الأحد، ٦ يوليو ٢٠٠٨

ايه النفاق ده

عالم التدوين على اد ما هو عالم جميل و ممتاز
و على اد ما عرفنا بناس فى غايه الجمال و الروعه سواء ادبيا او سياسيا او دينيا او حتى اجتماعيا
الا انه زيه زى اى مجال سلاح ذو حدين
و فيه الحلو و الوحش
الحلو انا ذكرته

انما الوحش من وجهة نظرى

هو كميه النفاق اللى فيه
الكل بينافق فى بعضه
قليل اوى لما الاقى حد بيقول كلمه حق

و بلاش ذكر اسامى بدل ما اكون منافق انا كمان

النفاق بيتمثل فى التالى

اولا
تلاقى الواحد او الواحده من دول يدخل المدونه و هاتك يا مدح و ايه الجمال و ايه الروعه دى

زى يا خويه ما يكونوا حفظين كلمتين و بيرددوها فى كل البوستات

مفيش مره واحد يدخل ينقد باحترام بهدف البناء يعنى النقد البناء مش تلائيه خالص انسى يا عمور

ثانيا بقى
التعليقات

يعنى على شان تعلق عندى لازم الاول اعلق عندك او ربما لو علقت عندى لازم ارد ليك الزياره

احيانا كتير بدخل مدونات و مش بلاقى كلام اقوله و خاصه لو كان الموضوع عجبنى على شان كده ممكن ادخل و اخرج بدون ما اعلق

المصيبه بقى
ان تلاقى الاخ او الاخت من دول بيتباهو بكميه الكومنتات

ده يقول ده انا بعدى ال 50 كومنت و اللى يقول انا عديت ال 100 كومنت فى البوست الفلانى بتاعى

ميعرفش انه جاب الكومنتات دى لانه كان فى الاساس داخل كل المدونات دى و هما بيردوا له الزياره

دول انا بسميهم مهوسى التعليقات

و المصيبه الاكبر ان كتير منهم مش بيقرا الموضوع اصلا و بيعلق بناء على التعليق اللى على البوست نفسه
يعنى يقرا تعليقين تلاته و يقول زيهم

على شان كده انا بقول

عذرا يا جماعه

لو هتدخل مدونتى يبقى اهلا بيك
بس عوزك تنقدنى و تقولى اذا كنت غلطت او تصححلى

انما هتدخل تمدح على طول الخط انا مش بحب كده
و كمان لو هتعلق يبقى بليز اقرا الموضوع الاول و بلاش تعلق بناء على التعليقات

انا الحمد لله مش مهووس تعليقات

يكفينى ان واحد بس يدخل يقرا و يناقشنى و نتحاور و نتعلم من بعض افضل من ان الكل يدخل يشكر من غير حتى ما يقرا

تحياتى لكم

هناك ٢٢ تعليقًا:

محبط افندى يقول...

بسم الله

حبيب قلبى
والله العظيييم
دا كان اول موضوع هتكلم فيية بعد البداية
فى مدونتى

ودى بجد
حاجة تجيييب الاحباااط


وانا معاااك فى كل اللى بتقولة
وان شاء الله تشوف منى بوست جامد فى الموضوع دا

دعواتك بس
علشان انا هعمل احصائياات على اشهر المدونات
او اكتر المدونات
تعليقااات
او
كومنتتات

مدحت محمد يقول...

طب ماااااااااااشى

خلينى انتقدك بقى يامارووووووووو

هههههههههههههههه

بص ياحبيبى لا مش حبيبى لحسن تفتكرنى بنافقك ولا حاجهههههههههه

ممكن ادخل مدونة الاقى فيها غلطات
انبه عليها بس ميمنعش انى اقول برافو او كوس كنوع من انواع التشجيع فاهمنى
مش هيبقى كله نقد واحبط اللى بيكتب القصد
انا معاك فى موضوع التباهى بالكومنتات ده
هوس فعلا ده من نحية

وفى ناس بتخش تعلق من غير ماتقرا
وده بيبقى واضح وبتحصل معايا وبلاحظها وبضايق
موضوعك جميل وفى الجول يامارو
وده مش نفاق والله العظيم عشان منخسرش بعض هه واخدلى بالك انت

ammar يقول...

لا بجد يامارو عندك حق
بس بجد بوست رائع
ومدونةرائعه الصراحه
وكلامك جميل جدا
واحلى مافيه الصراحه
والبوست بجد جميل جميل ورائع جدا
ايه ده يابنى ده
ده مواضيعك بقت جامده جدا
انا لو اعرف ان مدونتك كده هاخليها صفحة البداية عندى
لان المدونة بجد جامده جامده جامده
ههههههههههههههههههههههههه
هههههههههههههههههههههههه
انا باهزر على فكرة
لكن انتا عندك حق فعلا فى بعض الحاجات مش كلها
لانى لما اكتب تعليق عند مارو علشان هوا يكتب تعليق عندى
احنا الاتنين بنحصل على استفاده
ده طبعا لو بنكتب تعليقات بجد ونقد بناء زى ماقلت انتا
لا بس بوست رائع الصراحه
هههههههههههههههه
تحياتى يامارو
ع م ا ر

حمادة زيدان يقول...

مارو حبيبي

والله أنت ضغط ع الجرح الكبير في التدوين ... تعرف المصيبة السودة في بني آدم بيكتب قصص زي حضرتي لو كل الناس دخلت وقالت الله واحد زيي ممكن ياخد شلوت محترم في نفسه وده ممكن يخليني أبطل كتابة أصلاً

حبيبي
والله نفسي حد ينقدني بجد

سلاموز بقي

قلب أبيــض يقول...

بسم الله

احييك اخ محمد


بجد والله موضوع زى ما قلت لك
فى العضل

وكان نفسى اتكلم فيية من زمااان


احييك بجد
وربنا يسهل ونشوف حل للموضوع دا

محمد جمعه يقول...

السلام عليكم
حبيبى قلبى ودى مش نفاق وانت عارف كده
ههههه


فعلا كلام موجود لاكن مش عند كل الناس
لاكن انا بشكرك جدا على الكلام ده
وياريت كل الناس تتقبل الكلام ده
ورحم الله رجل اهدى الىء عيوبى

جزيت خيرا على هذة التذكرة العطرة

رامز عباس يقول...

مارووووووو

انت متضايق وانا حاسس بكدة


بتحال تغير من اوضاع وجودها هو اللي مضيع الوقت


بصراحه البوست دة جايب



اخره تعرف انا الوحيد اللي مش فارقه عندى حد علق ولا لا بس يهمني يقرا وبس



اهو حتي يفهم حاجه هو مش فاههها



بالنسبه للنقاق فدى تربيه شعب كامل



وطبعا البعض له مصلحه في ان مدونته


تبقي مشهورة



ودة كلام فارغ



فكها بقا الناس هتخد وقت طويل علي بال متتغير




مش النفاق بس اللي موجود


حاجات كتير منها اخلاف الوعد


الامانه مش موجودة



انت حابب ان اللي يدخل ينتقدك بالنقد البناء


بس الموضوع دة صح هنقد ايه فعلا معظمنا منافقين



وممكن اكون انا نافقت الله اعلم



عموما ربنا يوفقك

وبجد انت موهوب ولازم نشجعك بدل منحبطك


ولو علق حد عندك مش لازم تردله الزيارة انت ومزاجك



اعمل اللي انت مقتنع بيه واتمسك بيه


علشان غيرك يفهم



للعلم انا قريت البوست يعني بكتبلك من واقع فهم مش اي كلام

بنت الاسلام يقول...

مش هنقول نفاق اكتر ماهو مجاملات وزي

مابنقول رد زيارات

واهو عالم اختارنا ندخل فيه

وزي ماقلت فيه الوحش والكويس وفيه

اللي يستحق نقدره وفيه اللي سد خانة

وخلاص


يارب نكون من أصحاب الرسالة اللي لو

بعدنا عنها يوم ان شا الله كلمة من

كلامنا تترك اثر باقي

بس شهاده حق يامارو

مدونتك من المدونات فعلا اللي بتعبر عن

فكر ورأي

استمر وهندخل ونقرا ونعلق وننقد لانها

تستحق

تحياتي

sun_of_freedom يقول...

السلام عليكم ورحمة الله وبركاته


والله وقف على حجر الاساس بكلامك

وبوست فى منهى الاهميه

فعلا صح لسانك

بدون حوار وتناقش في البوست يفقد الاهميه
لازم المشاركة بالفكر ونتكلم ونستفيد
بس والله هى دى تانى مرة ادخل المدونة
من بعد موضوع الصداقه لكن بجد البوست دا يثبت ان صاحبها يعمل فكر انضج وواعي

حماك الله بفكرك

وفعلا العبرة مش بكثرة التعليقات العبرة بفيدة الموضوع في حد ذاته

حماك ربي

تحياتى لك ممزوجه بآيات القرآن ومعطرة بذكر الله تحميك مدى الزمان

بحبك يامصر يقول...

السلام عليكم
بص يامحمد هااااااا شايف ايه؟
هههههههههه
بجد بقه انا شايف ده مش نفاق ولا حاجه يعنى انا ممكن ادخل عندك والكلام ميعجبنيش
واقولك كويس حلو بس ده لانى عارف مثلا ان النقاش معاك هيكون جدال مش نقاش ده على سبيل المثال انا مقصدش انت بالتحديد زى موضوع النقاب اللى اكل بيتكلم فيه اللى عارف واللى مش عارف بيتكلم فى الموضوع ده واللى مش عاجبه النقاب يقول ان النقاب ممكن واحد او واحده مش كويسه تستخبى وراه وتعمل افعال مش حلوه شوف والنبى الكلام كلام يغيظ وواضح من اللى بيقوله انه بيقول كده عشان عايز يجادل وخلاص طيب انت تقول لده ايه عشان تناقشه وانت واثق انهمش عايز يتناقش او انه يوصل للحقيقه لاء انت عارف انه عايز يطلع من الجدال كسبان بصرف النظر اذا كان موقفه صح او لاء اللى زى ده انا بفضل اكسبه الاول وبعدين احاول اوصله الفكره اللى انا حابب اقولها له عن طريق الكلام الحلو وبعد كده اقول له فى كذه وكذه
اسف للاطاله
تحياتى

Abd-Alrahman يقول...

ههههههههه
والله كلامك صحيح يا برنس
بس ممكن اعرف تقصد مين بقي بالكلام دة ؟؟ ;)
علي العموم يا مارو الناس مش فاضية كل واحد بيدخل بيقولك اقول اي كلمتين وخلاص
بس برضة في ناس زي العسل والله وبتقول احلي كلام

تدوينه صريحة بجد يامارو احييك عليها

الصيدلي المطحون

غير معرف يقول...

ههههه

معلش اعذرني علي الكلمة اللي فوق دي معبرة اوي

اولا انا بس عايزة اقول ان الموضوع اللي بتقولة دا مش نفاق اد ما هو عبارة عن اننا اتعودنا علي المجاملات بشكل افسد معها القيمة الحقيقية اللي اتعملت علشانه المجاملات و بقت مقياس للنجاخ

فعلا انا بشوف ناس كتيرة اوي عندهم تعليقات رغم اني بحس ان كلامهم مفيهوش جديد او مش بيقدم شئ مفيد

الا انه نوع من المجاملات اكثر منه نفاق
لان النفاق دا بيبقي حد عايز يوصل و اعتقد ان التدوين هواية مش محتاجة اساسا ان حد يوصل فيها الا اللهم الناس المعقدين اللي فاكرين ان الشهرةف ي عالم التدوين مجدية اصلا

تدوينة كويسة و بتعالج نفسيات كتيرة بايظة
بس انا عن نفسي لا بعدي علي الناس علشان تعلق عندي ولا بعلق عند اللي بيعدي عندي الا لو الموضوع فعلا حسيت اني هقدر اقدم جديد او يستحق

خالص التحية

حسن مدني يقول...

عزيزي مارو

هو موضوع مهم، وملاحظ سواء هنا أو في مكتوب. وغالبا في المدونات عموما.
مسألة التعليقات المتبادلة أنا أراها في إطار المجاملات أكثر من النفاق. وعادة ما أزور كل الذي يعلقون عندي.
المشكلة في الإحساس بضرورة إثبات الحضور. فأترك تعليقا لمجرد إثبات حضوري. وإن كان التعليق لا يقدم ولا يؤخر. وإن لم يقرا المكتوب أصلا.
وذلك يدفع البعض إلى التعليق بالمديح المبالف فيه، ردا للجميل.
للأسف معظمنا لم يتعلم النقد البناء. والأكثر لا يقبل النقد بأي صورة.
التعليق بغير قراءة. هذا سلوك شائع وله أكثر من سبب. منها رد الزيارة ومنها دعوة مستترة للزيارة. وهي في الحقيقة أكثر ما يزعجني.ومنها الرغبة في المجاملة لاشباع حب البعض للمباهاة بعدد التعليقات. وهو من أعراض حب التباهي بأي شيء، وكأن التعليقات هي مصدر قيمة الإدراج. مع أن متابعي أتفه مغينة أكثر من متابعي أكبر العلماء. فليس هذا مقياسا للقيمة.

عموما نحن لا نجيد فن الاعتدال، في المدح والنقد. فنمدح بلا حدود، ونذم بلا حدود أيضاً. وفي الأغلب نتجنب النقد، لكي لا ينتقدنا الآخر. وكثير منا لا يجيد فن الاختلاف في الرأي، وتبادل الحوار.

أخيرا، وأظنك تتوقع مني ذلك. يا أخي ما الضرر في أن نقول تعليق و تعليقات، بدلا من كومنت وكومنتات؟ وما الصعب في أن نقول رجاء بدلا من بليز؟
ألسنا أحق باستخدام لغتنا؟

تحياتي

طلاب من أجل مصر يقول...

السلام عليكم
ماروو ..كلامك في منتهى الصحه-اوعى تقولي دية كمان نفاق هههههه-0
لاني بجد لقيت الحجات دية منتشره اوي في عالم التدوين وبتغظني قوي حكاية رد الزيارة دية والتباهي بالتعليق لدرجة اعرف ناس قفلو المدونة عشان فيش نعليقات عندهم كتييرة ويقولو كده ملهاش لزمة وممكن تلاقي عندهم الزوار كتييير بس عشان مفيش تعليق

وكلامك جميل ويريت لو نعمل حمله زي الحملات -لغتي هويتي ومدنتي طريقي للجنة -0
نعمل كمان حمله ضد الطرق التقليدية في المدونات ونفهم فيها المدونين ونعمل توعيه
اظن ان احنا باذن الله هنطلع نتايج حلوه

في الاخر بقلك شكراا لانك طلعت بمعنى اصح فشيت الغل اللي كنت عاوزة اقوله من زماان

تقبل تحياتي

ريمان يقول...

السلام عليكم

عندك حق يا مارو

فى ناس بتعلق اصلا من غير ما اتقرا البوست

وتعلق بناءا على قراءه التعليقات

وكإنهم بيثبتوا وجودهم وبس

والموضوع ده انتشر جدا

كويس يا مارو انك اتجرأت واتكلمت فيه

تلميحاتى - يوسف الشافعى يقول...

اذا على النفاق ياعم محمد فحدث ولا حرج
فلم يضيع هذا الوطن سوى المجاملات الرخيص وقول كلمة نفاق لمن لايستحقونها ان الوضع الذى نعيشه لايتعدى اسبابه سوى سبب واحد الا وهو النفاق فالمنافق يريد الابتزاز تحت مسمى المجامله الرخيصه والطرف الذى ننافقه هو الاخر لن يستطيع العيش بدون النفاق لانه عباره عن بالونه مملؤه كذب وغش
ولم يتوقف بالطبع النفاق على حد الكتابه فى المدونات بل وصل الامر الى كل مناحى الحياه حتى اصبح الوطن لايحكمه غير مجموعه من النافقين والرائيين
انا قرأت قصة ادم وادهم انته شوقتنا للنهايه الى انى تيقنت ان الانسان الجيد هو من يرحل ويبقى الشرير يعربد بالدنيا
ودائمافى كل القصص تكون النهايه سعيده الا ان قصتك نهايته كانت مؤلمه
تحياتى والى لقاء

Empress appy يقول...

هههههههههههههههههه
يا تخبيطاتك يا مارو
ضيف اللى بيرمى اعلان فى وشك او يقولك مش تبقى تزورنى انت مش بتزورنى ليه
والنبى اعمل بيها تحديث ما انا فعلا بقرأ لناس كتير على الريدر ومش بعلق ولما بكون مختلفه او اتناقش او اوضح نقطه اتكلم
انما انا ربنا وعدنى مرة بواحد عارف المثل اللى ينطبق على يقولوا ثور يوقلك احلبوه هو ده دماغه شمال وفى الاخر يقولى قلبى وربى غضبانين عليكى طيب اقوله ايه ههههههههههههههههههههههه

سارة بندارى يقول...

الأخ مارو

رائع

مدونة رائعة

برافو

ما شاء الله

بوست ممتاز جدا

شئ عظيم خالص

لالالالالالا مش ممكن

مدونة جامدة طحن









( إلا صحيح هو البوست كان بيتكلم عن ايه ؟؟؟؟؟ )


ههههههههههههههههههه

تحياتى

غير معرف يقول...

بجد يامحمد
موضوع جامد ومهم وكان مفروض نتكلم فيه من زمان
والحالات اللى انت ذكرتها دى مليانه
ومش تعرف تعمل معاها ايه

وبجد انا لو لاقى حاجه فى اللة قدامى غلط هقولها فى وشه
فاانا غلبان وليا لسان
ومن منطلق ان احنا اصحاب وبنخاف على بعض
فلازم نوجه بعض

ولا ايه


تقبل مرورى

حسن حنفى يقول...

انا شايف ان انت معاك حق ناس كتير بيحبوا يتباهوا بالتعليقات بس الموضوع ده مهم واتمني نستفيد منه
(مش بنافق)

ابراهيم يقول...

ياعم مورو غير البوست بقا عشان نعرف نرد عليك

مدونة النسر المصرى يقول...

اخى الفاضل
محمد
اصدارك رائع ينم على معرفة قوية واسلوبك جذاب واهدافك رائعه
نتمنى التواصل