الجمعة، ٣١ أكتوبر ٢٠٠٨

يبقى انت اكيد فى مصر

مالى انا هى مصريه او اسرائيليه او حتى هنديه

اكيد كلنا تابعنا الفتره اللى فاتت موضوع اجدع بنت اللى تسببت فى حبس و سجن احد الشهوانيين لما حاول ان يلعب بمفاتنها

انا واحد من الناس و انا بسمع عن قصتها صقفت لها و اعجبت بموقفها جدا و اكيد كل واحد اعجب زى ما انا اعجبت بيها

الايام دى بقى الاقى الناس حالها اتغير بعد ما كانوا معجبين بيها الاقى الناس بتشتم فيها و قال ايه بيقولوا دى اسرائيليه

و بالرغم من كده مالنا احنا لو لو هنديه ايه المشكله

دى بنت جدعه و نالت اعجاب الكل و لو كانت اسرائيليه يبقى على بناتنا انها تتعلم منها و من موقفا

لكن بما اننا فى مصر يبقى لازم يحصل كده ............................................................................................................................
الازمه الماليه العالميه
اكيد برضو كلنا تابعنا و بنتابع موضوع انهيار الاقتصاد الامريكى و تداعياته على كل العالم

و اكيد برضو عرفنا ان بسبب الازمه دى اسعار برميل النفط اصبحت دون الستين دولار للبرميل

السنه الماضيه لما برميل البترول سعره ارتفع بجنون و قرب من الميه و خمسين دولار للبرميل

الاسعار اتجننت هى كمان و زادت فى لمح البصر الى ال الميه و خمسين % و بالرغم ان كتير من التجار كان عندهم مخزن بالاسعار القديمه
الا انه بمجرد الارتفاع ارتفعت كل الاسعار

و اليوم العالم فى كساد و الاسعار بتنزل و البترول بينزل حتى اوبك خفضت الانتاج على شان الكساد

ليه بقى اسعار المواد الغذائيه زى ما هى ؟
منزلش غير الحديد و الاسمنت
فين باقى المواد اللى ارتفعت بجنون
طالما حصل كده يبقى انت اكيد فى مصر التى لا تعرف معنى لانخفاض الاسعار
...........................................................................................................................................................


رزق الهبل على المجانين
معروف للكل ان عندنا فى مصر مفيش غير شركه اتصالات ارضيه واحده ( تليفون ثابت يعنى ) و هى المصريه للاتصالات و بالرغم من كده نلاقى الاعلانات لها مليه الشوارع و الجرايد و التلفزيونات
الله !
هى فلوس على الفاضى و الله ؟ انت بتعمل اعلان ليه هو فى غيرك فى مصر على شان تعمل اعلان ؟
و بالرغم من كده رئيس الهيئه بيقول انهم بيخسوا على شان كده زود تمن الاشتراكات و تمن المكالمه
نفس الكلام بالنسبه للحزب الوطنى هو فى غيرك فى مصر واكلها ولعه و لا ايه يا عم ده انت الحزب الوحيد بتعلن عن نفسك ليه ؟
يلا ما هو رزق الهبل على المجانين
يبقى انت اكييييييد فى مصر
........................................................................
المعلم و التلميذ
تانبعنا موقف المعلم الذى ادى لوفاة الطالب اسلام
و تابعنا ان الدنيا قامت و مش قعدت على المدرسين
طبعا انا لا اشجع مثل هذا التصرف او حتى لا اشجع ضرب التلاميذ و لكن سؤالى
لماذا تقوم الدنيا على المدرسين و ننسى ما يفعله الطلاب ؟
هل نسينا ما حدث للمدرسه من الطالب صدام ؟
هل نسينا ان طالب تسبب فى شلل لمدرسه ؟
هل نسينا ان الطلاب يضربون المدرسين بالسنج و المطاوى ؟
لماذا لا يكون هناك قانون رادع للطرفين يحمى حقوق الطرفين ؟
..............................................
لقطه و صوره














بالصور دى اعتقد انه يبقى انت اكيييييييييييييييد فى مصر

هناك ١٦ تعليقًا:

حمادة زيدان يقول...

مارو الجميل

هههههههههههههههههههههههههههههههههههههههههههههههههههههههههههههههههههههه

يبقي أنت أكيد أكيد أكيد في مصر


والله هي دي مصر يا رجل

الظاهر انا اول كومنت

ريمان يقول...

ماروووووووو

ههههههههههههههههه

ههههههههههههههههههه

فعلا والله بالصور دى يبقى انت اكيد فى مصر

عجبنى اوى تعليقك على موضوع البنت دى

مش عارفه يعنى ايه انها مش مصريه

والشعب المصرى ماله ومال جنسيتها المهم انها بنت جدعه اوى ويا ريت كل البنات تبقى زيها

بنت الاسلام يقول...

مارو هو اللي قلب الدنيا علي البنت انها لما طلعت مع المحامية بتاعتها في حوار تلفزيوني وجت سيرة اسرائيل في البرنامج ان بيحصل فيها حوادث تحرش برده البنت قالت لاء اسرائيل دولة محترمة فالمحامية لاقت بعد كده ان البنت ديه كانت برده في فرنسا متهمة واحد بالتحرش بيها وانها مولوده في يافا من عرب اسرائيل يعني طلعا انا معاك ان ده مالوش علاقة بده المفروض كنا نعرف بس القضية ديه اتحكم فيها بايه في فرنسا كانت ملفقة مثلا للجاني ؟؟؟؟ ولا كانت واقعة حقيقية ماهو مش معني ان واحدة اتعرضت لتحرش مرة صعب تتعرض مرة تانية

الموضوع مش بالجنسية لكن لو فرض فعلا ان البنت ديه مجني عليها تاخد حقها ولو العكس تتعاقب برده علي اتهمامها وتجنيها علي بريء

اما بالنسبة للازمة الاقتصادية فالله اعلم هتوصلنا لفين امريكا مش عاوزة تتهد ضيعت نفسها في العراق ومش مكتفية دي ناوية علي سوريا كمان ربنا يستر

الصور رائعة جداا

خاصة صورة القلة والتاكسي والعجيب انه ماشي في وسط البلد والقلة في الهوا والتلوث مالوش اول من اخر واشرب وعيش

صورة الراجل اللي راكب عجلة بقي وماشي ودماغه اصلا مش باينة غريبة اكتر

مبدع المصري وفنان دايما

مش شايف ومع ذلك ماشي

تحياتي

وكل سنة وانت طيب مقدما وعقبال 100 سنة صحة وسعادة وتقدم

غير معرف يقول...

صورة راكب الدراجة شكله هندى او باكستانى

بس اللى محيرنى

ايه اللى جاب مصر

بيدور على شغل برضه ؟

ههههههههههه

Unknown يقول...

يبدو ان مدونتك دمها خفيف خالص..خفه دم المصريين مطبوعه حتي في كلامهم
اشكرك علي الزياره ...بس دي مش راح احسبها ..خليها بره الحساب ..ماشي يا جميل...

sun_of_freedom يقول...

بالنسبه لموقف البنت

شئ طبيعي من الشعب المصري يكون دا ردت فعله


ويستغرب من تصرفها لسبب واحد انه متعودش ياخد حقه يدافع عن نفسه

اتعودت يقعد باشا يستنى حقه وحلنى على ما حقه بقا يرجعله


شعب راجعى سلبي جبان يخاف

وتصرف شجاع زى دا اكيد لازم يستغرب ويقول انها مش مصريه لان فى اعتقاده المصريين زيه كدا

وبعدين خايف اوى على المصريين يتسجنوا
طيب صوته فين وساكت ليه عن تطبيق شرع الله واحكامه

ولا هنيجى عند الحق وكلام ربنا ونتقوقع


حسبنا الله من شعب جبان


اما بالنسبه لشركه الاتصالات العالميه الى توغلت جميع البلاد والاركان والشوارع حقها برده ظهرت بقوة ومحتاجه اعلانات تاكل بيها عقول الناس والشعب

ثم انها وراها ايه غير الاعلانات

وهتكسب ازاى من غيرها حقها برده


اما عن الاقتصاد والازمة الماليه


هيروح فين وزير الماليه من ربه

شكوناك لرب عادل


اما التلميذ والطالب بقا

الصراحه اتحكتلى القصه دى بإن التلميذ هو الى مظلوم ولكن الله اعلم

الاعلام ياما بيضلل

لكن الحقيقه فين هى عند ربنا

ولو كان فعلا التلميذ هو الى مظلوم يعنى يا مدرس حضرتك شايف ان التعليم كويس وشغال ويستاهل الى عملته
اما شعب والله غريب وعايز الحبس فعلا

ولو كان العكس

فأين ( قم للمعلم وفيه التبجيلا .. كاد المعلم ان يكون رسولا )

للاسف وبكل اسف ضاعت قيمنا واخلاقنا

ولذلك عاشت حمله راقي بأخلاقي


اخى مارو بجد جزاك الله خيرا جعلتنى اكتب ما يحمله انينى من تلك البلد لعله يريح الصدر كمدا من آهات ومتاعب ما نعيش بيه

ولكن صبرا ان بعد العسر يسر

بارك الله فيك

الصور كانت خير دليل وشاهد على واقع المسلمين


وفعلا يبقا انت اكيد فى مصر بكل تأكيييييييييييييييييييد

دمت بخير اخى

تقبل مرورى ووافر تقديري واحترامى

ميرا ( وومن ) يقول...

مارو

ايوة انت اكيد اكيد في مصر

موضوع نهي هو عبط وخلاص ولا كلام اهبل لما راحت تعمل محضر في القسم مش طلعت إثبات الشخصية

ولا هو الباسبور الإسرائلي طلع فجاة كدة

ولا في اي بلد عربي بيدي اي اسرائيلي الجنسية ؟

علشان نفهم بس

وحتي لو إسرائيلية دة مش معناه اني افرح ان حد اتحرش بيها

هي دي مصر فعلا

بنت مصريه يقول...

الحمد لله اننا ف مصر
مصر اللى بتضحكنا كل يوم على خيبتنا

بوست جميل يا مارو
احييك

Empress appy يقول...

مرارتك يا بنى اهدى
بس سيبك انا عجبنى البوقين اللى عن نهى اصل كنت مستنيه اشوف رايك

موناليزا يقول...

موجز لاهم الانباء حقا يحترم

محمد علي باشا يقول...

السلام عليكم
على فكره يا أخ مارو إنت حاولت تكتب كل الحاجات اللى تبين إنك في مصر وكتبت الحاجات السيئه في مصر والشعب المصري مش كله طبعا شعب نكدي ومش عايزين يعيشوا مستريحين أبدا والشعب راضع اللبن ده من الحكومه اللي لا عاجبها العجب ولا الصيام في رجب
يعني مثلا بنت جريئه وجدعه صانت كرامتها ورفعت قضية على الراجل اللي حاول أن يلعب بمفاتنها وكسبت القضية وفرحنالها ماينفعش الموضوع يخلص على كده لازم يعني لازم نعيد ونزيد في الكلام ونقول ده إسرائيلية لا مش عارف إيه لا مصريه لا هندية عموما مش كل اللي حضرتك كتبته هو اللي في مصر بس لأ دا في من كده كتير منها إهانة المدرس بإنهم يمتحنوه زي الطلبة إلى إسمها إمتحانات الكادر ولما هما مش واثقين من قدرات المدرسين عينوهم مدرسين ليه من الأول ومشاكل رغيف الخبز والإنتخابات الرئاسية المزورةوالبطالة اللي ماليه البلد والإقتصاد ومشاكل البورصه وغلاء الأسعار والعصابات اللي في كل مكان والحوادث اللي ماليه صفحة الحوادث في الجرائد وعدم الأمان اللي إحنا بقينا فيه والغلابة اللي عادو في كل حته يعني الفقر اللي مالين البلد والمسئولين اللي بينهبوا أموال الشعب المصري وفوق كل ده بيتهموا ناس شرفاء بغسيل الأموال كل ده مايقولش إن إحنا في مصر وده بسبب ضعف الإيمان وركن الحكومه للقرآن والدين وقولهم إن الدين حاجه والسياسه حاجه لأ طبعا الدين داخل في كل حاجه
أنا آسف إن كنت طولت

والسلام عليكم
تحياتي
محمد علي نوح

اقصوصه يقول...

ههههههههههههههه

طريفه جدا الصور

وكتاباتك جميله

احيي قلمك

تقبلي مروري

Unknown يقول...

ياراااااااااااااجل بتفكرني ليه ان انا في مصر
انزل الشارع برده في مصر أروح كافيه برده في مصر اقعد على النت برده في مصر ^^
بوست جامد يا مارو و كل سنه و انت طيب :)

الازهرى يقول...

العزيز محمد مارو

مجموعة جميلة من المواقف وعرضها رائع

ولكن الصور اعذرنى
فمنها ومنها

يجب الا نعتاد ان ننشر سيئاتنا على الملأ
بل كما تفعل الدول الكبرى نحاول اصلاح ما ااستطعنا
فهم ايضا لديهم اشياء قذرة رأيناها باعيننا ولكن لا يعرضونها على العالم

تحياتى وخالص مودتى

Monzer يقول...

ازيك يا مارو ليك وحشة بالفعل

مفتقدك يا صديقي العزيز

Unknown يقول...

شركة مكافحة حشرات بالقطيف
شركة تسليك مجاري بالقطيف