الاثنين، ٣١ ديسمبر ٢٠٠٧

صوتى ياللى منتش غرمانه

فاكرين فيلم خلى الدماغ صاحى بتاع سامى العدل و مصطفى شعبان لما سامى العدل كان عامل فيها جن و ابن ملك الجان ؟
فاكرين لما كان بيحاول بينظف المنطقه بتاع مصطفى شعبان و كان عاوز برصف الشارع ؟ و كل اما يجى يرصف الشارع الحكومه تكسر الرصف بحجه دخول الكهربا او التليفون او الصرف ؟ يعنى هو بينظف و الحكومه متعمده تبوظ
ده يا جماعه بيحصل عندنا و اكيد عند كتير منكم
بس من غير ما يطلع لى لا جن و لا عفريت و لا اى حاجه
كل ما فى الامر احنا تعبنا من عدم النظافه و قلنا ننطف
و لمينا من كل شقه مبلغ و قدره و قلنا هنرصف الشارع نظافه يعنى
و بعد اما لمينا من كل شقه الفلوس و رصفنا الشارع
و قلنا هننطف و نطفنا الحمد لله لكن هيهات هيهات
مين اللى بنطف ؟ الحكومه رافضه نظافه الشعب
الان و بكل بجاحه يتم تكسر الرصف فى مدن كتير بحجه دخول الغاز الطبيعى
اهلا بيك يا عمو الغاز بس هو على شان حضرتك تدخل لازم تبوظ لنا الدنيا ؟ ربنا يسمحك
يا ريت يا حكومه تبئى تصلحى الشوارع تانى
مع انى متاكد ان ده عمره ما هيحصل و مش هيحصل ربنا يسامحكم بئه

الجمعة، ٢١ ديسمبر ٢٠٠٧

الحياة منتهى اللذه

فعلا الحياة منتهى اللذه لما القاهرة و مصر كلها تغرق فى شبر ميه من شوية مطره فعلا الحياة منتهى اللذه لما تيجى تروح مشوار سواء بالعربيه او ع رجليك متعرفش بسسب شوية مطره

فعلا الحياة منتهى اللذه لما اقل امين شرطه او مخبر يديك ع افاك و متقدرش تقول ليه عمل كده

فعلا الحياة منتهى اللذه لما تتخرج بعد سنين طويله من المذاكرة ووجع الدماغ و اهلك يصرفوا عليك دم البهم و فى الاخر يقولوا لك

شكرا مش عوزينك
فعلا الحياة منتهى اللذه لما كل حاجه عماله تغلى و الحكومه عماله تخنق فينا و احنا مش قادرين نقول كفايه

فعلا الحياة منتهى اللذه لما كل حاجه يعوزها الحزب الوطنى هى اللى تمشى سواء كانت صح او غلط و الدليل ع كده نكسه 76 انا

اقصد 76 مش 67 لما مبارك حب يعدل الماده 76 و المعارضه طلعت و قالت لا و الشعب طلع و قال لا بس الحزب الوطنى قال نعم و

فعلا تمت زى ما سيادة الحزب عاوز و لما حسوا انها مش نفعه رجع مبارك تانى و قال نعدلها من جديد ده اعتراف صريح بفشل حزبه

فعلا الحياة منتهى اللذه لما كل يوم و التانى تظهر شكوة تعذيب زى بتاع عماد الكبير اوعوا تنسوه

فعلا الحياة منتهى اللذه لما يجى جمال مبارك رئيس لمصر شئنا ام ابينا

و لسه الحياة منتهى اللذه و لسه و لسه
البوست ده قديم من السنه الماضيه لكن بتذكره مع كل مطره

الثلاثاء، ١١ ديسمبر ٢٠٠٧

اسف ! ده اسمه لعب عيال

اااااااااااسف الللى حصل ده اقل ما يمكن ان يقال عنه انه لعب عيال
طبعا كلكم عارفين اقصد ايه
اقصد التصرفات الصبيانيه بتاع الحكومه السعوديه
دى تصرفات عيال بتلعب فى الحاره
مش تصرفات حكومه رشيده المفروض انها تكون زعيمه العالم الاسلامى
انا بقلولهم انتم كده اثبتم انكم
مش تقدروا على تحمل زمام اشرف امه على الارض
مش تقدروا تتحملوا زمام اكبر امه على الارض
الى الحكومه السعوديه
طظ فيكم كلكم
ياللى مش عارفين تحددوا هو الهلال ظهر و لا لاء
و ال ايه عاوزين نتقدم و نتفوق على امريكا و ننتصر على اسرائيل
هنتقدم ازاى و انتم مش عارفين تشوفو االهلال
طظ فيكم واحد واحد
و من غير اعتذار للالفاظ
و تالت مره طظ فيكم
انتم ضيعتوا علينا صيام يوم من الايام العشر اللى رب الكون اقسم بيهم
طظ فيكم ياللى كل همكم الخلافات بس و جمع الاموال اللى ان شاء الله
ربنا هياخدها منكم قريبا زى ما وهبها لكم
طظ فيكم و من كل قلبى
و بقولها بكل غل و من كل قلبى
طظ طظ طظ طظ فيكم الى الابد
معلش انا بكتب البوست ده و انا كلى مراره و اسى و حزن
لان دى مش اول مره الحكومه السعوديه تعملها معنا
ثم الان الامر مش مستاهل انه يحصل فيه اللخبطه دى
ده هلال و بشوفه يا عالم
مش بخترع الذره
او بعمل نووى

الجمعة، ٧ ديسمبر ٢٠٠٧

ما تم الاتفاق عليه فى رابطه مدونى الدلتا

بسم الله الرحمن الرحيم
الاخوه الافاضل الاعضاء فى رابطه مدونتى الدلتا
2007/ تم اليوم الخميس الموافق 4 / 12
الموافق 26 من ذى القعده سنه1428 هجريا
عقد الاجتماع السادس لرابطه مدونى الدلتا
برئاسه العضو
محمد مارو
و حضور مجموعه من الاعضاء و الاخوه الافاضل
و قد تم الاتفاق على ما يلى
اولا / الاستمرار فى حملة التضامن مع اهل غزه ماديا و معنويا
ثانيا / الاستمرار فى حمله مقاطعه بجيب ساويرس و قد تم اختيار يوم 9/12 لوقف استقبال او ارسال اى مكالمات من موبينيل اى الى موبينيل و نشر و تعميم هذه الحمله و تعريف باقى الناس بهذا اليوم
ثالثا / الاتفاق على اعاده وتنظيم و هيكله الرابطه
و قد قدم العضو محمد مارو الاقتراحات التاليه و تم التصويت و الموافقه عليها
اولا / الاعضاء السابق ذكرهم هم الاعضاء الاساسيين ان شاء الله
لاستمرار الرابطه على ان يتم الاتصال بكل من الاخوه الاستاذ عادل نجم و الاستاذ معتز و الاستاذ الششتاوى و الاستاذ اسلام و باقى الاخوه و الاخوات لمعرفه مدى استمرارهم معنا و طبعا نامل و نتمنى ان يكونوا معانا دايما
ثانيا / الاتفاق على عقد لقاء فى اول خميس من بدايه كل شهر الساعه الثالثه عصرا
ثالثا تم الاتفاق على ان يكون المنسق العام يتغير بصفه دوريه مع بدايه كل دوره و يتم اختياره ابجديا
رابعا الاتفاق على حقوق وواجبات المنسق العام
من حقوقه
له الحق المطلق فى اختيار موضوع النقاش و جدول اعمال دورته
تكون الجلسه برئاسته لتنظيم الكلام بين الاعضاء و لابداء الاراء
اذا كان هناك اى مؤتمر او اى ملتقى يكون هو المحدث الرسمى للمجموعه
اما واجباته
التنسيق بين الاعضاء لمعرفه وتاكيد من سيحضر من عدمه
الاتصال بجميع الاخوه الاعضاء لمعرفه اخبارهم و ابلاغ باقى الاعضاء فى حالات ( الفرح / النجاح / اعياد الميلاد / المرض / الاحزان ) لتقديم الواجب المطلوب
و ايضا ابلاغ الاعضاء لتقديم الواجب كل واحد باسمه
ملاحظات
اولا تم الاتفاق ع ان يكون رئيس الدورة القادمه الاستاذ تامر بدلا من الاستاذ البوسطجى نظرا لظروف امتحاناته
على ان راس هو الدورة اللى بعدها
ثانيا البنود السابقه تم الموافقه عليها و غير مطرروحه للنقاش او الحذف لكن يمكن الاضافه عليها
و يتم ابلاغ رئيس الدورة فى حاله الاضافه حتى يدرجها فى جدوله
ثالثا / فى حاله وجود اى طوارى تمنع من الحضور فى الميعاد المتفق عليه امطار مثلا او تقلبات جويه يكون اللقاء الخميس اللى بعده و يكون هذا بناء على راى رئيس الدورة وقتها و هو الذى يحدد هل يتم التاجيل ام لا
مع تحياتى لكم
محمد مارو

الأحد، ٢ ديسمبر ٢٠٠٧

عمال غزل المحله .....منى ليكم الف تحيه

عمال غزل المحله منى ليكم الف مليون تحيه ياللى علمتوا المتعلمين ايه معنى الحريه و الاضراب و الاعتصام  
 
عمال غزل المحله الشرفاء ياللى عرفتوا ازاى  تركعوا الحكومه فى اقل من اسبوع

عمال غزل المحله  الف شكر  ليكم  كلكم

بسببكم الشعب فاق

بسببكم الشعب عرف ان له حقوق و له مطالب

بسببكم  الاضرابات و الاعتصامات ملت البلد

سواء اضراب و اعتصام  موظفى الضراب  او عمال غزل شبين او غيرها و غيرها

بس الاهم  و المهم انكم ياللى ممكن اوى كتير منكم يكون يادوب بيفك الخط

انتم علمتوا اساتذة الجامعات ازاى يعملوا اضراب

و ها هم الان بيطالبوا بحقوقهم و عملين اضراب
و بيهددوا بالاعتصام زى ما عملتم