السبت، 5 أبريل، 2008

رغيف العيش اهم من المحليات يا فضيله المرشد العام

طبعا لا اخفى مدى حزنى لموقف جماعه من اشد الجماعات حبا الى قلبى
و هو موقف جماعه الاخوان المسلمين من الاضراب و من الاعتصام
و احب اقول يا سياده و يا فضيله المرشد العام اعتقد ان القرار ده بسبب انشغالكم فى المحليات و لولا المحليات
لكنتم معنا لحظه بلحظه
زى ما كنتم مع عمال غزل المحله فى اضرابهم و زى ما كنتم مع موظفى الضرائب العقاريه
بس احب اقول برده
احنا لسنا فى دوله ديمقراطيه على شان تنشغلوا بالسياسه عن حياة الناس
و معروف ان نتيجه الانتخابات لصالح الحزب الوطنى
و مش معنى كده انى بقول نياس او حاجه لا قدر الله
سيروا على خطاكم
و كملوا دوركم لكن بعد اما نجيب لقمه العيش
و بقول لفضيله المرشد
رغيف العيش اهم من المحليات
و مش عارف فوضى ايه اللى تقصدوها
مع ان الرسول صلى الله عليه و سلم قال
كلمه حق فى وجه حاكم ظالم جهاد فى سبيل الله
صدق رسول الله صلى الله عليه و سلم
كلمه الحق دى احنا بننادى الكل يقولها مع بعضه
ازاى جماعه بتتكلم بالاسلام و مش بتقول كلمه الحق دى ؟
اعتقد انه قد خالفكم كثير من الصواب للاسف بالقرار ده

هناك 20 تعليقًا:

elbostagy2 يقول...

رأيك طبعا له كامل الاحترام يا مارو .. وانت عارف كده :)
خلينا نتكلم من زاوية تانية ،،،

هو أي حد يطلع يقول يللا بينا نمشي وراه ؟؟؟
يعني خلينا نسأل شوية أسئلة ...

ايه الهدف من فاعليات اليوم ده ؟
هل الدفاع عن العمال ،، وعلى فكره ده في البدايه خالص كان الهدف
اضراب لعمال المحلة واشترك معهمعمال كفر الدوار
وقال عدد من المدونين ان هما هيشاركوهم بالجلوس في البيت والاضراب عن العمل أو الدراسه

تاني يوم لقينا واحد باعت أماكن الاعتصام
طيب هو فيه فرق بين الاعتصام والاضراب يا عمو ،،،

تالت يوم لقينا اللي بيتكلم عن غلاء الأسعار وانقلب الأمر الى عصيان مدني !!

والله لما نعرف مراحل العصيان المدني وتبعاته ودرجاته ونخطط له صح
أنا معاك

لكن كلام يجيب كلام
يبجيب كلام
من غير نظام

يبقى لا ،،

جماعه بحجم جماعة الاخوان لما تنزل الشارع وتعلن عن عصيان مدني بدون حسابات هتتقلب لنار ،،
معلش يعني هو مين المسئول عن الفاعليات في اليوم ده

أيوه يعني مين المتحدث عنهم علشان نسأله أو علشان يدعي الناس والجماعات ؟
ماحدش .. أي رساله بتيجي على الميل بناخدها على انها خلاص أمر غير قابل لنقاش ونعمل لها " فوروارد "
واهي ماشيه وبتنتشر ،،،

انا مع الاضراب ومع أية فاعليات نرى فيها مصلحة الوطن
لكن ما يحدث ويجري ليس الا " تنفيس كبت "

جميل أن نرى هذا التفاعل .. لكنه حتى الآن من وجهة نظري لا يعدو كونه انفعال وقتي لا تعقلي

ممكن نكون بنظن ان كل الناس متفاعله !!
مش معنى اني متفاعل وحاسس بالأمر ان كل الناس زيي
أو ان كل الناس مستعده للمواجهه

المفروض يكون فيه لجان دراسة جدوى وبحث علشان تحدد الكلام ده
وهذا ما لم نره حتى اللحظه

الأمر أكبر من ذلك
أتمنى لو نتعمق بالبحث فيه بعيدا عن العواطف :)

محمد مارو يقول...

بوسطجى
اسمحلى ارد على نقطه نقطه

اولا انت بتقول ايه الهدف من اليوم ده
ارد و اقول الهدف هو السعى لحياة حره كريمه لكل المواطنين

و لا انت عجباك اللى انتحروا و اللى بينتحروا بسبب عدم القدره على شراء ازازة زيت
ه هو الهدف و ان اختلفت الصياغات حوله

اما بالنسبه لمراحل تطوره
احب اقولك حتى لو كان الكلام ده صح ووصل فى النهايه الى عصيان مدنى بسبب يق الحال كان واجب على جماعه زى جماعه الاخوان المشاركه حفاظا على الشعب م اكتر

انت بتقول مين المسؤل عن العصيان ده؟
اقولك لو كلنا كنا مسولين
و كلنا اد المسؤليه الاعتصام هينجح

و لو مفي مسؤل فيها ايه برده لما تتحمل هى المسؤليه بما انها جماعه بتسعى للحياة الكريمه للمواطن
فيها ايه لما تاخد الفكره و تنظمها هى مدام بتتكلم عن العب و بتقول مصلحه العب عندها فوق اى اعتبار

و بالرغم من ده اقولك كافه القوى الوطنيه اعلنت المسؤليه

بتقول انه كلام انفعالى و تنفيس غضب ووووووووو


يعنى كمان مش عاوز الناس تتنفس و تغضب ضد الظلم؟

بتطلب دراسه جدوى و بحث للمووع الاول
كنت اظنك هتقولى ان الجماعه هى اللى هتتبنى دراسه الجدوى دى و الجماعه حاولت تنظمها لكن لم يوفقوا

و لا انتم عاوزين تقفوا تتفرجوا و بس و لو نجحت تنضموا الينا زى ما حصل ايام اراب عمال المحله؟

كلام طبعا مخزى و محزن جدا من جماعه زى جماعتكم بتقول انها هدفها مصلحه المواطن

لو كان كده فعلا كنت اعتقد ان المبادره تخرج منكم و لا تنتظروها من احد تانى

انتم كنتم لنا الامل الوحيد فى الخلاص و لكننا نجدكم تتخلوا عنا فى اصعب ظروف للوطن و الحياة الصعبه للمواطنييبن
بقولك الناس بتنتحر كان المفرو7 اول ما المرشد علم بهذا كان نظم هو ها الاعتصام
اا كنتم لا تخافون فى الله لومه لائم و انا اعرف انكم هكذا
لكنى مستغرب موقفكم و الله
و حزيييييييييييييييييييين للتخلى عن الشعب الغلبان

و اللى هيقول هى الاعتصام هيعمل ايه ؟
اقوله وف الاسعار النهارده و امبارح و شوفها من اسبوع
مبارك استجاب و رخص الاسعار بمجرد الاعلان امال لو عملناها

ان شاء الله نقدر نعمل حاجه للعب الغلبان
و ان فشلنا اسمنا عملنا حاجه مش واقفين نتفرج و خلاص و مغولين بانتخابات نتيجتها معروفه من قبل

تقبل تحياتى

appy يقول...

مارو كل الل هقولك لك
بجد مبرراتهم مقتنعتش بيها وعموما عادى موقفتش عليهم
بس المشكله يا خوفى من الاسد بعد الموضوع ده هيعمل ايه فينا

مدحت محمد يقول...

انا بتفق معاك يامارو صراحة
الواحد لما بيقول لا للظلم
بتبقى صرخة
مش عايزة دراسة جدوى
ولو كانت عايزة دراسة جدوى
فانخفاض الاسعار الكام يوم اللى فاتو فعلا
خير دليل
على اهمية الاعتصام
تحياتى ليك

mohammed alsha3r يقول...

العصيان المدنى يامارو مش وقته
شعبك ياعمى مغيب تماما

يعنى انت بتشوف المدونين اللى عاوزين يشاركوا بحماسه

وبتشوف رسايل النت

والاف لاين

وبردوووووووو بنشوف الم الناس فى الشارع

بس تعالى قول لهم هننزل ميدان التحرير علشان هنعمل اعتصام وعصيان مدنى


شوف رد الفعل هيكون ايه

وهتشوف بكره

مين هيشارك

احنا كام مليون

الكل عارف

عاوزين نشوف كام مليون هينزل الشارع

وكام مليون مش هيروح الشغل

وكام مليون مش رايح الجامعه


منتظرين على أحر من الجمر


بس ارجع واقووووووووووول لسه بدررررررررى اووووى على العصيان المدنى

مع حكووووووووومه زى حكومتنا دى

وعلى فكرة انا متوافق معاك وبحترم رايك

ورأى خطأ قد يحتمل الصواب ... ورأى غيرى صواب قد يحتمل الخطأ

walaa يقول...

المهم ان الكل يتحرك ويقول له
المفروض اللى احنا نبقى ايجابين من غيير رأى حد ومن غييير وقفة حد معانا
اللى عايز يتحرك يتحرك وينقذ البلد دى والل مش عايز هو حر
ولو كل البلد تحركت كل الناس هتتحرك بس هى الناس خايفه تتحرك ليه معرفشى
قنى لسه سلبيه اتمنى ان الناس تتحرك بكره نفسى يبقى يوم ثوره فعلا
تحياتى ولاء

بنت الاسلام يقول...

مارو

قد لانختلف اننا جميعا نريد الخير لهذا الوطن

وان كل خطواتنا لاشك نسعي بها لتغيير واقع اليم نشعر به جميعا

ولايزال المشككون والمغرضون واصحاب نظام المؤامرة يتحادثون عن اخلاصنا لا بل وربما يصدرون احكامهم علي الاخرين جزافا وافتراءا

فلا اظن ان الاخوان قد اخطاوا بخوضهم المحليات وما اظن انها خطوة تدينهم فما اغلي علي الانسان من حريته ومع ذلك ضحي الكثير منهم بها في سبيل تحقيق هدف راوه خطوة هامة من خطوات التغيير

اما عدم مشاركتهم رسميا في الاضراب فلعلك تعلم ان قرار الاضراب جاء هكذا ولاول مرة من بيننا نحن الشعب المجرد البعيد كل البعد عن اي تيارات سياسية او احزاب

الاضراب كلمة الشعب وحده لم تعلن جهة ما عن تبنيها له

بل ربما ظل السؤال طارحا نفسه من وراء اضراب 6 ابريل من؟؟؟؟؟؟؟

ومن هنا اتمني ان يظل هكذا باسم الشعب المتألم باسم الشعب المعاني الذي وصل به الحال الي التمني تمني رغيف عيش

ولو سالنا انفسنا من الشعب

فستجد انه يضم الجميع

الجميع

ولا اظن اعتقادي سيخطا لو اعلن الاخوان رسميا مشاركتهم ان بعد اليوم الموعود ستتوالي الاتهامات بنسبة فكرة الاضراب لهم

لذا ليت كل الشعب يشارك

ومرحبا بالجميع

المهم ان تصل الصرخة

صرخة شعب مصر

تحياتي

واسفة للاطالة

محمد مارو يقول...

شااااااااااااااعر
نورت المدونه يا مان

المهم
انت بتقول العصيان المدنى م وقته امال وقته امتى و هنفوق امتى و هنتحرك امتى ؟

لو مش هنفوق فى ازمه زى دى و نطيح بالحكومه هنفوق امتى بس يا عالم؟

ثم تعالى هنا

انت متوقع اننا لما نعلن الاضراب ال 80 مليون هيشاركوا؟
اذا كانت اكبر جماعه رفضت المشاركه عاوز ايه بعد كده؟

دورنا اننا نوعى الناس و نفهم

انا واثق ان موقفكم كان هيتغير لو كان المرشد وافق


نورتنى يا شاعر

محمد مارو يقول...

مدحت
عجبتنى اوى التعليق اللى قولته و الجمله دى
الواحد لما بيقول لا للظلم
بتبقى صرخة
مش عايزة دراسة جدوى

محمد مارو يقول...

يا رب يا ولاء الناس تتحرك

محمد مارو يقول...

بطه
انا م قولت ان غلط انهم يدخلوا المحليات

انا قولت سيروا على بركه الله

بس برده

الانتخابات نتيجتها معلومه و معروفه

و اللى هيجيب المحليات احساس الناس بان الاخوان معاهم

و لا هما اعتمدوا على عددهم و قالوا م عاوزين اصوات من بره ؟

شوقى رجب يقول...

السلام عليكم
اولا انا معك يا مارو فى كل اللى قلته
وردودك بسم الله ما شاء الله
بس عاوز ازود حاجه
اذا كان الاخوان لا يرون 6 ابريل كيوم لمصر ولا يعرفون اهدافه
فليختاروا يوما اخر باى تاريخ واعتقد ان الشعب الان اصبح عنده استعداد للتحرك
اما بالنسبه لعدد المشاركين زى ما قال اخى الشاعر
فاقول له
ان يوم 6 ابريل ان لم يكن يوم العصيان المدنى فهو على الاقل بروفه لهذا اليوم وان هذا اليوم سيكون بدايه للتغيير ( التغيير )مش الاصلاح
واعتقد ان الكل متفق معى على ان نظام مبارك وال مبارك لا امل فى اصلاحه ابدا
واتذكر كلمه للشيخ سيد عسكر قالها فى افطار لجنة التنسيق بالغربيه العام الماضى
: لن ينصلها فليس لهم ارادة واذا ارادوا سيفشلوا لانهم مفسدين

ammar يقول...

بص يامارو
كلامك على العين والراس
ووجهة نظر وتحترم
بس انت غلطت لماوجهت الكلام للمرشد العام
لان ده مش قراره ده قرار الجماعه
و انا وانت لسه طالعين امبارح
يبقى ماينفعش نعلق على قرار
اتخذته جماعة الاخوان المسلمين
واللى هى اكبر فئة سياسيه فى مصر
واكتر جماعه فاهمه البلد واللى بيحصل فيها
موجودين على الساحه من زماااااان
وعارفين الحل هايبقى ازاى
ولو يوم 6 ابريل هايحرر البلد
كانو الاخوان اول ناس شاركت
واحنا عارفين
لان دايما البداية عند الاخوان
وبكره نشوف ياعم مارو
وشىء كويس جدا لما الشعب يعمل اضراب
بس كمان لما الاخوان يشوفو او يقرروا ان الاضراب ده غير مجدى وانهم مش هايشاركو
يبقى ده كلام مظبوط
وماحدش يقدر يشكك فى رأى الجماعه
مش رأى المرشد
ووالله حاجه جميلة منك انك تتحمس للمشاركه
لكن ياعم مارو انت بتتكلم عن جماعه لا انا ولا انت قد اننا نتكلم عنها
والله المستعان
واعرف انى احبك فى الله
ومش زعلان منك فى حاجه

قلم رصاص يقول...

بص يا مارو رأيك علي عينا وراسنا من فوق بس ياريتد لما تقول رأيك ما تغلطشي في حد وخاصة لما تيجي وتغلط في جماعة بحجم وفكر جماعة الاخوان المسلمون أولا زي ما قلتلك قبل كدة انت تعرف مين اللي دعا للاضراب دة ولا اية هي مطالب الاضراب دة ولا مين المتحدث باسم الاضراب دة ولا مين اللي ها يشارك في الاضراب دة ولا في حد منسق لهذا الاضراب
لما تجاوب علي الاسئلة ديت قولي اشارك وعايز اقولك ان الاخوان سمعوزا عن الاضراب دة عن طريق وسائل الاعلام فقط لايعرفوا له اسباب ولا أهداف وازاي تيجي تقول لجماعة زي الاخوان وتعتبر القوي الاولي وأقوي معارضة في البلد تشارك في حاجة زي كدة وموقف الاخوان واضح والاخوان زي ما قال الامين العام للجماعة نحن ضد الفوضي ودة موقف الاخوان يعجبك ما يعجبكاش ديت حاجة ترجعلك بس لو سمحت ما تحاولشي انك تغلط في حد مش ها يشارك في الاضراب مهما كان موقف وربنا يوفق الجميع يا سيدي

غير معرف يقول...
أزال أحد مشرفي المدونة هذا التعليق.
امام الجيل يقول...

هلا وغلا

بس بطلب من حضرتك تقرا المقال ده
اعتقد فيه توضيح لموقف الاخوان من الاضراب وليه

http://www.almesryoon.com/ShowDetailsC.asp?NewID=46900&Page=7&Part=1

جزيت خيرا

حسن مدني يقول...

يا عزيزي مارو

اختيار الإخوان لم يكن بين المحليات والإضراب
الاختيار كان بين المشاركة كجماعة وتبني هذا الإضراب، وبين عدم المشاركة كجماعة.
وعدم المشاركة كجماعة لا يعني أنهم منعوا أفراد الجماعة من المشاركة كمصريين.
أما مسألة الحساب، ودراسة الجدوى فهي مطلوبة في كل نفس، وليس في مجرد صرخة ألم. المطلوب من أي قوة سياسية أن تدرس كل تحركاتها كل أنفاسها. كنت سأعترض بشدة لو أن الإخوان أعلنوا رفضهم للإضراب. أو معارضتهم له. هم قالوا هو من حق أي فئة ومن حق الشعب . ولكن نحن (كجماعة) لن نشارك فيه. ولهم رؤيتهم التي أتفهم أجزاء كبيرة منها وفق فهمي للأمور.
ثم إنني قرأت عن أهداف عديدة لهذا الإضراب. أولها أن نعلن صوتنا، وآخرها تغيير النظام. وبينهما رفع الرواتب، وخفض الأسعار، وتغيير الوزارة..
وأول عوامل النحاج هو تحديد الهدف. فإذا كان الهدف غير محدد أو غير متفق عليه، كان هذا أول الفشل.
بالنسبة للإضراب إذا كان القائمين عليه لديهم أهداف واضحة ومحددة ومتفق عليها فهذا شيء جيد، ومبشر خير. إما إذا كان لكل منهم هدف. فمعنى ذلك أن أول من سيحقق أهدافه، سيخرج من الإضراب. والذي سوف تتأخر اهدافه حيروج السجن منفردا.
الموضوع بالنسبة لجماعة سياسية يحتاج إلى بعض الحسابات، مثل مدى التزام شركائي في التحرك، الخطوات التصعيدية المحتملة، السيناريوهات المتوقعة، لكي لا نصل إلى نقطة لا نريدها، لكي لا نعيش في حالة ردود الأفعال.
وهذه الحسابات مطلوبة من أي جماعة سياسية في الدنيا. بخلاف الجماعات المهنية. التي تحدد مطالبها في مصالح الفئة التي تمثلها بصورة أساسية.

تحياتي

hamsawy يقول...

اضراب 4 مايو اللي جاي هيكون الاهم في تارييخ مصر

غير معرف يقول...

وادى الإضراب حصل و كل الإخوان شاركوا فيه كأفراد بدرجات مختلفة
و آدى اللى حصل فى المحلة
شوفت بقه لو كان الإخوان تبنوا الإضراب و دعوا ليه
كان الحكام و أبواقهم و إعلامهم مالهمش سيرة غير ( تاريخ الجماعة الأسود كما يدعون مقتل النقراشى و الخازندار و تمثيلية المنشية و أحداث المحلة 2008 )
و كان الخسائر هاتبقى فادحة على الجماعة و بدلاً من ذلك اختارت الجماعة أن تفضح هى النظام من خلال فضح القمع فى المحليات و المحلة
ثم ان عصام العريان قالها _ الرسالة وصلت للنظام خلاص _

ريمان يقول...

السلام عليكم ورحمة الله هو فعلا يا مارو عندك حق فى ناس كتير اوى بتنتسب للدين ومش بتقول كلمة حق ابدا