الثلاثاء، 25 سبتمبر، 2007

فين وعودك يا ريس ؟

فين وعودك يا ريس
متهيأ لى انك ظهرت فى التلفزيون من سنتين او تلاته واصدرت تصريحات رنانه و حلوه اوى و قلت فيها و شددت ع ضرورة عدم حبس الصحفيين
و مش كده و بس ده انت أمرت بعمل قانون لحمايه الصحافه
انا متهيألى و الله اعلم ان التصريحات دى كان ليها وقتها
لما ست الكل ( ربنا يخليها لنا ) ماما امريكا امرت بنشر الديمقراطيه فى الشرق الاوسط
كان لازم انك تسمع الكلام و تنشر زى ما قالت
لكن بعد اما امريكا تراجعت عن طلبها لانها شافت ان الديمقراطيه جابت حماس للسلطه و الاخوان فى مجلس الشعب
و قالت الاستقرار اهم من الديمقراطيه
كان لازم و وواجب عليك انك تسحب الوعد بحريه الصحفيين و اهوه النتيجه ظهرت
بحبس خمس رؤساء للتحرير
و اهم خمس رؤساء فى مصر
اللى اخد سنه و اللى اتنين
و الله اعلم هيحصل ايه بعد كده
يا ريس لما تحبس دول اللى الدنيا كلها عارفاهم و شيفاهم امال هتعمل فينا احنا ايه المدونين الغلابه ؟
اعدام ؟
انا متهيالى ده اقل واجب فى حقنا
بس برضه مش هنخاف و مش هنسكت
و لو الصحافه المكتوبه و الورقيه صادرت حريتها
الصحافه الاكترونيه و المدونين مش ساكتين
واهوه الشباب عامله شغل كويس جدا عشان يفضحوا امركم و مش هنخليكم تبرطعوا فى الارض فساد ليل ونهار
الحمد لله فى شباب حر وواعى مش بيخاف
الشباب دول امثال منذر و الجيزاوى و نواره و معتز و الششتاوى اللى عاميلن اهم حامله للقضاء ع التعذيب
وفى شباب غيرهم حر وواعى مش هنخاف و مش هنسكت هتعمل ايه يعنى ؟
هتعتلقنا ؟ مااحنا معتقلين كده كده فى وطنا
هتموتنا ؟ يكون ارحم لنا
ايه اخرتك و ايه اللى ناوى عليه ؟
زمن الخوف ولى
لازم الفجر يطلع بئه
منتظرينه
باهم اعلان رسمى فى التلفزيون و طبعا الكل عارف ايه هو الاعلان ده
انا منتظره
منتظره
منتظره