الجمعة، 31 أغسطس، 2007

دورات تدريبيه مجانيه و حصريا

حصريا و لأول مره فى مصر و فى الوطن العربى و بعد النجاح الكبير مع الكويت و مع امريكا نعلن عن بدء الدورات التدريبيه المجانيه للمصريين و لجميع الاخوه العرب
اذا كنت صاحب عمل وعاوز تتعلم فنون التعذيب و تعذب من يعملون عندك
اذا كنت مدير شركه او رئيس عمل
اذا كنت ولى أمر و عاوز تعذب اولادك
اذا كنت مواطن عادى و عاوز تتعلم فنون التعذيب و تعذب مواطنون اخرون
اذا كنت مواطن عادى و نفسك تطلع ارهابى
مفيش غير مكان واحد
مكان واحد بس
وزارة الداخليه المصريه
فتعلن وزارة الداخليه المصريه عن بدء اكبر حمله لتوعيه و تدريب المواطنين ع فنون التعذيب
و بعد النجاح الكبير الذى حققناه مع الكويت
و قبل ذلك ما تم تعليمه للامريكان فى كيفيه التعذيب فى جوانتانيمو و ابو غريب
و ذلك لتخفيف من ما تعانيه الوزارة من التعذيب وحدها
فبادر بحجز مكانك
للاستعلام و الاستفسار
فى مصر
الفرع الريئسى مكتب وزير الداخليه حبيب العادلى بالقاهره
قسم حى شرق بالاسكندريه
قسم المنصورة فى الدلتا
دى الفروع الرئيسيه
اما فروعنا المنتشره فى العالم
سجن ابو غريب فى العراق
سجن (معتقل ) جوانتانيو فى كوبا
سجن الكويت بالكويت
و قريبا فى جميع الدول العربيه
ملحوظه
كلما استطعت تعذيب 5 مواطنين سوف يتم ترقيتك و العمل بوزارة الداخليه
يمكن تكون نقيب او لواء
او وزير
بس يا ريت مش تفكر فى حكايه وزير دى ع شان منعذبكش انت شخصيا
سارع بالتسجيل او التوجه مباشره لاقرب قسم شرطه

هناك 55 تعليقًا:

مدونه انا بحبك يا مصر يقول...

انا معاك انت طبعا عرف انى جيزاوى العبقرينو
بس وحشنى اوى طيب متفكر تطلع احسن منى ورنلى بلاش تكلمنى
احمد الجيزاوى

battabakr يقول...

اسجل ياياشا
يسعدني جداا اني اكون مبادرة واشارك معاكم في الدورة ديه
دورة ارهاب الشعوب
دورة الخوف والرعب
لاياعم
اعذرني
مش هقدر اسجل
اعتقد
ان في عطل في التسجيل
مش راضيين يقبلوا تسجيلي
تعرف ليه
انا حقيقي مش عارفة

mohammed alsha3r يقول...

السلام عليكم

ازيك ياعمونا

بوست حلو

عجبنى

تسلم يدك

maro يقول...

انت كمان يا جيزاوى وحشتنى موت و مش قلت لى عملت ايه فى العزومه اللى قلت لك عليها بتاع افطار المدونين

maro يقول...

اختى العزيزه بطه
للاسف فى شرط نسيت اقوله فى الاعلان لو انتى اخوان ليس مسموح لكى بالتسجيل
شكرا لكى

maro يقول...

اخى محمد عاشور تسل لى و يسلم قلمك

khanka يقول...

ومنين أجيب ناي لمعناة السؤال يتلوه
والجدع قتلوه قتلوه وع النيابه جابوه سأل سؤال مالو رد قالوه مالو رد قالوه
عارفين ولا مش عارفين ولا ع الحكومه داروه
احترت والله احترت والله احترت والله
احط الحرف فوق الصبر ولا ابكي علي المكتوب
ومن اين أجيب ناس لمعناة السؤال يتلوه
يا رحمة فين أراضيكي
برقبتي وروحي أفديكي
واحل لغز السؤال
بارحمة فين أراضيكي؟؟

وعجبي عليك يا بلد بتكرم الغريب وتهين القريب ؟مش حاجه تخنق والنبي

shams يقول...

يا ترى التقديم فين و الشهادة هتطلع منين
على فكرة اتصل بالجيزاوي باركله النت بتاعه اتقبض علية

سارة يقول...

ههههههههههه

طبعا هتدى شهادات معتمدة من كل دول العالم
ماهو التعذيب المصرى مش اى تعذيب
لازم يكون معترف بيه فى اكثر السجون والمعتقلات بشاعة

اسلوبك رائع
تححة طيبة

maro يقول...

التقديم فى اى مركز شرطه كلهم و الحمد لله بيعذبوا ببراعه

maro يقول...

شكرا لكى يا ساره

maro يقول...

و النبى تخنق يا خانكه باشا
شكرا لك يا علاء

عصفور المدينة يقول...

أنا مش عايز أتعلم ياعم
أنا أمي

maro يقول...

ع فكره الدورات دى مش محتاجه انك تكون عالم و لا محتاج تكون بتعرف تقرا
يعنى يا اخى هما البطجيه بتوع الداخليه بيعرفوا يقرأوا او بيفهموا اصلا ؟

حمادة زيدان يقول...

والله يا مارو العدد مش محدود خالص ده مفتوح ومفتوح عالبحري , بس النفس .
على العموم أنا مش ناوى اسجل بس لو في أماكن فاضية ممكن أجيبلك ناس كتير
ههههههههههههههههههههههههه
تحياتي لك
حمادة زيدان

maro يقول...

ازك مستنيك يا حماده بس كان نفسى انت اللى تسجل

Monzer يقول...

والله انت دماغ يا مارو
انا هاحارب بدورة مضادة
دورة تعذيب الانظمة ووجع دماغها والتظاهر أمامها والتدوين فى وجهها وفضح ممارستها
طبعا ايش جاب لجاب
ده آخرنا ، بس هما آخرهم جهنم

تحايتى ع البوست الرائع ده

maro يقول...

شكرا يا ذذر يا حبيبى

عمر الشرقاوى يقول...

هههه الله
هما عملوا للتعذيب دورات هما فتحوا فىالمنصوره فرع ليه كده بس دا انا كنت ناوى اخدها فى القاهره يعم انته هاتجننا دول ناس معرفوش ازاى يحموا انفسهم دايما لغه الضعيف هى كده القوه واستخدام العنف وتصريح الريس الشهير العنف لا يولد الا عنف توووووت علينا يااااارب

maro يقول...

شرقاوى ان اعرف ان اسمها توب علينا يا ري هما غيروها ؟

مصطفى محمود يقول...

ياراجل حرام عليك دة بدول ما تدعينا لدورة كمبيوتر ولا حتى كورس فى معهد دودة القطن!

عصفور اسكندرية ( المواطن المطحون ) يقول...

السلام عليكم
علي فكره وزاره الداخليه
عملت منحه جديده
(الرخصه الدوليه لتعذيب الشعوب )
الدوره مجانيه ومتخصصه ومتوفره في جميع اقسام ونقط الشرطه
السجيل مجاني ومن غير اي بينات لان بيناتك متسجله خلقه
واللي مش حيسجل حيدربوه عملي في بيته

والعرض دا عشان رمضان
واللي حيتخرج من الدوره دي سوف يتمكن من العمل في تنظيم كاس العالم 2010 في ج افريقيا في حفظ الامن

wa7dania يقول...

مرحبا
بجد مدونة لطيفة جدا
شفتك عند نوشة مخنوق قلت أشقر عليك
بس الحمدلله
حساك بقيت أحسن صح
: )
تحياتي على المدونة الجميلة
منى

maro يقول...

شكرا جدا ع كلامك الحلو ده و تشرفت بزيارتك لى

فى القلب يقول...

ماشى يا باشا
عولم
أنا هبداء بتعزيب الخمسه الأوأل عشان أبدأ حياتى المهنيه بترقيه
والخمسه ألى تحت أيدى دلوقتى من أهل بيتى
عشان أنشف كده وأعجب
وأن شاء الله أنول الرضا


كله تمام يااااا فندم

maro يقول...

فى القلب
ايوه كده هو ده الشغل
بس ارجو ان تبعد عن الاب و الام
ع شان العقوق

deja vu يقول...

ههههههه والله صدقتك في البداية انه في دورات وشديت الهمة واقرا باهتمام

لالالالا يا عم ماليش دعوة .. :)

maro يقول...

هههههههههههه و الله انت عسل

kareem_elbehirey يقول...

انا هبادر بالاشتراك معاك يامان على شرط انى هبعتلك لنك للحملة اللى انا عاملها للمدونيين ورواد الانترنت وتشارك فيها ولو مشاركتش اسف هطر ابلغ عنك أمن الدولة
عفوا لقد نفذ رصيدكم افرح ياعم الرصيد خلص ومش هعرف ابلغ
لنك الحملة اللى شكلها مش هتولد
هام قبل يوم الجمعة
http://yalhwy.maktoobblog.com/499302/%CF%DA%E6%C9_%E1%DF%E1_%C7%E1%E3%CF%E6%E4%ED%ED%E4_%E6%D1%E6%C7%CF_%C7%E1%C7%E4%CA%D1%E4%CA_%DD%EC_%C7%E1%DA%C7%E1%E3

maro يقول...

بلغ يا عم براحتك بس يا ريت تبئه تزورنى و تجيب لى عيش و جبنه مثلثات بلاش حلاوه الله يخليك

EmY يقول...

و في عقود عمل ولا لاء الواحد يضمن مستقبله برضه

شوقى رجب يقول...

اكيد اكيد مش هقدر اشارك لان الامر طالما عند الحكومه بتعتنا يبقى اكيد مش مجانى
كمان الموضوع عاوز شوية ايضاحات يعنى مثلا التدريب هيكون نظرى ولا عملى وعينات التدريب لو عملى هيكون شكلها ايه طبعا انا عارف ان العينات مش هيكون فيها فاسدين او مرتشين او قوادين كمان عدد ساعات التدريب قد ايه
والشئ الاخير بقا والمهم
انت تضمنى انى اخرج من هناك مش متعذب ؟؟؟؟؟؟؟؟؟؟؟

maro يقول...

ايمى ما انا قلت لو عذبتى 5 ممكن تشتغلى فى الداخليه و كل اما تعذبى اكتر تترقى

maro يقول...

الاستاذ شوقى
انا اضمن لك انه مجانا و بالنسبه للايضاحات انا هرد عليك
التدريب عملى ع شان نحس بمتعه التعذيب و احنا بنشتغل و العينات مننا فينا ع شان نشوف و نطبق صح نعرف ايه اللى بيوجع و نطبقه ع الغير و ده امر هيروح بسرعه مش تخاف اعتبره حقنه بتاخدها
اما عدد الساعات فدى حسب الكورس اللى بتاخده و كل واحد و امكانياته
اما حكايه انى اضمن انك تخرج مش متعذب فبقول لك عيب عليك ده طباخ السم بيذوقه
يعنى لازم تذوق شويه

مصطفى محمود يقول...

اية يا مارو الشر دة

maro يقول...

اخى مصطفى
شر ايه بس ؟
لازم كده ع شان نقدر نعيش

امام الجيل يقول...

ولا تحسن الله غافلا عما يعمل الظالمون انما يؤخرهم ليوم تشخص فيه الابصار

محمد مارو يقول...

طبعا الانتقام يوم الدين

malak يقول...

بوست جامد جدا


تحياتى

محمد مارو يقول...

شكرا لك

الدرويش المرووش يقول...

بالراحه يا هندسه
لا الناس تصدق

حاجه تكسف و الله

محمد مارو يقول...

طيب ما يصدقوا و فيها ايه يعنى ؟
هو انا بقول حاجه مش موجوده المهم بس سجل نفسك بسرعه

هيثم أبوخليل يقول...

بص يا ماروا ... الشخصيه المصريه شخصيه غريبه ومحيره ... عايزه دراسه ... مش عارف يا أخي ليه قاسيين علي بعض كده ....

محمد مارو يقول...

اخى ابو خليل
طيب تعالى معانا فى الدورات و احنا هنبئه نشوف موضوع الدراسه ده

محمد المصري يقول...

مش محتاج اعلان والله ^^
شكراً..
محمد المصري

klmat يقول...

بوست جميل ودمه خفيف
بس انا من القله المندسه
اللى رافضه التدريب
اميل الى الاميه افضل
تحياتى لك
وكل سنه وانت طيب

نيفين عمر يقول...

كلمات تقطر مرارة وحزن مؤلم قاسى برغم انك غلفتها بسخريه غايه فى الذكاء
الله لا يرحم ابدا من يعبون الناس
واشكرك جدا لانك زرت مدونتى فكان لى شرف زيارة مدونتك
رمضان كريم

محمد مارو يقول...

الاخت نفين
اهلا بكى فى مدونتى و ده شرف لى مرورك الكريم عندى
0000000000000000000000000000
كلمات
لازم نكون متحضرين و متعلمين و سبنا من الاميه بئه
000000000000000000000000000000
محمود مصطفى
طيب طالما مش محتاج للاعلان طيب يالله بئه تعالى و اشترك

صانعة الحرية يقول...

انا لله
تعلمت حاجه جديده بقالى كام يوم ادخل المدونه واشوف العنوان واقول دورات ايه انا ناقصه ورمضان على الابواب واطلع تانى وبعدين النهارده قلت طيب اقرا الدورات عن ايه
سبحان الله لاقيت الموضوع غير ما كنت متوقعه خالص
هكذا اصبحت مصر
حسبنا الله ونعم الوكيل
انا مش عارفه اقول غيبر كده
حسبنا الله ونعم الوكيل
وجزاك الله خيرا اخى على هذا البوست

shahy يقول...

دي رابع مرة اجي واقرا الموضوع ومعرفش اعلق بس المرة دي قلت اقولك اني مش عارفة اقولك اية
فهمت حاجة

حسبنا الله ونعم الوكيل

تحياتي

محمد مارو يقول...

اختى صانعه الحريه
انا مش عوزك تقولى غير اللى قلتيه
حسبنا الله و نعم الوكيل
شكرا لكى

محمد مارو يقول...

اختى شاهى
اهلا بكى و تنورى مدونتى المتواضعه فى اى وقت
شرفتينى بالزياره فى كل مره كنتى بتدخلى فيها

كريم البحيرى يقول...

http://yalhwy.maktoobblog.com/507850/%CA%DA%CF%CF%CA_%C7%E1%C3%E3%C7%DF%E4.._%E6%C7%E1%CA%DA%D0%ED%C8_%E6%C7%CD%CF0

ادخل وشوف معنا ضد التعذيب واوعى تغمض عنيك
كريم البحيرى
http://yalhwy.maktoobblog.com

صاحب البوابــة يقول...

موضوع أكثر من رائع

كلماتك موجعة

لكنها للأسف

صادقة

تحياتي

enas يقول...

احنا مش ناقصين تعان مع حد دا أحنا اللى نعلمهم أزاى يعذبوا صح دا أحنا غلبنا سجون أبو غريب دا الأمريكان طلعوا أرحم مننا جورج بوش بيهنىء الشعب المصرى بأفتتاح دورتة الجديدة ويستعلم عن كيفية القبول بها .ربنا يوفقك وتفكرلنا فى دورة جديدة فكرتك حلوةتحياتى