الاثنين، ١٤ مايو ٢٠٠٧

عفوا سيدى الرئيس مش من حقك

النهارده قرأت خبر فى شريط الاخبار ( الشريط الاحمر بتاع القناه الاولى ) بيقول الخبر
مبارك لم يأخذ قرار بأسقاط الديون العراقيه لمصر
و على اد فهمى ( زى ما انا عرف يعنى ) ان الديون او جزء منها على الاقل دى بتاع المصريين الغلابه
اللى تعبوا فى العراق و اشتغلوا و سابوا اهلهم و عيالهم سنين و شهور و ايام
و اتغربوا على شان يجيبوا القرش و اللقمه للعيال
المصريين دول اشتغلوا فى العراق و لما جم ينزلوا مصر السلطات العراقيه قالت لهم احنا هنحول لكم الفلوس ع مصر و خدوا بدلها ورقه تثبت ان لكم فلوس عندنا
اللى اسمها الان
الورقه الصفرا
و الناس دى يعينى استنوا شهور و ايام و سنين
على امل انهم يفرحوا بتعبهم
بس محدش صرف لهم حاجه لحد الان
فلو الديون دى زى ما انا فاهم كده انها فلوس الناس الغلابه دول
يبئه معذره يا سيدى الرئيس محدش له الحق انه يتنازل عنها الا لو كنت هتصرفها انت من خزانه الدوله
و ده طبعا صعب
يبئه معلش
بدل ما تفكر انك تسقطها فكر احسن انك ترجعها
و طبعا لو قلت ترجعها الان اكون معنديش دم على شان الوضع المؤلم اللى بيعيشه العراق
بس اقول على الاقل زى ما الناس دى مستنيه من سنه 89 يعنى من 18 سنه هما مستنين
برضه هما ممكن يصبورا كمان شويه
بس المهم انهم يشوفوا نتيجه تعبهم و يحسوا بيه
لان منهم اللى مديون ع حس الفلوس دى لحد الان
و منهم اللى راهن بيته و منهم و منهم ومنهم
يعنى الناس محتجاها اوى