الجمعة، 2 مايو، 2008

سؤال :هو اضراب 4/5 ده ليييييييه ؟

بجد ان مش عارف و متحير اوى و عاوز حد يفهمنى

انا عاوز افهم هو الاضراب اللى جاى ليه ؟

مش مطالبنا زياده الاسعار و القضاء على الغلاء ؟

الراجل اهو كتر خيره و ربنا يعمر بيته و يوسع خزاينه اهو اتكرم علينا و زود المرتبات 30% انا عارف انهم مش كفايه
بس اهو زى ما بيقول امكانياتنا
مش كده و بس ده المفروض الزياده تكون من اول 7 قال لاء الزياده من الشهر ده


كمان جهاز حمايه المستهلك بيحذر التجار من غلاء الاسعار مع زياده المرتبات و قال هيكون فى عقوبات رادعه
فبجد مش فاهم

بس ياريت دعاة المؤامرات اللى هيقولوا دى لعبه و كلام فاضى يحسسنى ان الحكومه عاوزه تموتنا مش عاوزه تريحنا
بلاش من ده انا عاوز كلام موضوعى و كلام يقنع

وانا مستعد للاقتناع

محدش يفهم انى حولت وطنى او حاجه انا بس عاوز افهم الهدف ايه بعد الزيادات دى

هناك 27 تعليقًا:

Ahmed Douma يقول...

أقولك انا بقى يا سيدي
انا عن نفسي بدعوا لاضراب 4 مايو ده ولا علشان زيادة أسعار ولا علشان غلا ....ولا اي حاجه من دي .,
ال\إضراب ده بالنسبه لي عبارة عن دعوة لإسقاط نظام
يبعني انت لو بصيت للموضوع هتلاقي الزياده دي ما تعملش أي حاجه
احنا لو عاوزين تغيير بجد ....هنحتاج مش اقل من 150 او 200% زياده على المرتبات ..وده بإحصائيات اقتصادية مش كلام وخلاص .
وبعدين ازمتنا مش في انهم يزودوا مرتبات او ينقصوها .... المرتبات هتزيد 30% الأسعار هتزيد 100%
يا مارو
النظام ده معتش ينفع يحكم مصر مهما عمل .

سارة يقول...

مارو باشا
اولا سلامات طيبون وازيك وفينك وخلافه
ثانيا نيجى بقى لموضوع الاضراب

بالنسبة ل 30 % زيادة فهما بالظبط زى كل الزيادات اللى قبل كدة
وبعدين العبرة مش باخد كام العبرة الكام ده هيجيبلى ايه
او اللى بيسميه رجال الاقتصاد الدخل الحقيقى
كمان ال 30 % نزل فى الصحف القومية النهاردة انها على اساسى المرتب وكلام تانى انها عالدرجات يعنى من الاخر هتطلع زيادة هزلية
اما جهاز حماية المستهلك فمع احترامى جداا لكن كل اللى عمله من يوم ماعملوه انه بعت رسايل موبايل اطلب فاتورتك احفظ حقك
لا شاف الجهاز ده اللى بيأكلونا لحم حمير ولا شاف اللى غلوا الاسعار اكتر من 3 اضعاف فى كام شهر

محمد مارو يقول...

دومه باشا

لو على اسقاط النظام يبقى نعلن من ادافنا اسقاط النظام

مش نقول اسعار و غلاء
و يكون فى هدف عمره ما هيتحقق اصلا

الا لو كلنا وقفنا مع بعض و قولنا بعلو الصوت يسقط النظام مش نستخبى وراء شعارات اخرى

كمان انا عارف ان التضخم 200% و انا قولت ان الزياده مش هتعمل حاجه
بس هيعملوا ايه؟

محمد مارو يقول...

طيب ساره الهدف يكون ايه الان ؟

يورو يقول...

ماروووو

قرار سيادته يعمر بيته ويطول
عمره بزيادتة المرتبات 30 % قرار سياسى مش اقتصادى
يعنى هو جاى فى الوقت دا بالذات ويتكرم علينا ويزود المرتبات
بعدين بفرض ان مع زيادة الاسعار المرتبات زادت
هو يعنى كل الناس موظفين
الناس الى بقت بتتحايل على المعيشه دى وعايشه تحت الارض ملهاش وجود
ولا هو انا ادور على الى يضرنى واتغدى بيه قبل م يتعشى بيا

انا مع الاضراب وان كان هدفه مش بس عشان الغلا عشان يوصل الرساله ان الناس هتطلب حقها وهتتجمع تحت رايه واحده

سارة يقول...

الهدف مش اتغير كتير يا مارو
بالنسبة للناس المحروقة من الغلا
رفع الاججور وربط الاجر بالاسعار
وبالنسبة لى انا
ربطط مشاكل الناس بمشاكل النظام وانهم يعرفوا ان مشاكلهم نابعة من فساد النظام
والقضاء على سبب كل دده
من اول الغلا والبطالة لحد حصار غزة
عارفه طبعا
مبارك ونظامه

مدحت محمد يقول...

انت كلامك صح يامارو
بس التهديد بالاضراب ضغط على الحكومة
والاضراب اللى فات برضه
فللاضراب اهمية
بس هيكون ليه
اضراب 4/5
بعد مالحكومة ابدت حسن النية فى موضوع الاسعار؟
ده السؤال
هيبقى اضراب مش عشان غلو الاسعار كدة
ده هيكون عشان حاجة تانية خالص
وسلملى على العصايا
تحياتى

بنت الاسلام يقول...

مارو العزيز

في ناس اتعودت تعارض لمجرد المعارضة

وفي ناس بترفض انها تعترف ابدا بخطوة

ايجابية اتخدها الجانب الاخر


وانا بتساءل

ليه حولنا قضايا اوطانا لمجموعة صراعات


الحكومة تتصيد للمعارضة

والمعارضة تتصيد للحكومة

اصبحت لعبة صياد وفريسة

لست ادري من سيدفع تمن هذه اللعبة

سوانا

لماذا لانعترف مثلا بان حديث الريس

واعلانه الزيادة خطوة يشكر عليها

قد لاتكون كفيلة بحل كافة المشاكل

ولكن لانستطيع ان ننكر انها مبادرة

جيدة وخطوة يشتاق اليها الشعب


عزيزي من الانصاف حقا ان نكون منصفين

في حكمنا علي الاخرين اعداءنا قبل

اصدقاءنا

لاننكر مساويء النظام التي لاتعد ولا تحصي

والتي نتمني ان تزول يوما ما

ولكن من حقه ايضا ان نفرد مساحة

للاشادة ولو بموقف واحد


انا مع الاضراب السلمي الحضاري

لاعلان استياءنا من الاوضاع السيئة في

البلد

والتي لا اعتقد انها تتلخص في الغلاء فقط

وايضا احيي الرئيس مبارك علي

قراره برفع الرواتب

ودعونا لانحكم علي قراره بالفشل

قبل ان يتحقق فعلا

ناسف للاطالة

تحياتي

كريم عاطف يقول...

الأخ الكريم هدف الإضراب هو التغيير وشوية البنج اللي بيحطهم فخامته للناس كل سنة ماعادوش ينفعوا فالعملية بتمشي بالتدريج يعني الهدف هو ضرب الفساد والسيطرة على الأسعار وتحسين مستوى المعيشة ومادامت جميع الحكومات اللي عينها فخامته ماعملتش حاجة من سبعة وعشرين سنة والبلد متأخرة علميا واقتصاديا وسياسيا والحالة ما يعلم بيها الا ربنا يبقى الهدف هو تغيير النظام بأكمله

مصطفى محمود يقول...

ياريس التلاتين فى المية على اساسى المرتب يعنى توصل ل40 جنية و60 جنية فقط ..فهمت !! يعنى اشتغالالت وتهدئة يعمونا

hekaytna يقول...

والله يا مارو انا اصلا ضد الاضرب لانه مبيعملش حاجه بنعمل اللي بنعمله وكل شيء زي ما هو
تحياتي علاء

Nour-Gedeed يقول...

السلام عليكم
طبعا ازداد شرفا بدخولي عند حضرتك
شوف يا فندم
رأئي بمنتهى الساطة و اللي قولته قبل كده
اننا لو بنتكلم عن ريس اول مرة يعيش مع الشعب ده و لا ملهوش خبرة
يبقى كتر خيره و الله و نبوس ايديه و رجليه
بس حضرتك احنا بنكلم في مدة لو بأبسط الحسابات المفروض كنا وصلنا خلالها مصر يعني .. لريادة العالم
كنا قليله بقينا بنصدر العيش اللي الناس بتموت عليه دلوقتي
يا فندم الفكرة مش فكرة عيش و لا خمسين .. ستين جنيههيضافوا على المرتب
الفكرة فكرة حال بلد و سياسة بلد
و هو ده اللي المفروض نفهمه للناس
لأن في النهاية الاضراب مش هو الحل الأمثل .. معاه لازم نعمل حلول تانية كتيرة بس احنا نحاول
=============================
معذرة عندي تعليق على تدوينة جماعة الاخوان مكسوف لكم سلف
مبدأيا انا قرأتها مرتين عشان افهم ايه وجه اعتراض حضرتك على مشاركتهم او ليه يعني مكسوف لهم
كمان مشاركتهم ملهاش علاقة بمصالحهم الشخصية
الا لو كان قصد حضرتك انهم هيضربوا عشان الظلم اللي وقع في المحاكمات العسكرية
فساعتها بأه
هقول لحضرتك ان ساعة المحاكمات دي
طلبة الأزهر و عموما طلاب الاخوان في الجامعات بدأوا يعملوا مظاهرات و حاجات زي كده
فنزل قرار من المرشد العام بوقف كل الكلام ده
يعني لو المصلحة الشخصية هي الأصل كان
سابهم و تولع بأه
او اصلا كنا شفناهم اثناء المحاكمات نفسها يعني مولعين الدنيا
الاعلام هو اللي كان مولعها
واهالي الناس المحبوسة و ده حقهم كانوا اخوان و لا وطني
و على فكرة متفهمش من كلامي اني بدافع كده وخلاص
بجد و الله توضيح للصورة مش اكتر و ممكن اكون غلطانة برده
و معذرة جداااااااا على الاطالة

محمد مارو يقول...

نور جديد
اولا اهلا بك فى مدونتى

ثانيا
انا معاك جدا جدا جدا فى الجزء الاول الخاص بالاضراب و البوست الحالى و معاك جدا جدا

ثالثا بخصوص الاخوان مكسوف لكم سلف
انا طبعا مش قولت خالص انهم هيضربوا على شان المحاكمات
و لا هقول كده
انا بقول عن احتماليه صفقه بينهم و بين السلطه و فشلت فبناء عليه هما هينضموا لصفوف الشعب
اما بخصوص قرار المرشد فهو لو مكنش عمل كده مكنش هيكون و لا اخ من الاخوان فى الجامعه الان
هو قال كده على شان مصلحتهم برده

محمد مارو يقول...

علاء
ازاى و مين قال ان الاضراب مبيعملش حاجه؟

مين قال كده ؟

لو مبيعملش مكنتش الحكومه خايفه اوى كده

محمد مارو يقول...

مصطفى
ما اى زياده بتكون على اساس المرتب امال عوزها على اساس ايه؟

محمد مارو يقول...

كريم
لو هدف الاضراب كده يبقى نعلنه واضح اضراب من اجل اسقاط الحكومه

محمد مارو يقول...

كريم
لو هدف الاضراب كده يبقى نعلنه واضح اضراب من اجل اسقاط الحكومه

محمد مارو يقول...

بطه
احلى ردين وصلونى رد يارا و سلمى و فيهم كل حاجه مقنعه

محمد مارو يقول...

مدحت
هههههههههه العصايه مش عندى دى عند حماده يا ولد

محمد مارو يقول...

ساره
كلاكيت تانى مره
لو ده الهدف يبقى نعلنه و نقول اضراب من اجل كذا و كذا و كذا

حمادة زيدان يقول...

حبيبي مارو
كلامك طلع في التمام والاضراب فشل ونجح مبارك , وعرف ازاى يضحك علينا
ربنا يستر في الجاى يا مارو
والعصاية مش عندى دي عندك يا ولد

بحبك يامصر يقول...

يا ماروو
الاضراب لتصحيح الاوضاع يعنى بالبلدى الحال المايل من فساد ورشاوى وظلم فى اقسام الشرطه كله كله احنا هنعد ايه ولا ايه
احنا عايزين تغيير للنظام

ابن الإسلام يقول...

الحمدلله انك اقتنعت بالإضراب .. أهم حاجة يكون إقتناع بالمبدأ وليس له علاقة بالنتائج!!!!!!!!

حزلووووقه يقول...

علشان الظلم يامحمد

انا معرفش علشان ايه

بس ان شاء الله اما حزلووووقه تكبر وتفكر تضرب هيبقي علشان الظلم


سلامي

حزلووووقه يقول...

ايه يامحمد ده


انت مفهمتش حزلووووقه

ليه كده بس

بص يامحمد

انا بكتب قصه
المدونه الطويله العريضه كلها بتقوم علي قصه


يمكن بكتب فيها الحاجات اللي ممكن اكتب فيها ملايين المواضيع وميوصلش رسالتها ولا مضمونها


فاهمني

مش حزلووووقه اللي حصل معاها كده



حزلووووقه محدش يعاكسها ابدااااااااااا


:))))))))))))


سلامي وشكرا لردك

هيثم الدهشان يقول...

مارو
انت بتحكى فى ايه هيا القصة انه زود الدخل 30% ما التجار يابنى بياخدوهم 200% وبعدين فين جهاز حماية المستهلك ده
تحياتى

كيكى يقول...

انت فين...يلا اكتب عايزة افيش غلى تانى