الجمعة، ٢٤ أغسطس ٢٠٠٧

يا جماعه احنا فاهمين الخبر غلط

فى خبر تردد فى كل وكلات الانباء اليوم و لاحظت ان كتير من الاخوه المدونين تناقلوه بلهفه و اهتمام بس للاسف احنا فاهمين غلط
الاول اقول لكم ايه هو الخبر
اخبر بيقول
استدعت وزارة الخارجيه المصريه القائم بالاعمال الكويتيه فى مصر بشان تعذيب المواطنين المصريين فى الكويت
طبعا الكل فهم ان ابو الغيظ استدعاه ع شان يكلمه و يعاتبه ازاى انهم يعملوا كده فى المصريين
بس للاسف مش كده خالص
اه هو استدعاه فعلا بس ع شان يديله دورة تدريبيه مجانيه فى اساليب تعذيب المواطنين بمهاره و بدون ان يترك اى اثر ممكن المواطن يشتكى بسببه
اصل الكويت دوله و حكومه محترمه و متحضره مش بيعرفوا يعذبوا كويس كمان التعذيب بتاعهم دلع لينا فده غاظ طبعا ابو الغيظ
و قال بئه احنا بعاملوهم بطريقه و الكويته بطريقه ؟
لازم اعلمهم ازاى يعذبوا الاوغاد دول ( المصريين يعنى ) اصل احنا كده فى وجهة نظرهم
يا ابو الغيظ قبل ما تلوم الكويت او اى دوله اخرى لوم حكومتك و شفها بتعمل ايه فينا و اخر فضيحه هى بتاع مقتل شاب فى المنصورة و طفل من التعذيب
و رايح انت تتكلم مع الكويت
( اللى بيته من الازاز ما يحدفش الناس بالطوب )
احترم الاول شعبك و الكل و الدنيا كلها هتحرمهم

هناك ١٨ تعليقًا:

عصفور المدينة يقول...

ممكن يكون طلب توظيف عمالة عندهم في هذا المجال الخدمي التخصصي

غير معرف يقول...

ما هو لما المصرى يبقى متهان فى داره يبقى محدش يلوم حد لما يتهان بره داره

انـتــصار عــبـد الــمـنـعـم يقول...

أنا متهيألي ان أبو الغيط
كان عايز
يشوف هم وقفوا في التعذيب لغاية فين
عشان لما يرجعوا يكمل هو وحبايبه عليهم

أحمد المصري يقول...

أكتر حاجة بتحرق دمي فيهم الإستخفاف
بالعقول ..كله كويس كله حلو كله السطه..كله كله كله لحد مالحياة مالحياة بقت مملة من كتر المثالية يا أخي

Unknown يقول...

انا شايفه ان مصر دايما بتساند الاخوه العرب لازم مصر تلعب دورها الريادي و نرسل فورآ خبراء تعذيب للكويت و كل الاشقاء العرب و نبعت معاهم شوية مواطنين مصريين يتمرنوا عليهم
و كل اهانه و انتوا طيبيين

محمد الوكيل يقول...

يا سيدي إن بعض الظن إثم..وبعدين ياأخي مش كل حاجة الحكومة تعملها تبقى غلط!!
شكراً.
محمد المصري

فى القلب يقول...

لاء فعلا ًكلامك حقيقى
هى مفيش حاجه بتستخبى فى البلد دى
أصلى كنت حاضره الأجتماع
بس أنت نسيت تقول حاجه أتقالت برضه

أبو الغيط سيته
أضاف ليه مدتهمشى سم هارى ياخد أجلهم
ماهم ملين البلد

أدام الله العز و أكل الوز على أدين سيته

Monzer يقول...

والله يا مارو يا معلم

باي وش
أبو الغيظ هايتطكلم مع بتاع الكويت
الى مأكله النظام ده ومشرباه
هايقدر يقولها تلت التلاتة كام


اقل كلمة هايوقلها المسئول الكويتى لو الموضوع ده طول
لم معازيك يا حنفى ويبقى عنده مليون حق

حاجة تانية ليهأبو الغيظ مايتدعيش عسكرى ولا ظابط ولا وزير الدخلية
فين أعضاء مجلس الشعب
مافيش ولا استجواب للسفاح العادلى
ايه يا جدعان
مازهقتوش من مارينا

admin يقول...

تلاقيه بيعلمه طريقة العصاية
سلام

بنت الاسلام يقول...

شيء محزن جدااا ان تعذيب البشر والامهم اخد مجال واسع قوي من السخرية والاستهزاء
من الدول ومن الشعوب
ومننا

غير معرف يقول...

مهو شعوبنا هى السبب
شعوب جبانه
عبييد
بيخافوا من اى حجه ومن اى حد
لو كلنا وقفنا وقفه وحده
هناخد حقنا تالت ومثلت
بس احنا شعوبنا عاشت ورضعت واتربت على الذل لحد ما بقا عاده فيها
عبييد

ابن رشد يقول...

يا حبيب قلبي
دة المصري بيهين المصري
مش عايز غير المصري يهين المصري

غير معرف يقول...

يا عمي ..... لما الناس يشوفوا إللي بيحصل للمصريين من ضرب علي القفا وتسليك في أقسام الشرطه ... ماذا تكونالنتيجه .. إلا مزيد من الهوان علينا ... ومن يهن يسهل الهوان عليه

غير معرف يقول...

مارو باشا ربنا يسترها علينا الايام القادمه حسنى قالها الايام بتعتى سوده لكن اللى جاى اسود

صانعة الحرية يقول...

عادى يا اخى
دا احنا فى مصر
وحسبنا الله ونعم الوكيييييييييييييل

nosha يقول...

هو والله أظن أنك بتتكلم عن واحد غلط هو والنبي فيه وزير أسمه أبو الغيط أصلاً
لأن اسم أبو الغيط ده آخره يروح الفلاحين يمارس شغله
وبعدين أنت بتتكلم عن واحد ملهوش رأي ولا ليه شخصية مجرد قطعة شطرنج بتتحرك لما يحركها اللاعب
أنسى يا عم مارو

فى القلب يقول...

ماشى يا باشا
عولم
أنا هبداء بتعزيب الخمسه الأوأل عشان أبدأ حياتى المهنيه بترقيه
والخمسه ألى تحت أيدى دلوقتى من أهل بيتى
عشان أنشف كده وأعجب
وأن شاء الله أنول الرضا


تمام يا با شا

حنين و حنان يقول...

احنا متعزبين و الي جوه السجن متعزبين و بعدين احنا مالناش تمن جوه مصر هايبقلنا خارجها مستحيل و بعدين التعزيب مش جوه السجون دا في كل مكان ارجو زيارتك لموقعي اسمع اخر اشعاري و علي فكره هو شعر وطني
احمد نجم
http://a7asessha3er.blogspot.com/