زودوا المرتبات 30% الشعب الغلبان و المطحون فرح ياعينى
يا شعب متفرحش اوى كده
اهو زود المحروقات 40% ابسط ياعم
رساله لمبارك بقى
يا مبارك فى مصرنا الحبيبه
ناس مرتبها 300 جنيه و ناس تانيه مرتبها 3000 جنيه
اللى بياخد 300 جنيه زاد ووصل مرتبه الى 390 جنيه
و اللى بياخد 3000 جنيه و صل مرتبه الى 3300 يعنى زاد 300 جنيه يعنى مرتب واحد من الغلابه
يعنى برده هما اللى كسبانين برده
و فى الاخر ترجع و تقول عاوز موارد للبلد
يا مبارك اللى تعبانين الناس الغلابه اللى بياخدوا 100 و 200 و 300 جنيه
لكن اصحابك ووزرائك و رجالك و الحاشيه بتاعك مش تعبانين فى حاجه
بدل ما تبحث عن موارد
اولا بطلوا سرقه فى البلد
ثانيا ممكن اوى تخلى الزياده دى للى مرتبهم تحت ال 500 جنيه و اللى فوق ال 500 يكون لهم نسبه تانيه و اللى فوق ال 1000 نسبه تالته و هكذا
على شان نقرب الشعب من بعضه
و نقلل الهوه الكبيره اوى دى
من الاخر يا عم
مش عاوزين الزياده بتاعك دى خدها و سبنا فى حالنا مدام احنا اللى بننضر و الكبار اللى بيستفيدوا
ملحوظه
انا كنت كاتب موضوع بقول هو اضراب 4/5 ده ليه؟
بجد مكنتش فاهم
كنت بقول لنفسى الريس زود اهوه يبقى نعمل اضراب ليه؟
الان بقول احنا ساكتين لييييييييييييييه؟
كمان عاوز اقول حاجه
يا مبارك مش كل الشعب موظفين انت ناسى ان العوطليه بالكوم ؟
انت ناسى ان كتير مننا على باب الله ؟
هيجيب منين بقى ؟ اللى ملوش اى دخل و المواصلات زادت اهه
هناك ٢٠ تعليقًا:
وكده يا مارو انت جاوبت على البوست السابق
وبعدين الموارد حتكفي ندعم الغاز لإسرائيل والبنزين للمواطن،
السلاح للأمن المركزي واللا الرغيف للمواطن
ده غير إن جزء كبير من الموارد بيهدر في العمولات، وإعلانات التهاني والتبريكات للمسؤولين
عرفت لماذا كان الإضراب؟؟
تحياتي
مارو حبيبي
دي البداية بس
بداية الزيادة الفظيعة في كل حاجة , قريباً هاتلاقي الحاجة هتزيد 200 في الميه و 300 الميه
ده زعيم عصابة مش رئيس جمههورية
واستنى باقي المصايب تباعاً بقي
بجد انا دمي محروق وهموت من الغيظ
فرحت وقلت اهم بقي عندهم دم وحسوا بينا شويتين
قلب رفررف وقلت خلاص نقول من قلبنا للريس هابي بيرث داي
لكن جايز لاني مش بفهم سياسة صح
ولا العابها القذرة صدقت
لاء وما تخيلتش انهم يغدروا بالسرعة ديه
هما بالغباء للدرجة ديه
يهدونا
وبمسافة يوم
يولعونا تاني
ااقول ايه
طبعا مش كل الشعب موظفين
انا بحكي لامي
لاقيتها بتقولي حكاية قطعت قلبي
سيدة عجوزة عندها كشك صغير لاقيتها واقفة في طابور واحد بيوزع لحمة
قالتلها ياحاجة ما انتي عندك محلك سيبيه للغلابة
قالتلها محلي بيجيبلي الدوا بالعافية
تعمل ايه الست ديه وغيرها وغيرها
ماهي الزيادة علي الموظفين ومش هتقضي
لكن الغلاء علي الجميع بلا استثناء
لو ده حصل بجد بجد
لازم ننادي بحملة كبري لمقاطعة عامة وشاملة لكل البضائع والسلع اللي هتغلا
كفاية بقي
مش هنسمح لهم يلعبوا بينا اكتر من كدة
وبدعو من عندك كل مدون انه ينادي بمقاطعة السلع اللي غلوها
ابسط حقوقنا
عاوزين نعيييييييييييييش
بكرامة
اسفة للاطالة
بس محروقة بجد
مارو
احنا الشعب الطيب
وهيفضل طول عمره طيب وغلبان
احنا فرحنا بالتلاتين فى الميه زياده
ونسينا اذا الحكومه عطت حاجه باليمين هتاخدها بالشمال
كمان زى م قوت
م فكرناش حتى ان الزياده دى هتعود برده على الكبار
حتى لو منهم موظف صغير
مش كل الناس موظفين
احنا كنا عاوزين الاسعار تقل عشان نقدر نعيش
وحكومتنا رافضه دا
السؤال دلوقتى هنعمل اىىىىىىىىىىى
شفت يامارو
ياعم مارو احنا فى دوله رأسماليه
معاك فلوس تدوس
ممعكشى تتاكل من الوحوش
فعلا انت كده جاوبت عن التدوينة اللي فاتت، ولسه كل السلع هتغلى طبعا بسبب أو بدون سبب بحجة ارتفاع اسعار الوقود
علي اساس انه بيحس وحاسس بالشعب يعني
لنا الله
علي فكرة يا مارو اللعبة دي قديمة ومحفوظة من ايام عبد الناصر دول حتي كانوا بيدرسوهالنا في الكلية
معروفة يوم عيد العمال يقول العلاوة كام في المية والأسعار تزيد الضعف واطبع ياعم البنك المركزي فلوس وزود التضخم ونزل في القوة الأقتصادية للعملة واضرب في الأقتصاد واكوي الناس بالغلا وحسب الله ونعم الوكيل
اهه البنزين غلى علشان خاطر التلاتين فى الميه دى ..احنا عاوزين اضراب تانى يا جماعة
هى البلد دى موش نافعة من اى حاجة المفروض الواحد يهج
انت غلطان فى حاجة يامارو مش ياخدو الزيادة بس لا خليهم ياخدو العيال يااكلوهم ويشاربوهم ويروحوا بيهم مستشفى حكومى ويدفعوا فلوس دروس ويجبوا لبس ليهم ويدفعوا فلوس الجمعية والايجار والنور.....اقولك خليهم ياخدو اسرة مصرية لمدة شهر... ويعملوا الى قولتلك علية وشوف هيدفعوا كام .....اقولك حاجة احلى خليهم يرموا علينا قنبلة ونخلص.....اففففففففففف......خلاص فيشت غلى..شكرا على المساحة الفش دى......وياريت تبقى تعدى عندى فى المدونة فش انت كمان افففففففف.....استريحت
مش هقدر أقول غير.. مش عاوزين ... ومش عاوزينك كمان... لا انت ولا الزياده
حاجه تحرق الدم بجد
ربنا يريحنا من اللي احنا فيه
مفروسه اوي انا
حزلووووقه بتفكر تتحزلق وتقلب الدنيا
لكن يلا خلينا ساكتين نديله فرصه اخيره
:(((((
اخى الفاضل
محمد
انا زعلان منك كنت ماشى كويس وجيت فى الاخر وخرمت منك!!ليه بقى يا سيدى
انت بتقول
فيه ناس كتير على باب الله
طيب عاوز تسيب باب الله وتروح على باب حسنى خليك على باب الله احسن واكيد ربنا مش هينساكوا بس سيبونا ننتظر اول الشهر يمكن نفرح بالكام جنيه لعلمك ولادى طالبوا بعلاوة مصروف من قبل ما نقبض ؟ شفت الورطة
انا كنت زيك بالظبط ...
كنت بقول ليه هنعمل اضراب ..
بس مفهمتش الا دلوقتي ... ليه الزياده دي ..
زود 30 زخادم 50 في الموصلات .. كله غلي..
حبه كدا وهيغلوا الهوا اللي بنتنفسوا .. يقولك كفايه عليك نفسين في الدقيقه ههههههه
تقبل مروري مارو وتم اضافه مدونتك الي مدونتي http://halitro7.blogspot
حتي تعرف اننا شعب قد نبيع ابائنا في لحظة من اجل رغيف الخبز وحفنة من المال وبعد ان تضحك علينا السلطة تاخذها منا اكثر مما اعطتها لنا
ادعوك لزيارة مدونتي واتمني التواصل الدائم بيننا
فينك ياولد
غطسان ليه
العلاوة
ههههههههههههه
دى كل الناس دفعتها قبل ماتاخدها
أه والله مش مبالفة
ده بجد
دفعتها فى مواصلات وأكل وسرب قبل ماتطبق أصلا
والحمد لله يامارو إنك عرفت إضراب 4/ 5 كان ليه
تحياتى
انا اظن انك فى بوستك
جاوبت عن سؤالك السابق
هوا اضراب 4\5 ليه
:D
بس فكره البوست حلوه
تحياتى
موضوع الزيادة ده كان لمجرد تهدئة الوضع
الناس ثايرة والشارع غضبان
ياجماعة حنزود ثلاتين في المية بحالهم
والشعب اهبل
الحمد لله الازمة اتحلت
تاني يوم
حنزود البنزين شوية يا جدعان
بنسبة كده مش حتزيد عن الضعف
البنزين
ههههههههههههه
يعني كده كل حاجة حتزيد الضعف
البنزين غلي
يبقي المواصلات غلت
يبقي نقل الاكل زاد وبالتالي كل السلع الغذائية غلت
وبما ان كل حاجة غلت
الحاجة اللي مافيش سبب يغليها
حتقول اشمعني انا بقي
وحيكون الحال يا جدعان زي دلوقتي بالضبط
وبكده نبقي هدينا الشعب الفترة دي
وضربناهم علي قفاهم
سلاماتي
إرسال تعليق