الثلاثاء، ٦ مايو ٢٠٠٨

خدوا الزياده مش عوزنها

زودوا المرتبات 30% الشعب الغلبان و المطحون فرح ياعينى
يا شعب متفرحش اوى كده
اهو زود المحروقات 40% ابسط ياعم
رساله لمبارك بقى
يا مبارك فى مصرنا الحبيبه
ناس مرتبها 300 جنيه و ناس تانيه مرتبها 3000 جنيه
اللى بياخد 300 جنيه زاد ووصل مرتبه الى 390 جنيه
و اللى بياخد 3000 جنيه و صل مرتبه الى 3300 يعنى زاد 300 جنيه يعنى مرتب واحد من الغلابه
يعنى برده هما اللى كسبانين برده
و فى الاخر ترجع و تقول عاوز موارد للبلد
يا مبارك اللى تعبانين الناس الغلابه اللى بياخدوا 100 و 200 و 300 جنيه
لكن اصحابك ووزرائك و رجالك و الحاشيه بتاعك مش تعبانين فى حاجه
بدل ما تبحث عن موارد
اولا بطلوا سرقه فى البلد
ثانيا ممكن اوى تخلى الزياده دى للى مرتبهم تحت ال 500 جنيه و اللى فوق ال 500 يكون لهم نسبه تانيه و اللى فوق ال 1000 نسبه تالته و هكذا
على شان نقرب الشعب من بعضه
و نقلل الهوه الكبيره اوى دى
من الاخر يا عم
مش عاوزين الزياده بتاعك دى خدها و سبنا فى حالنا مدام احنا اللى بننضر و الكبار اللى بيستفيدوا
ملحوظه
انا كنت كاتب موضوع بقول هو اضراب 4/5 ده ليه؟
بجد مكنتش فاهم
كنت بقول لنفسى الريس زود اهوه يبقى نعمل اضراب ليه؟
الان بقول احنا ساكتين لييييييييييييييه؟
كمان عاوز اقول حاجه
يا مبارك مش كل الشعب موظفين انت ناسى ان العوطليه بالكوم ؟
انت ناسى ان كتير مننا على باب الله ؟
هيجيب منين بقى ؟ اللى ملوش اى دخل و المواصلات زادت اهه

هناك ٢٠ تعليقًا:

حسن مدني يقول...

وكده يا مارو انت جاوبت على البوست السابق

وبعدين الموارد حتكفي ندعم الغاز لإسرائيل والبنزين للمواطن،
السلاح للأمن المركزي واللا الرغيف للمواطن
ده غير إن جزء كبير من الموارد بيهدر في العمولات، وإعلانات التهاني والتبريكات للمسؤولين

عرفت لماذا كان الإضراب؟؟

تحياتي

حمادة زيدان يقول...

مارو حبيبي
دي البداية بس
بداية الزيادة الفظيعة في كل حاجة , قريباً هاتلاقي الحاجة هتزيد 200 في الميه و 300 الميه
ده زعيم عصابة مش رئيس جمههورية
واستنى باقي المصايب تباعاً بقي

بنت الاسلام يقول...

بجد انا دمي محروق وهموت من الغيظ

فرحت وقلت اهم بقي عندهم دم وحسوا بينا شويتين

قلب رفررف وقلت خلاص نقول من قلبنا للريس هابي بيرث داي

لكن جايز لاني مش بفهم سياسة صح

ولا العابها القذرة صدقت

لاء وما تخيلتش انهم يغدروا بالسرعة ديه

هما بالغباء للدرجة ديه

يهدونا

وبمسافة يوم

يولعونا تاني

ااقول ايه

طبعا مش كل الشعب موظفين

انا بحكي لامي

لاقيتها بتقولي حكاية قطعت قلبي

سيدة عجوزة عندها كشك صغير لاقيتها واقفة في طابور واحد بيوزع لحمة

قالتلها ياحاجة ما انتي عندك محلك سيبيه للغلابة

قالتلها محلي بيجيبلي الدوا بالعافية

تعمل ايه الست ديه وغيرها وغيرها

ماهي الزيادة علي الموظفين ومش هتقضي

لكن الغلاء علي الجميع بلا استثناء

لو ده حصل بجد بجد

لازم ننادي بحملة كبري لمقاطعة عامة وشاملة لكل البضائع والسلع اللي هتغلا

كفاية بقي

مش هنسمح لهم يلعبوا بينا اكتر من كدة

وبدعو من عندك كل مدون انه ينادي بمقاطعة السلع اللي غلوها

ابسط حقوقنا

عاوزين نعيييييييييييييش

بكرامة

اسفة للاطالة

بس محروقة بجد

يورو يقول...

مارو
احنا الشعب الطيب
وهيفضل طول عمره طيب وغلبان

احنا فرحنا بالتلاتين فى الميه زياده
ونسينا اذا الحكومه عطت حاجه باليمين هتاخدها بالشمال
كمان زى م قوت
م فكرناش حتى ان الزياده دى هتعود برده على الكبار

حتى لو منهم موظف صغير
مش كل الناس موظفين
احنا كنا عاوزين الاسعار تقل عشان نقدر نعيش
وحكومتنا رافضه دا

السؤال دلوقتى هنعمل اىىىىىىىىىىى

mohammed alsha3r يقول...

شفت يامارو

ياعم مارو احنا فى دوله رأسماليه

معاك فلوس تدوس

ممعكشى تتاكل من الوحوش

كريم عاطف يقول...

فعلا انت كده جاوبت عن التدوينة اللي فاتت، ولسه كل السلع هتغلى طبعا بسبب أو بدون سبب بحجة ارتفاع اسعار الوقود

مـحـمـد مـفـيـد يقول...

علي اساس انه بيحس وحاسس بالشعب يعني
لنا الله

ميرا ( وومن ) يقول...

علي فكرة يا مارو اللعبة دي قديمة ومحفوظة من ايام عبد الناصر دول حتي كانوا بيدرسوهالنا في الكلية
معروفة يوم عيد العمال يقول العلاوة كام في المية والأسعار تزيد الضعف واطبع ياعم البنك المركزي فلوس وزود التضخم ونزل في القوة الأقتصادية للعملة واضرب في الأقتصاد واكوي الناس بالغلا وحسب الله ونعم الوكيل

غير معرف يقول...

اهه البنزين غلى علشان خاطر التلاتين فى الميه دى ..احنا عاوزين اضراب تانى يا جماعة

MATRIX يقول...

هى البلد دى موش نافعة من اى حاجة المفروض الواحد يهج

كيكى عوووووو يقول...

انت غلطان فى حاجة يامارو مش ياخدو الزيادة بس لا خليهم ياخدو العيال يااكلوهم ويشاربوهم ويروحوا بيهم مستشفى حكومى ويدفعوا فلوس دروس ويجبوا لبس ليهم ويدفعوا فلوس الجمعية والايجار والنور.....اقولك خليهم ياخدو اسرة مصرية لمدة شهر... ويعملوا الى قولتلك علية وشوف هيدفعوا كام .....اقولك حاجة احلى خليهم يرموا علينا قنبلة ونخلص.....اففففففففففف......خلاص فيشت غلى..شكرا على المساحة الفش دى......وياريت تبقى تعدى عندى فى المدونة فش انت كمان افففففففف.....استريحت

عمرو عبد الباري يقول...

مش هقدر أقول غير.. مش عاوزين ... ومش عاوزينك كمان... لا انت ولا الزياده

حزلووووقه يقول...

حاجه تحرق الدم بجد


ربنا يريحنا من اللي احنا فيه

مفروسه اوي انا


حزلووووقه بتفكر تتحزلق وتقلب الدنيا

لكن يلا خلينا ساكتين نديله فرصه اخيره
:(((((

Unknown يقول...

اخى الفاضل

محمد

انا زعلان منك كنت ماشى كويس وجيت فى الاخر وخرمت منك!!ليه بقى يا سيدى
انت بتقول
فيه ناس كتير على باب الله
طيب عاوز تسيب باب الله وتروح على باب حسنى خليك على باب الله احسن واكيد ربنا مش هينساكوا بس سيبونا ننتظر اول الشهر يمكن نفرح بالكام جنيه لعلمك ولادى طالبوا بعلاوة مصروف من قبل ما نقبض ؟ شفت الورطة

Dr-Ahmed يقول...

انا كنت زيك بالظبط ...

كنت بقول ليه هنعمل اضراب ..

بس مفهمتش الا دلوقتي ... ليه الزياده دي ..

زود 30 زخادم 50 في الموصلات .. كله غلي..

حبه كدا وهيغلوا الهوا اللي بنتنفسوا .. يقولك كفايه عليك نفسين في الدقيقه ههههههه

تقبل مروري مارو وتم اضافه مدونتك الي مدونتي http://halitro7.blogspot

ابراهيم يقول...

حتي تعرف اننا شعب قد نبيع ابائنا في لحظة من اجل رغيف الخبز وحفنة من المال وبعد ان تضحك علينا السلطة تاخذها منا اكثر مما اعطتها لنا
ادعوك لزيارة مدونتي واتمني التواصل الدائم بيننا

mohammed alsha3r يقول...

فينك ياولد
غطسان ليه

المنسى يقول...

العلاوة
ههههههههههههه
دى كل الناس دفعتها قبل ماتاخدها
أه والله مش مبالفة
ده بجد
دفعتها فى مواصلات وأكل وسرب قبل ماتطبق أصلا
والحمد لله يامارو إنك عرفت إضراب 4/ 5 كان ليه
تحياتى

Hosam Yahia حسام يحيى يقول...

انا اظن انك فى بوستك

جاوبت عن سؤالك السابق

هوا اضراب 4\5 ليه

:D

بس فكره البوست حلوه

تحياتى

el_assel يقول...

موضوع الزيادة ده كان لمجرد تهدئة الوضع
الناس ثايرة والشارع غضبان
ياجماعة حنزود ثلاتين في المية بحالهم

والشعب اهبل
الحمد لله الازمة اتحلت

تاني يوم
حنزود البنزين شوية يا جدعان
بنسبة كده مش حتزيد عن الضعف


البنزين
ههههههههههههه

يعني كده كل حاجة حتزيد الضعف

البنزين غلي
يبقي المواصلات غلت
يبقي نقل الاكل زاد وبالتالي كل السلع الغذائية غلت
وبما ان كل حاجة غلت
الحاجة اللي مافيش سبب يغليها
حتقول اشمعني انا بقي


وحيكون الحال يا جدعان زي دلوقتي بالضبط
وبكده نبقي هدينا الشعب الفترة دي
وضربناهم علي قفاهم





سلاماتي