الأحد، ٣٠ مارس ٢٠٠٨

مصر الحزب الوطنى حصل فيها زلزال

امبارح حصل حاجه غريبه اوى
كنت بشاهد قناه المحور برنامج 90 دقيقه
بتاع معتز ما اكيد عارفينه المهم مطولش عليكم
قالوا خبر عجيب اوى
الخبر بيقول
يوم الجمعه اللى فاتت حصل فى مصر زلزال
بقوه 5.5 على مقياس رختر
طبعا دى مش قوه بسيطه
المهم
اتصلوا بسياده المسؤل و قال ايه الخبر بجد
و اللى يغيظ انه قال و اكد الخبر و قال ان الزلزال شعر بيه كل اهالى الدلتا و القاهره و الفيوم
اختى كانت بتتفرج معايه
قالت لى انت حسيت بحاجه او باى زلزال ؟
قولت لها اصل انتى مش فاهم
هما ديما يقولوا مصر زى الفل مفيش تزوير
مفيش تعذيب
مفيش فساد
و المواطن عايش زى الفل
و اخر رفاهيه و مفيش عندنا مشاكل خالص
الزلزال ده حصل لمصر بتاعهم
اللى بيتكلموا عليها
لكن احنا ربنا حافظنا
ربنا يهدها عليهم يا رب و يبعت لهم زلزال او رياح عاتيه صرصره تبيدهم من على الارض
مش عارف الكدب بتاعهم ده هيفضل لحد امتى
يا جماعه اللى حس باى زلزال يقولى
بدل ما اظلم الراجل

هناك ٢٦ تعليقًا:

جيلان يقول...

مارو ازيك يارب تكون كويس
ايه ياسيدى بقه حكايه الزلزال دى
انا محستش باى زلزال ولا اى حاجه
وبحسبك والله بتهزر او بتتريق
بس لو الموضوع بجد فانا محستش
يلا فين التورته
سلام يامارو

Hosam Yahia حسام يحيى يقول...

سبحاااااااااااااان الله

يالا ربنا يوفقهم كمان وكمان

تعرف ان امبارح كان فيه ثوره بركانيه فى مجمع التحرير

وعاصفه قويه هزت مدن القنال

واطارت مواطن مصرى

وبعدها اتهموا الامريكان انهم هما اللى قتلوا الراجل

محمد مارو يقول...

جيلان
و الله ده اللى قالوه

محمد مارو يقول...

ههههههههههههههه

بجد يا حسام الكلام ده ؟ و لا بتهزر زيهم ؟

يورو يقول...

انا والله اول مره بسمع الكلام دا

زلازال اى ؟؟امته

ازاى

!!!

ماعلينا
بجد يا مارو تحليلك هايل
انا بقراه ومش عارفه ادحك ولا ابكى
خلاص دى بلدهم

احنا بقى
ربنا يرحمنا

مصطفى محمود يقول...

هههههههههههههههههه


" ربنا يهدها عليهم يارب"

فكرتنى بقاسم السماوى

هههههههههه


ازيك يا مارو عامل اية .

عصفور المدينة يقول...

Latest Earthquake in egypt
Tuesday, December 11, 2007
http://neic.usgs.gov/neis/last_event/world_egypt.html

AHMED SAMIR يقول...

لا.....انا الحقيقة ما حستش بيه خالص
بس يمكن علشان كنت نايم
هم قالوا ان الناس اللي كانوا صاحيين هم اللي حسوا بيه
عموما
الحمد لله

بنت الصالحين يقول...

انا كل يوم بحس بزلزال

بجدمش بهزر وحسيت فعلا في يوم بزلزال وقت الصبح معرفش بقيهوده اللي بيقصدوه ولا ايه

ريهام يقول...

سلام عليكم
اولا الف سلامه عليك يا مارو وكويس انها جت سليمه لانى سمعت خبر كده انك كنت تعبان
المهم انا من ضمن الناس اللى محستش بالزلزال ده وهناك احتمالين لذلك الاول يا اما احنا فقدنا الاحساس ساعتها او ربما كان الشعب نايم وماخدش بالو وسلملى على التروماى بقى

محمد مارو يقول...

يورو

تعالى نضحك عليهم بلاش نبكى تعبنا من البكاء

محمد مارو يقول...

الحمد لله يا درش انت فينك من زمااااااااااااان

محمد مارو يقول...

عصفور المدينه منورنى فينك من زمان

محمد مارو يقول...

سمير

و لا انا و الله حسيت بحاجه

محمد مارو يقول...

عاشقه الفردوس ربنا يحفظنا

محمد مارو يقول...

ريهام

الله يحفظك و يسلمك انا الحمد لله تمام

ميرا ( وومن ) يقول...

يا مارو لأمتة هانفضل برواين كدة لما الحكومة تقول حصل زلزل يبقي مصر كلها كانت بترقص علي خمسة ونص

المنسى يقول...

اللهم أمين
الواحد يصى الصبح من النوم مايلاقيهمش
http://www.elmancy2000.blogspot.com/

HeLsiNG يقول...

السلام عليكم

هى خلاص بقى اسمها مصر الحزب الوطنى

بعد ما كانت مصر العروبة ،مصر الحضارة

مصر 73

ammar يقول...

الله
هو انا اخر من يعلم
مش بالزلزال
بالبوست اقصد يعنى
ماشى يامارو
والله لاحاسبك على الكلام ده
هههههههههههههه
بجد والله مافى زلازيل ولا حاجه
الزلزال جاى فعلا يوم 8/4
يعنى المحليات ..يعنى اجدع ناس .يعنى التزوير كله ..يعنى الحزب الوطنى
وانا وانت ...مالناش دعوه بالقصه دى
وغطينى وصوت ياجدع
هههههههههههههههههه

حمادة زيدان يقول...

أولاً وقبل كل حاجة ... ألف حمد الله ع السلامة
ثانياً بقي زلازال إيه ياريس اللي جاي تحكينا فيه ... تلاقي الواد معتز كان شارب شوية مية مخلل وعامل دماغ جامدة ... ولما جه يتصل أتصل بحد عامل دماغ هو التاني ....
انا عن نفسي في الصعيد يا بوي لحسينا بزلازال ولا حاجة أصل أحنا في بلد تانية بعيدة عن القاهرة والدلتا
خلي بالك من نفسك
سلاموز

محمد مارو يقول...

هلسنج

اه طبعا مصر اسمها مصر الحزب الوطنى هو اللى مبهدلنا هو اللى مدمرنا

و كمان فى حاجه انتى مش واخده بالك
انا اقصد مصرهم هما مش مصرنا

محمد مارو يقول...

واد يا عمااااااااااار

انتى طلعت تحيى

فين النقطه ياد

محمد مارو يقول...

حماده يا حبى

حلوه اوى دماغ المخلل دى

ياترى بتحتلف عن دماغ الملوخيه؟

بنت الاسلام يقول...

انا قريت الخبر يومها الصبح علي مصراوي وسالت ماما قالتلي ما انا صاحية طول الليل يابنتي محستش بحاجة


قلتلها جايز مابقاش احنا عندنا احساس بقي

يعني هي جت علي ديه

لكن طبعا مش اكيد بيخدعونا

نفسي يجي زلزال يفوقهم بقي

تحياتي

أحمد سعيد بسيوني يقول...

بسم الله
ربنا يسلط عليهم صاعقة من السما تاخدهم وتخلصنا منهم كلهم
تحياتي