السبت، 17 نوفمبر 2007

اتطبخت يا معلم

كده بالهنا و الشفا عليكم يا مصريين
و اقول لكم كده قضيه الشاب المصرى اللى مات من التعذيب كده اتطبخت و ماتت خلاص
ايه الحكايه انتم هتعيشوا فى الدور و هتاخدوا عليها و لا ايه ؟
انتم هتخدوا على ان كل يوم و التانى الحكومه تحبس لكم ظابط شرطه و ترفده ع شان سواد عيونكم
هتجيب ظباط منين بعد كده بئه ؟
دى صرفت عليهم دم قلبها
كفايه اوى واحد و كان طالع من عيون الحكومه انها ترفده بس يالله زكى رمضان
فوقوا بئه و اصحوا بئه
و اللى مش مصدق انها اتطبخت لحد ما شاططت و رحتها طلعت كمان
اللى حصل يوم الخميس الماضى
لما مجموعه من الشباب نظمت نفسها ع شان تعمل وقفه احتجاجيه سلميه جدا و متحضره جدا و بالشموع
فى الاخر يجى الامن و يفركش الوقفه
و كمان يعتقل الناس امثال الجيزاوى
السؤال بئه ليه عملتم كده يا داخليه ؟
هو انتم مش هتحكموا الظابط ده و لا ايه ؟
و الله اللى انا حاسه ان مدام فركشوا الوقفه يبئه كل سنه و احنا طيبيبن و هما متهناين
مدام مش حبوا الناس تتكلم و تتظاهر مظاهره سلميه متحضره يبئه كده بيكتموا ع الخبر
و اتطبخت
و كلوها يا مصريين بالهنا زى ما اكلتم قبل كده العباره و قطار الصعيد و فلوس الريان و غيره و غيره
كلوا و اشربوا
ان كنتم لائين تاكلوا اصلا
ما دى الوكسه
يالله يا بخت مبارك بيكم
شعب مهما يتعمل فيه
ساكت مؤدب مش بيتكلم
يالله معانا الله ده كفايه اوى و كفيل بيهم ان شاء الله

هناك 11 تعليقًا:

عصفور المدينة يقول...

اتطبخت ومين كلها ؟
وعلى فكرة الجيزاوي طلع الحمد لله بس البلوج بتاعه بدأ من الصفر
لاحول ولاقوة إلا بالله

سارة يقول...

والله يا مارو احنا بلد متميز

طباخين اخر جمال

وترزية محترفين

عموما يا مارو هى كدة كدة مطبوخة
ومش كل يوم هيحبسوا لنا واحد
لسبب بسيط جداا لان لو جينا للحق فالكبار هما اللى يستاهلوا السجن مش الادوات اللى بيحركوها

بلا عنوان يقول...

المفروض أصلا يشحنوهم على العباسيه مش السجون
لأن دول ناس مش طبيعيه مرضى نفسيين

وطبعا لا يخفى علينا ان العباسيه بابها مفتوح للجميع
بس طبعا عشان اللي جوه يخرجو مش عشان حد يدخل؟؟

أسلوبك دمه خفيف والمدونه لذيذه

سلام

المصرى الجديد يقول...

عادى لا هتبقى اول مرة ولا اخر مرة احنا خدنا على كده وده الاصل انما محاكمة اسلام نبيه ده كان استثناء كده عشان العيد ورمضان وكل سنة واحنا دابما طيبين
http://newegyption.blogsome.com/

محمد مارو يقول...

عصفور المدينه
اتطبخت و احنا اللى كلناها كالعاده

محمد مارو يقول...

عندك حق يا ساره و الله الكبار هما اللى المفروض يتحبسوا

محمد مارو يقول...

اخى بلا عنوان
انت تقصد يشحنوا المتظاهرين و لا المتعذبين و لا المعذبين ؟

محمد مارو يقول...

فعلا يا مصرى يا جديد مش هتكون اول مره

حمادة زيدان يقول...

يا معلم ماروا هي لسه هاتطبخ دي مطبوخة من زمان , من أول أيام الثورة السودة ومن يوم ما مسكونا شوية عساكر وهي بتطبخ , ومن قبل الثورة من أيام أجدادنا الفراعتة وهي بتطبخ , يبني أحنا شعب أكيل وبنحب ناكل على طول!!!!!!!!!!!!!!!!!!!!!!
حمادة زيدان

كاريكاتور العرب يقول...

لازم تعملوها مرة تانية وتالتة. ومن يتهيب صعود الجبال يعيش ابد الدهر بين الحفر.

على فكرة شريط الجزيرة الاخباري معدش شغال لا عندك ولا عندي

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘