ان حكومه نظيف من افضل الحكومات اللى اشتغلت معاه

زى بالظبط ما يكون مكفأته للحكومه على تفريطها فى حقوق الشعب و ضياع حياتهم و تعذبيهم

كلمه شكر لهم و استمرارهم فى مناصبهم بدل ما يتم اقالتهم

كده الرساله وضحت اوى

عاوز تتولى اعلى المناصب مفيش ادامك غير طريق واحد بس

خرب و عذب و اقتل على اد ما تقدر من المصريين

لو عاوز تصلح و تعمر يبقى انت شاطر و مع الشاطر

الجمعة، 26 سبتمبر، 2008

اذا عطس الاقتصاد الامريكى اصيب اقتصاد العالم بالزكام

للمره الثانيه يشهد النظام الاقتصادى العالمى تهديد واضح بالركود بسبب التهديد بانهيار النظام الاقتصادى الامريكى

بعد هذه العباره

و بعد تاثير امريكا فى كل شىء فى مجريات حياتنا

لابد ان يكون لنا صوت فى انتخاب الرئيس الامريكى


اه بنادى بكده

لان اى قرار امريكا بتاخده العالم بيتاثر بيه

و اهو على الاقل نشوف مره فى حياتنا صوتنا بيهتموا بيه مش بيزوروه زى ما بيحصل عندنا

السبت، 6 سبتمبر، 2008

محاكمة جبل المقطم

صرح وزير الداخلية المصري بأنه سيتم محاكمة جبل المقطم وذلك لأنه السبب في مقتل عشرين مواطن

واصابة العشرات وبعد مرور عامين من محاكمته تبين أن الجبل عضواً بالحزب الوطني لذلك تمت تبرئته

والحكم بالغرامة والسجن للمصابين والمتضررين لوقوفهم أسفل الجبل مما أدى إلى إزعاج الجبل

وانهياره فوقهم

قلم
محمد مارو

الجمعة، 29 أغسطس، 2008

اتنين استقالا فمتى سيستقيل الاثنين ؟

فى ليبيا
خرج علينا سيف الاسلام القذافى و زف بشرى و ارح جميع الاخوه الليبيين

و قطع الشك باليقين و اعلن استقالته من العمل الحزبى و السياسى

ليقطع السنه اى واحد بيتكلم عن التوريث

بهذا يكون قد فعلها ابن العقيد
فهل يفعلها ابن الفريق ؟
و فى باكستان

قدم برفيز مشرف استقالته للبرلمان
و فى مصرنا الحبيبه تم حرق البرلمان
لقطع السنه اى واحد مطالب بالاستقاله

ملحوظه
انا واثق ان اللى عمله ابن القذافى ده مش اكتر من فرقعه اعلاميه
زى ما حصل مع الرئيس عبد الله صالح

السبت، 16 أغسطس، 2008

الى كل مخدوع فى ايمن نور

رساله تنبيه الى كل مخدوع فى ايمن نور

ظهرت حقيقه المدعو ايمن نور و ظهرت نوياه الخبيثه

فقد ارسل المدعو ايمن نور رساله لمرشح الرئاسه الامريكيه باراك اوباما

يستعديه و يستقويه بها على مصر

هذا و قد اعلنت كل القوى الوطنيه و المعارضه استيائهم من هذا التصرف

ووصفوه بالفضيحه و المصيبه

و ايضا اعلن حزب الغد استيائه التام من تصرف نور

و قال ان نور تم فصله من الحزب من اول اكتوبر عام 2005 و كل تصرفاته هى مجرد تصرفات شخصيه

لا تنم عن اراء الحزب او سياساته


انا اعتقد ان المفروض يتم محاكمته بتهمتين

خيانته للوطن
و الثانيه غبائه السياسى

لانه فى حمله الانتخابات الرئاسيه كان من المطالبين بقطع العلاقات مع اسرائيل

و الان بيطالب بحمايه امريكيه من اوباما المحب لاسرائيل

و كمان هو ميعرفش اد ايه مبارك نايم فى حضن ست الكل و متربع

معلش اصله غبىىىىىىىىىىىىىى

الأحد، 10 أغسطس، 2008

لولولولولولولولى عشت و شوفت الجوامع بقت مكيفه الهواء

اخيرا يا جماعه عشت و شوفت الجوامع مكيفه الهواء

فى مدينتى مدينه المحله الكبرى لفت انتباهى يافطه على باب جامع

اليافطه مكتوب عليها ادفع الجامع مكيف الهواء

و كنت فى القاهره فى المهندسين تحديدا و خاصه فى جامع مصطفى محمود

الجامع بسم الله ماشاء الله كبير جدا و الحمد لله مكيف الهواء

الله

طيب و انت زعلان ليه يا سى مارو

اقولكم بقى و ردوا عليه

جامع زى بتاع مصطفى محمود ده مش جامع صغير

ده جامع كبيييييييييير

يعنى عاوز على الاقل بتاع خمس ست مكيفات

بالرغم ان الجوامع الان مش بتتفتح الا ساعه الصلاه بس

و بالرغم ان المراوح كانت عامله شغل حلو اوى اوى اوى

و بالرغم من حاله الفقر اللى بنعشها

طيب اللى كييف الجامع ده مسمعش ان فى واحد انتحر على شان مش لاقى تمن ازازه زيت ؟

اللى كييف جامع المحله ده ميعرفش ان فى دخول مدارس و رمضان و الاهالى حامله الهم فوق همهم ؟

بالله عليكم

ايه افيد و احسن ؟

اكييف جامع المرواح عامله فيه شغل كويس جدا و لا اصرف تمن المكيفات و الكهربا بتاعهم على الاهالى ؟

ايه اولى ؟

احيى اسره و اساعد فى ادخال البهجه الى قلوبهم و لا اتمنظر

الأربعاء، 30 يوليو، 2008

غزاله المصريه حامل فى سبع توائم

الاسكندريه : مستشفى الشاطبى
بقلم محمد مارو

اكدت مصادرنا الخاصه فى الاسكندريه ان السيده غزاله فتحى حامل فى سبع توائم مره واحده

فى حاله اكد الاطباء و الخبراء العالميين انها من اشد حالات الحمل ندره

و قد استعدت مستشفى الشاطبى للحاله بكل ما اوتيت من قوه

و المستشفى على كافه الاستعدادات لاستقبال الاطفال

السيده غزاله لديها ثلاث بنات و ها هى الان حامل فى سبع توائم

يبقى المجموع عشره اطفال ربنا يبارك لها فيهم

اعتقد ان لسان حال السيده غزاله بيقول
بالعند فيك يا مبارك و بالعند فى كل اعلانات تحطيم الاسره ادينى جبت سبعه مره واحده

و بالعند فى اعلاناتك اللى انت ارفنا بيها فى الشوارع

قبل ما نزيد مولود نفكر هل اكله موجود ؟
هههههههههههههههه
يلا يا عمو اشرب
.................
تحديث
انا على فكره مع تنظيم الاسره جدا جدا
ع شان لاحظت ان البعض فهمنى غلط
هى بس الاستظراف حبك منى مش اكتر
و زى ما بيقولوا القافيه حكمت

الأحد، 27 يوليو، 2008

تعالوا نصوت تعالوا نلطم البقاء لله

تعالوا نصوت تعالوا نلطم

استغفر الله العظيم

نظام مبارك هيخلينا نخرج عن ملتنا

البقاء الله

انتقل الى رحمه الله تعالى اليوم ما يدعى بالقضاء المصرى الشامخ

بعد اعلان براءه ممدوح اسماعيل و اولاده
المتهمين بالتسبب فى الاهمال و غرق العباره و قتل 1035 مصرى

يلا

ساكتين ليه ؟
صوتووووووووووووووووووووووووووووووووووا

فى البلد دى
لو عاوز النظام يحبك
يبقى احرق المصريين زى ما حصل فى قطر الصعيد
لوث دم المصريين زى ما حصل مع هايدلينا
غرق المصريين زى ما حصل مع ممدوح اسماعيل
و تبقى من المقربين

لكن اذا لاقدر الله
لو حبيت انك تخدم المصريين و تنفعهم و تشغلهم
زى ما حصل الشاطر و ندا يبقى مقيش غير المحاكمات العسكريه
و تبقى من المغضوب عليه

اقول فى النهايه
لا حول و لا قوه الا بالله
هو القاضى العادل
اللى هيجيب لا حقوقنا فى الدنيا و فى الاخره

كلمه للقاضى و النظام
طيب يا راجل كنت اديله ساعه واحده حتى عاقبه اى عاقب مش تبعت له برقيه شكر كده

الثلاثاء، 22 يوليو، 2008

صدام كان فى الاول و الدور على البشير

افتتحت الولايات المتحده حربها على العرب و المسلمين و اخدت العراق

و ضحت بصدام ليله عيد الاضحى المبارك (مع انه من الاشهر الحرم اللى لا يجوز فيها الاعدام )و

عنيها كانت على سوريا

بس الظاهر لاقت ان الوقت مش مناسب قالت ناخد السودان

و اتهامتها للسودان و برضو مبارك عربيه

بالرغم من الاستنكار و الوعيد و الشجب و الادانه لقرار اعتقال البشير

الا انه برضو بمباركه عربيه

و هتخلص على السودان و بعدين سوريا و طبعا ايران قبلهم

و برضو ساكتين و بنتفرج

بس عاوز اقول كلمه للحكومه المصريه و السعوديه و الاردنيه

اللى بتقال عنهم معتدلين

عاوز اقولهم و افكرهم بمقوله
اكلت يوم اكل الثور الابيض

ماشى يا عرب ؟

ماشى يا امه المليار
ماشى يا امه العزه و الكرامه

بس الله يرحمهم
طبعا اقصد العزه و الكرامه مش الحكومات

اللى يغيظ فى الموضوع

ان الغرب مش شايفين الا العرب

و جمبا كيان صهيونى مغتصب و محكمه العدل الدوليه نفسها ادانت بناء الجدار الفاصل
و برضو عنيهم على العرب و بس

ما تبصوا مره كده لغزه و شوفوا اهلها و حاكموا شارون و اولمرت و باراك و نتنياهو
حاكموا بوش على اللى عمله فى العراق و افغانستان

قبل ما تحكمونا حاكموا اعداء الاسلام و اعداء الانسانيه

بس فى الاخر اقول معاهم حق فى اللى بيعملوه
اه معاهم حق
طالما احنا ساكتين

الخميس، 17 يوليو، 2008

لطيفه تبدع فى الكام يوم اللى فاتوا


اصدرت الفنانه لطيفه فى الكام يوم اللى فاتوا البومها الاخير

بعنوان

فى الكام يوم اللى فاتوا

و طبعا كاعادتها تنوعت الاغانى ما بين الرمانسى اوى و الرومانسى اللايت و الحزين و اغنيه بالعود رائعه و ده غير الاغانى السريعه

انا ملاحظ فرق واضح بين البوم لطيفه اللى فيه فن بجد
و بين البوم تامر حسنى اللى فيه اسفاف بجد
مع انى من معجبى تامر جدا
الا ان البومه الاخير سىء جدا
من حبه الافش و لا حبه لاحلى حاجه فيها و تلميحاته البايخه
او الاغنيه الكئيبه المتشائمه

مع لطيفه تسمع و تستمع بجد فى الالبوم الاخير
فى الكام يوم اللى فاتوا


و اخترت اروع

الاغانى بالنسبه لى

و هكتب كلمتها

اولا اغنيه سبنى شويه

توزيع : تميم
ألحان : وليد سعد كلمات : نادر عبد الله

الكلمات بتقول
سبنى شويه لوحدى على شان متضايقه شويه
متقلبش عليه مواجعى و تتعب فيه
ده و انا اد و نفسى اتكلم و اشتكى منك خايفه لا تيجى على جرحى و تزودها عليه
ليه هو انت فاضيلى على شان اجى و احكى معاك ؟
ده انت بتبقى معايه و جمبى و مش لاقياك
و اللى مأثر فيه بجد اننا شيفاك ابعد واحد عنى و اقرب واحد ليه
شايله فى قلبى انا منك بس انا مخبيه
راضيه معاك بقليلى و بستهتر بيه
ليه و ازاى تبقى انت اهم الناس فى حياتى و محسسنى انى مليش اى اهميه ؟

اما عن الابداع الاخر
فهو فى اغنيه كنا زمان اقوى

كلمات : بهاء الدين محمد ألحان : حمدى صديق
توزيع : مدحت خميس

الكلمات بتقول
كنا زمان اقوى كنا فى جراحنا اقوى و عذبنا كان بيمر
ايوه زمنا اتغير دلوقتى جرح صغير يجرحنا طول العمر
كان دمعنا جوانا غالى مكنش صوته حزين و عالى
بقى دمعنا طول الليالى دمع كله اهات و مر

احساسنا زمان كان يتحمل مهما الحياه تقسى علينا
بنعشها برضو و بنكمل و لا دمعه بتبان فى عنينا

اغنيه انا عمرى ما هنساك
الكلمات بتقول
انا عمرى ما هنساك انا ديما فكراك
انا اسمى اللى معاهم و انت كل الباقى معاك

طيب انا هنسى ايه ؟ طيب انا هنسى ليه ؟
من الاول و من الاخر عمرى من قلبى مسمحاك
اطمن و ارتاح مش باقيه على جراح
انا باقيه على حب و عمره ما اتغير و لا راح
مبقولش انى ملاك انا فعلا حباك
و برغم البعد اللى تعبنى انا عايشه مصلحاك

اما بقى اغنيه العود و اللى تريح الاعصاب بجد
اسمها لو سهران حبيبى بتقول
لو سهران حبيبى و على بالك هوايه
يبقى انت الليله دى كده سهران معايه
انا زيك سهرانه حبيبى و بفكر فى هواك
و القمر اللى شايفه انا شيفاه معاك
و حياة اللى بينا و القمر اللى بينا
انا حاسه الليله ده حبيبى ان احنا اتقابلنا

بتفكر فى حالى و بفكر فى حالك الشوق اللى جانى انا عارفه انه جالك
لو حتى قمرنا ليله لو ليله هجرنا
على ضيه و فى خيلنا هنكمل نهارنا

ده غير اغنيه فى الكام يوم اللى فاتوا و غير اغنيه مارينا و غيرها و غيرها
البوست ده اهداء لاخويه و صاحبى و حبيبى
حماده زيدان صاحب مدونه كلام و خلاص اصله عاش لطيفه
لينك مدونته اهوه كلام و خلاص