الاثنين، 26 نوفمبر 2007

هديه للحكام العرب قبل انابولس


يلا يا مبارك لم اصحابك و اشتروا بدله جديده ع شان هتروحوا ام الدنيا
و ست الكل
امريكا
كل واحد منكم بئه يروح يشترى له بدله حلوه كده و شيك
و اللى بيلبس الجلباب يروح السعوديه دى فيها شويه جلاليب حلوه اوى
او اقول لكم ابعتوا هاتوها من امريكا احسن ما هى امريكا اللى بتلبسنا و بتحمينا و بتصرف علينا و بتحللنا مشاكلنا
بس عاوز يا عرب افكركم بحجتين مهمين اوى
الاولى
ان كل مره لما سيد البيت الابيض يجى يخرج منه يعمل مؤتمر بدعوى البحث عن حل للقضيه الفلسطينيه
زى كلنتون كده
سيد البيت الابيت يفضل يدمر فينا طول 10 سنين و يجى فى اخر شهر له و عاوز يحلها
و انت فين طول العشر سنين ؟
عمال تدمر فى افغانستان و العراق و بمساعدتك كانت لبنان
و كنت عاوز تدمر سوريا بس العراق اداك درس
بالرغم ده كله مبارك بيقول انه متفائل من المؤتمر
انا مستغرب من الحكام دول
هما بيضحكوا عنفسهم و لا بيضحكوا علينا
و على رأى محمد صبحى
والله ما بتفرق معانا الاسماء
لا انابولس و لا ون ريفير و لا كامب ديفيد و لا اسلو

و لا اى مؤتمر من المؤتمرات
اصحوا بئه
الحاجه التانيه اللى عاوز افكر العرب بيها و افكر نفسى و افكركم معايه
صور الحرب ع لبنان

دى عباره عن شويه اطفال اسرائلين بيهدوا و بيكتبوا اهداء ع الصواريخ اللى راحه لاطفال لبنان











ايها العرب الافاضل
دى شويه صور بفكركم بيها مع انى عارف انها صعبه اوى
بس بفكركم انت راحين تحطوا اديكم فى ايد مين
و الناس دى عملت فينا و بتعمل فينا ايه
مع انى عارف ان المؤتمر ده ضحك ع الدقون و كلهم زى بمض
و تانى
و الله ما بتفرق معانا الاسماء
يلا بئه روحوا امريكا و شوف الموزز و عيشوا لكم يومين هناك
و تعالوا ائرفونا تانى

الجمعة، 23 نوفمبر 2007

السبب فى تخلفنا

كثير منا بيحاول يفهم او عاوز يعرف ايه السبب فى تخلفنا كمصريين بصفه خاصه( حضارة 7000 سنه )
و كعرب بصفه عامه رغم كل امكانياتنا الماديه و ثرواتنا الطبيعيه


عشان كده هحاول انى اقول سبب تخلفنا من وجهة نظرى الشخصيه

ع شان نعرف سبب تخلفنا تعالوا نشوف من اول يوم الطفل بيتولد فيه


اول ما يتولد الطفل عندنا فى العرب ننزل فيه هاتك يا بوس
فرحانين بيه بئه و نفضل نقوله ايهالحلاوه دى ايه الجمال ده


يا كميله و نفضل ع الحال ده لحد ما يروح المدرسه
و يمكن كمان لحد اما يخلص الابتدائيه

واحد يقولى وايه الوحش فى كده

انا اقوله من هنا بنربى الطفل ع الجنس و بنغرس فيه حب الجنس

هيقولى ازاى برضه مش فاهم

هقوله لما نفضل نتكلم ادامه ع انه جميل اما يكبر لازم يسعى
ع شان يفضل جميل و اللى يشغل باله لا الشغل و لا اى حاجه
غير انه ازاى يكون جميل و امور ع شان الجنس المختلف يحس بيه

عالعموم نشوف نقطه تانيه

الطفل كبر وراح المدرسه
دخل سنه اولى و الحمد لله نحج فى الفلاحين
و الارياف من و هو طفل بيروح مع ابوه الغيط و بيساعه ابوه

لكن تعالى بئه فى المدينه الواد خلص هيعملوا ايه ؟
اما يودوه النادى لو مستواهم المادى كويس
او يسبوه يلعب فى الشارع لو مستواهم عادى

و يفضل كده كل سنه و سنه ورا سنه
يخلص الابتدائى و هو متعود
انه يذاكر شويه و بعدين يلعب و يهيص طول الصيف

لكن بتاع الارياف واخد انه طول السنه
بيذاكر و برضه بيروح الغيط يعنى واخد ع الشغل من صغره

شغل يتناسب مع سنه
الاتنين يخلصوا الابتدائى و يطلعوا ع الاعدادى
بتاع المدينه يذاكر و يتعلم شويه فى الشتا و يهيص و يلعب فى الصيف
لكن الارياف يبدا يهتم اكتر بالارض و يقل الاهتمام بالتعليم
و يخلصوا الاعدادى
بتاع المدينه شحت و زى التنيل بياكل و بيشرب و متعلم و بتاع
الريف للاسف امى لا بيعرف يقرا و لا يكتب بس عنده ارضه و شغله و زراعته

هنا بتاع الريف يبطل مدرسه او ع الاقل يدخل دبلوم
و بتاع المدينه يكمل ثانوى و يكمل دراسته
بس للاسف بيجى الصيف كل سنه يلعب و يهيص بحجه
ال ايه انه تعبان طول السنه فى المذاكره

و لازم يريح
المهم بتاع الريف يخلص دبلوم او حتى لو ربنا وفقه و راح كليه بس
تلاقيه بيقول كلمه واحده بس انا ممكن اشتغل اى شغلانه

بتاع المدينه بئه بيه و باشا خلص ثانوى و كمان كليه و هو مش بيعرف حاجه غير انه بيعرف يقرا و يكتب حتى كليته مش اتعلم منها حاجه اصلا
و يخلص كليه و يصبح عااااااااااااااااااااااااطل
لا وراه شغله و لا مشغله لانه عاوز مكتب يقعد عليه متعلم بئه
لكن بتاع الريف اللى اتعلم و يشتغل من صغره بيروح يشتغل و يكسب

بس للاسف المحصله فى الاخر صفر
لان لا اللمتعلم الدوله فى حاجه له لانها
عاوزه واحد حرفى صنيعى لاننا مجتمع متاخر و تالت

و لا عوزه الحرفى الصنيعى الجاهل الامى احنا عوزين
شباب متعلمين و حرفيين مع بعض فى كل المجالات

احنا عوزين نتقدم بالعلم و معاه الصنعه و الحرفه
مش عوزين شباب ع مكاتب
ع شان كده لازم من الصغر نعلم ابنائنا ازاى
يشتغل و ازاى يصنع و ينتج

مش نعلمه انه يطلع تنيل من تنابله السلطان

السبت، 17 نوفمبر 2007

زياره اخ مريض محتاج لكم

اخوانى المدونين و المدونات
انطلاقا من كوننا اسره واحده وفى مجتمع واحد و يجب ان نكون كلنا ايد واحده ليس فقط فى مواجهة النظام بل فى الحياة العامه و الاجتماعيه ايضا
من هذا المنطلق و من هذا المبدا
يوجد اخ لنا مدون وحيد ليس له الا الله و احنا
احنا اخوته و اخواته هذا المدون هو عمر الشرقاوى تعرض منذو يومين لحادث سير اثناء ذهابه الى القاهره و انكسرت قدمه اليمنى و اصيب ببعض الجروح و الكدمات الى جانب تأثره النفسي من أثر الحادث
و هو الان وحيد ليس له اخوه و لا اخوات و محتجنا و محتاجكم جانبه من هنا فقد اتفقنا ان نذهب له يوم الخميس القادم ان شاء الله
وندعوكم لمشاركتنا في عمل زيارة جماعية له
انطلاقا من حديث رسول الله صلى الله عليه و سلم ما من مسلم يعود مسلماً مريضاً غدوة إلا صلى عليه سبعون ألف ملك حتى يمسي، وإن عاد عشية إلا صلى عليه سبعون ألف ملك حتى يصبح، وكان له خريف في الجنة) الترمذي (969).
ملحوظه
سواء اتفقنا معه فى الرأى او اختلافا المهم كلنا شعب واحد و ليس من الضرورى ان تكون متفق معاه فى اراءه
فهذة الزيارة من الجانب الإنساني انطلاقاً ان الإنسان يقف بجوار اخيه الإنسان في الظروف الصعبة
و انت هتزوره كا اخ مسلم محتاجلكم جميعا
اتمنى ان تلبوا الدعوة و اعتبروها وقفه احتجاجيه او لقاء تلفزيونى او مؤتمر من اللى بنجرى وراهم دول
و الله الزياره دى هى الباقيه ليك فى الاخره لان ثوابها كبير جدا و هترفع من معنوياته جدا
اخوكم
محمد مارو و محمود الششتاوى

للاستفسار عن كيفيه الوصول و التنسيق
نرجى الاتصال بالرقم ده 0182491025

اتطبخت يا معلم

كده بالهنا و الشفا عليكم يا مصريين
و اقول لكم كده قضيه الشاب المصرى اللى مات من التعذيب كده اتطبخت و ماتت خلاص
ايه الحكايه انتم هتعيشوا فى الدور و هتاخدوا عليها و لا ايه ؟
انتم هتخدوا على ان كل يوم و التانى الحكومه تحبس لكم ظابط شرطه و ترفده ع شان سواد عيونكم
هتجيب ظباط منين بعد كده بئه ؟
دى صرفت عليهم دم قلبها
كفايه اوى واحد و كان طالع من عيون الحكومه انها ترفده بس يالله زكى رمضان
فوقوا بئه و اصحوا بئه
و اللى مش مصدق انها اتطبخت لحد ما شاططت و رحتها طلعت كمان
اللى حصل يوم الخميس الماضى
لما مجموعه من الشباب نظمت نفسها ع شان تعمل وقفه احتجاجيه سلميه جدا و متحضره جدا و بالشموع
فى الاخر يجى الامن و يفركش الوقفه
و كمان يعتقل الناس امثال الجيزاوى
السؤال بئه ليه عملتم كده يا داخليه ؟
هو انتم مش هتحكموا الظابط ده و لا ايه ؟
و الله اللى انا حاسه ان مدام فركشوا الوقفه يبئه كل سنه و احنا طيبيبن و هما متهناين
مدام مش حبوا الناس تتكلم و تتظاهر مظاهره سلميه متحضره يبئه كده بيكتموا ع الخبر
و اتطبخت
و كلوها يا مصريين بالهنا زى ما اكلتم قبل كده العباره و قطار الصعيد و فلوس الريان و غيره و غيره
كلوا و اشربوا
ان كنتم لائين تاكلوا اصلا
ما دى الوكسه
يالله يا بخت مبارك بيكم
شعب مهما يتعمل فيه
ساكت مؤدب مش بيتكلم
يالله معانا الله ده كفايه اوى و كفيل بيهم ان شاء الله

الأربعاء، 14 نوفمبر 2007

صباح الخير يا نواره نجم صباح الخير يا شمس صباح الخير يا بطه

فى موضوع بجد هو فعلا خطييييييييييير جدا و اللى تبنته الاخت نواره نجم
و انضم ليها كل من شمس و بطه
لو مش تعرفوا الموضوع
الموضوع
بخصوص الاقصر لاس فيجاس
مدينه الاقصر الغاليه و العزيزه ع كل مصرى و ما فيها من حضاره و عراقه و ريحه و عرق المصريين
الاخت نواره و كل من الاخ شمس و الاخت بطه بيقولوا ان الاقصر اتسرقت منا و فين حقوق الملكيه الفكريه ؟
انا بقول لهم صباااااااااااااااااااااااااااااح الخير
صباااااااااااااااااااااااااااااااح الخير يا نواره صبااااااااااااااااااااااااااااح الخير يا شمس صبااااااااااح الخير يا بطه
انتم زعلانين ان الاسم اتسرق منا و مش زعلانين ان مصر كلها اتسرقت منا
مصر كلها امريكانى
فين مصر ؟
حد يجاوبنى
فين مصر يا جماعه
نظام الحكم امريكى
مش يعرف ياخد اى قرار الا بمواقفه الامريكان
الشعب متامرك
سواء فى نظام اللبس اللى تلاقى البنت تبين سرتها ووسطها و الشباب اللى بتلبس وسط ساقط
او فى اللغه حتى
كل واحد بيتباهى انه امريكى و بيعرف يتكلم زيهم و انه عارف له كلمتين انجليزى و امريكى حلاوه كده يعنى
اسماء المحلات و المصانع امريكى
اسماء العيال الصغيره امريكى
اقتصادنا نفسه و لقمه عيشنا فى ايد الامريكان
فين مصرنا بئه ؟
الامريكان فى كل حته و ايديهم فى كل حته فى مصر
لما تعرفوا ترجعوا لنا مصرنا ابئوا ازعلوا ع الاقصر
و الله انا مستغرب من الشعب المصرى ده اللى ينتفض و يثور عشان مدينه و سايب بلد بحالها
ده مش معناه انى موافق ع سرقت الامريكان لينا بس الله يكرمكم انتفضوا كمان من اجل مصر بالمره
و لا مصر مش تهمكم و اللى تهمكم الاقصر بس؟

الأحد، 11 نوفمبر 2007

غطينى و صوتى عليه يامه

غطينى و صوتى عليه يامه و ياريت الكل يصوت معاها
ما خلاص الحكومه موتتنا خلاص و هتموتنا اكتر و اكتر
لاء لاء انا مش بتكلم ع المواطن اللى الحكومه عذبته فى العمرانيه و لا مواطن المنصورةو
لا بنت الفيوم اللى الحكومه داستها بالعربيه ادام اهلها
لاء لاء
دول ارتاحوا خلاص و المفروض نشكر الحكومه انها ريحتهم بدرى
انا عوزكم تصوتوا عليه لان الحمكومه المصريه خلاص هتجوعنا اكتر و اكتر و اكتر
من ما نحن جاعنين الان
ازاى يا ولاد ؟
بكل بساطه و بعمليه مش يعملها غير شويه ابلسه و شياطين
و فى اجتماع الشياطين و الابلسه السنوى
اللى بيسموه مؤتمر الحزب الوطنى السنوى
( بالظبط زى الاجتماع اللى عمله ابو لهب للتخلص من رسول الله صلى الله عليه و سلم )
لما اتفقوا و خرجوا بفكره شيطانيه ازاى يتخلصوا من رسول الله و فى نفس الوقت قبيله بنى
هاشم مش تقدر تتكلم و اتفقوا انهم يضربوه ضربه رجل واحد
نفس الفكره بس طبعا لله المثل الاعلى و لرسوله
و لهم هما المثل الاوطى و لحزبهم
الناس دى اتفقت ع الشعب المصرى الجعان الغلبان المعدوم انهم يتخلصوامنه بفكره عبقريه
عن طريق رفع الدعم عن اى شىء ( طبعا ان كان فى دعم اصلا ) و قال ايه هيدوا للناس
فلوس و ده هيكون دعم مادى بدل المعنوى
يا خراااااااااااااااااااااااااااااااااااابهم
يعنى كده يا ولاد ممكن رغيف العيش يوصل لربع جنيه او نصف جنيه و يدولك هما شلن
زياده
هما طبعا اول سنه هيدولك الشلن ده و بعدين هيكبروا دماغهم سنه ورا سنه زى ما عملوا
فى التموين اللى كنا نسمع عنه
او فى البطاله اللى كل يوم بيكبروا دماغهم بيها
اه طبعا الراجل الكبير ماشى بئه و عوزين يلموا فلوس اكتر و اكتر اصله فاكر انه هياخدها
معاه
او فاكر انه ممكن يدخلها بفلوسه او يشترى له حته فردوس كده ع النيل تحفه
يا عم راعى ربنا بئه
الناس غلابه
و الله و الله و الله مش عارفين يشتروا الرغيف ابو شلن
هيشتروا ابو ربع او نصف جنيه
حررررررررررررررررررررام
انا عن نفسى باصص للموضوع ده بصه تشاؤوميه جدا
ربنا يستر بئه
اه بالحق نسيت اسال الابلسه دول
انتم هتوصلوا ازاى الدعم المادى ده للناس ؟
يعنى هتدوا لكل واحد الشلن الزياده ده ازاى ؟
عن طريق التموين ؟
انا مليش بطاقه تموين زى ما كل الناس عارفه
لان زى ما الكل عارف انا بطاقتى التمونيه ع بطاقه الاسره لكن لما اتجوز بعد عمر طويل و اجيب ربع عيل ده ملوش تموين
امال عن طريق الرقم القومى ؟
بجد مش عارف بس تانى ربنا يستر
امتى بئه يارب نخلص من البلد دى ع خير
ادعوا لى اخلص بئه

الأحد، 4 نوفمبر 2007

دعوه بالشفاء


اخوانى المدونين و اخواتى المدونات

انطلاقا من انى بشوف ان كلنا اخوه مع بعض سواء اتفقنا او اختلفنا فى الاراء او الموضوعات او التوجهات


و من منطلق الاخوه دى


انا بسألكم دعاء صافى من القلب لوالد اخت لينا


اخت فاضله و محترمه لا ازكيها ع الله بس والدها مريض


و محتاج دعائكم بالشفاء


و كما قال رسول الله صلى الله عليه و سلم


من دعا لأخيه بظهر الغيب، قال المَلَكُ المُوَكَّلُ به: آمين ، ولك بمثل





اسئلكم الدعاء و الشفاء العاجل له و لكل مرضى المسلمين و المسلمات

الخميس، 1 نوفمبر 2007

حراااااااااااااااااااميه

مش عارف ايه بلد الحراميه دى ؟

البلد اللى لا بيحكمها قانون و لا دستور و لا اى حاجه

المفروض فى اى بلد محترمه بيكون فى قانون بينظم تعامل الافراد مع الحكومه و
مع الموسسات الحكوميه

عشان لا المواطن يسرق الحكومه و ده طبعا صعب و لا ع شان الحكومه تسرق المواطن بس للاسف ده اللى بيحصل
عندنا فى مصر مثلا

انا اتخرجت و الحمد لله و روحت اشوف موقفى من التجنيد
اخت تاجيل لمده ثلاث سنوات

بس طبعا مختوش ببلاش

انا كان لازم ادفع ما علينا دفعنا و كعينا

و بعد التلت سنوات ما خلصوا روحت اخد بئه المعافاه

قالوا ادفع كام يا عم قالى 15 جنيه

قلت له اوكى خد الفلوس اهه احسن من وشكم و
مش عاوز اروح الجيش ده

مش تهرب منه بس ع شان التحكم اللى فيه ده و الذل و المهانه

دفعت قالى تعالى بعدها ب 15 يوم خد الشهاده روحت اخدها قالوا

ادفع تانى قلت اوكى كام يا عم قالى 5 جنيه قلت ماشى
خد اهوه و خت الشهاده و مشيت

اخويه بئه اصغر منى شويه

هو معاده ياخد شهاده المعافاه بعدى راح ياخد الشهاده
بعد ما اختها بشهر بس

انا واخدها فى رمضان

هو واخدا اليوم

بس طبعا ده شهر و لازم الفلوس تغلى

انا كنت دافع 15 جنيه فى الاول

هو دفع 25 جنيه

انا فى المره التانيه دفعت 5 هو دفع 15 جنيه

انا بئه عندى سؤالين

هو ليه الفلوس دى مش ثابته و اضمن منين ان الفلوس دى
مش اللى فى الادراه اللى بيخدوها مدام كل يوم بتغلى كده ؟
كمان
الفلوس دى بتروح فين ؟

انا يوم ما كنت رايح كان فيه حوالى 1000 شاب
او اكتر كنا كتير اوى فعلا
و ده من منطقه واحده

و كل يوم هنقول فى 1000 بيخدوا منهم 25 جنيه يعنى 25000
جنيه كل يوم من منطقه واحده
ده من تاجيل الجيش بس

تعالوا كده نشوف استخراج البطاقه

ع شان تستخرج بطاقه لازم تدفع 15 جنيه استماره لو قلنا
كل يوم فى مليون واحد بيستخرج بطاقات يبئه فى 15 مليون جنيه

و شهادات الميلاد بئه ب 27 جنيه

و زى ما بيقولوا كل دقيقه فى 4 مواليد شوفوا بئه فى
اليوم كام مليون ع شان شهاده الميلاد
عاوز اعرف كل الفلوس دى بتروح فين

و لما يجوا يبنوا مدرسه او مستشفى بيشحتوا عليها
زى مستشفى 57357
اللى شحتوا عليها من طوب الارض

لكن لما يبنوا مدينه انتاج اعلامى تلاقى الفلوس طلعت هوا
حسبى الله و نعم الوكيل