الجمعة، ١٩ أكتوبر ٢٠٠٧

GAME OVER


اليوم كان عندى لقاء فى الاسكندريه مع مدونه يالله نفضحهم

مش هخبى عليكم انا مكنتش متحمس اوى انى اروح هناك

قلت لسه هسافر كل ده و تعب و ارهاق ع الفاضى

و هتخرج زى باقى اللقاءات

بس قلت لنفسى انا وعدت محمد عصفور وهانى جابر انى
اروح و لازم اوفى بوعدى

و الحمد لله انى قررت انى اروح

و الحمد لله انى روحت فعلا

و كنت هزعل جدا لو مكنتش روحت

و الاسباب كالتالى

1 / الجو كان اكتر من رائع ( اسكندريه بئه و هواها ) كمان اللقاء كان على البحر مباشره

2 / قابلت ناس فى غايه الروعه و الجمال زى الدكتور ابراهيم الزعفرانى ( امين عام نقابه اطباء الاسكندريه ) و

و الاستاذ هيثم ابو خليل (صاحب مدونه متر الوطن بكام ) مع الناس دى

حسيت انهم اهلى و اخواتى و عاوزين خير للبلد بجد

3 / قابلت مجموعه رائعه من الشباب سواء اللى اعرفهم او اللى لسه متعرف عليهم

من اللى اتعرفت عليه لاول مره لسه عايش واد عسول وحبوب اوى

و كمان اتنين اصحابه بس مش فاكر اسميهم

و شابين مش عندهم مدوانات طلبوا منى اساعدهم فى عمل مدونات وحصل بالفعل

وطبعا من اللى اعرفهم الحاج جيزاوى حبيبى و الشاعر و معتز و اسلام و نوسه

4 / حسيت انه معدش ينفع نتكلم و بس
و ع راى بطه و شمس
لازم نعمل حاجه

اول حاجه عملتها انى غيرت اسم

مدونتى و اصبحت جيم اوفر

اللى شفته النهارده حسسنى ان لسه البلد بخير

عشان كده و بعد اللى شفته بقول لمبارك جيم اوفر

بقول لجمال جيم اوفر

بقول للعادلى جيم اوفر

بقول لكل ظالم مستبد حرامى جيم اوفر

مش هنسكت

مش هنتكلم ع الفاضى معدش ينفع اسمى مدونتى كلام و فش غليل

اتفقنا نفضحهم

اتفقنا نكشفهم

اتفقنا ع خير للبلد

هما فاكرين انهم اللى بيفكروا و هما الصح و احنا ملناش لزمه

لاء جيم اوفر

و معدناش هنسكت
و اسيب حضراتكم مع بعض الصور

طبعا المنور ده الدكتور ابراهيم الزعفرانى و ع يمينه معتز
و ع شماله اسلام و بعدين انا

برده اللى فى النصف الاستاذ هيثم ابو خليل
صاحب مدونه متر الوطن بكام
و ع يمينه معتز و بعديه لسه عايش
(ولد عسول اووووى)و ع شماله الاستاذ ابراهيم
انا و بعدين اسلام

طبعا باين ان انا ده
تصوير معتز
و لو خدكم بالكم اللى قاعد و لابس جلباب و طاقيه بيضاء و بذقن ده الامام المصرى
اللى كان مخطوف فى ايطاليا

هناك ٥٥ تعليقًا:

hekaytna يقول...

حلوه اوي روح التفاؤل دي يا مارو مصر لسه بخير بجد وده انا قلته من مرة مانت قلت انك لازم تسود المدونه قلت هنخضرها ولو سودها هما علينا ربنا معاك وفي انتظار المزيد

nosha يقول...

كلامك كله تمام وزي الفل يا مارو وربنا يقدرنا كلنا إننا نلاقي بكرة أحلى ونلاقي مصرنا اللي بنحلم بيها
تحياتي ليك يا مارو

Monzer يقول...

طب تمام كده
آدى اول بشاير يالا نفضحهم
خلتك تغير اسم مدونتك
خايف بعد كده أدخل عندك
ألاقيك خاطف ظابط ولا أمين شرطة وعمال تعذبه
هههههههههههههه
تحياتى يا معلم

صانعة الحرية يقول...

السلام عليكم
ما شاء الله عجبنى ان حضرتك تاثرت وغيرات على طول

مع انى كنت حبه اسمها الاول اوى
كلام وفش غل
خير
بس جميل جيم اوفر
وربنا يعينكم ويعنا جميعا يا رب على فضحهم
ومبارك على تغير اسم المدونه وعلى سرعه الاستجابه والتفاعل

Unknown يقول...

برافو مارو الروح الجديدة ودا معناه ان كل كلمة صادقة وموقف جاد بيكون له تاثير حقيقى مش بس فش غليل
بس مش عارف الجيم اوفر على مين ولسه لمين دا اللى مفروض نخطط له ونرتب له كلنا علشان يفضل الشعب داخل اللعبة اما خفافيش الظلام يتكتب لهم بالبنط العريض وبكل لغات العالم ( جيم اوفر).

عصفور المدينة يقول...

أعانكم الله
بس لي تساؤل ماذا بعد الفضيحة

محمد مارو يقول...

علاء
انت بتقول لسه فى تفاؤل
انا بقول التفاؤل مش هيجى لواحده لازم نجيبه

محمد مارو يقول...

نوشه
يا رب يوفقنا و نعمل حاجه

محمد مارو يقول...

منذر
لاء المره اللى جايه هغير اسمك انت
هههههههههههههههههههههههههههه
كل عام و انت طيب يا حبى

محمد مارو يقول...

اختى صانعه الحريه
انا كمان كنت حابب اسمها اوى
بس التغير من سنن الزمن

محمد مارو يقول...

د / عبد الخالق
انا موضح فى البوست الجيم اوفر ع مين
ع كل ظالم كل حرامى كل مستبد

محمد مارو يقول...

عصفور المدينه
لما نفضحهم يجى بعدها كل شىء
المهم ان الناس تفهم و تعرف مش السبات العظيم اللى نايمين فيه ده

مـحـمـد مـفـيـد يقول...

جامد جدا
الاسم الجديد ومعناه

محمد مارو يقول...

شكرا يا محمد مفيد

انـتــصار عــبـد الــمـنـعـم يقول...

أتمنى لك التوفيق
واسم جديد
له معنى وبالتأكيد ستكون نقلة
جديدة في كل شئ

صانعة الحرية يقول...

السلام عليكم
استاذى الفاضل عصفور المدوينه فعلا اكيد بعد ما نفضحهم هيحصل كتير
النهارده بتكلم مع واحده وعن المعتقلين واننا لازم ندعيلهم وبحكى لها عن العيد ازاى مر على اولادهم
ردت قالت لى ان الحكومه مبتعملش حاجه غلط
وان اكيد الناس دى عملت حاجه غلط علشان كده اعتقلوهم

وصعقت عندما علمت انها متعلمه وتحب القراه
فعلا لازم يتفضحوا

غير معرف يقول...

والله انا كنت مبسوط فعلا انى شفتك معنى كنت بدعى انى اشوف فى الاسكندريه اى حاجه مش وحشه بس شفتك والحمد الله جت سليمه
هههههههههههههههههه
مبروك على الاسم الجديد
يا اوفر
ههههه
خخخخخخخخخخ
احمد الجيزاوى

محمد مارو يقول...

ماشى يا جيزاوى
اما اشوفك بس

عمرو سلامة يقول...

هههههههه
وصحيح ادى اول بشاير يلا نفضحهم يا مارو ... انك تغير اسم مدونتك ... ايه ياعم انت اتأثرت ولا ايه ...
-----
وانا ياعم لا عسول ولا حاجة .. ده بس من ذوقك وربنا يعزك يارب ... ومارو يا رجاله كان راجل اعسل منى والله ... حبيب قلبى ..
وقشطه يا مارو ... وان شاء الله جيم اوفر لحسنى قريبا جدا وعلى يد مدونى مصر الشرفاء ... الجيل الثالث فى مصر جيل المدونين جيل تحرير مصر باذن الله ...
----
وباردوه لسه عايشين يا مارو وهنقول كلمه الحق مهم حصلنا .... ههههه ... لسه عايش صحيح ... افتكر انك اول ما سمعت اسم المدونه بصتلى بصه غريبه .. وقولت ما كلنا لسه عايشين ... قولتلك بس انا عايش ياخى بأه ... ههههه
يلا يا حبى ربنا يوفقك فى التدوين...

د محمد يوسف يقول...

رائع يامارو ومبروك على الاسم الجديد ونريد الخطوات العمليه التى ذكرتها لنستفيد باقتراحاتك ولم ترد على فى مسألة عدم حضورك لقاء رابطة مدونى الدلتا وهو اتقدم علشان المؤتمر اللى انت حضرته ومعجب جدا به

غير معرف يقول...

حبيب قلبي
تعرف يا ماروا أول ما إيناس حكتلي على اللى حصل في الاسكندرية قغدت متندم ووحداني وبقول "ياراتني كنت معاكم" والله بجد لسه موجود الأمل طول ما فى شباب زيك وزى الجيزاوى حبيبي وزى إيناس ومنر وباقي المدونين خايف أنسى حد والله.
ربنا معاك يا ماروا
وبقولك
قصة
حكومة من الجن
في المدونة أتمني أن تنال رضاك
حمادة زيدان

محمد مارو يقول...

يا عمور
انا اول اما شفتك و عرفت انك لسه عايش قلت لك يا بختك انك لسه عايش انت اللى فهمت غلط

محمد مارو يقول...

دكتور محمد
انا مش رديت لانى منتظر اكلمك نت مش ينفع اقول فى تعليق

محمد مارو يقول...

كان نفسى تكون موجود يا حماده

ابن رشد يقول...

طب تمام واضح ان البداية كويسة و لذيذة خاصة اني بثق في رايك يا مارو

غير معرف يقول...

مشاء اللة.. تبارك اللة مصحصح وواعى ونشيط ...وفصيح ايضا. بس عايز احذرك من ان اسم "جيم اوفر" سيعرضك للمسائلة القانونية...اولا انك فتحت"جيم" من دون ترخيص ...ثم انك قولت انة "اوفر" ولم تذكر اوفر من اية ؟؟ الامر الذى قد يؤدى الى هروب الاستثمارات من مصر تقدر ب 350 مليون دولار...!!! وفلة يامارو اللة ينور.

حلم الحرية يقول...

جميل فعلا اننا نخرج من الحدث بالروح دي

لو كلنا خرجنا بالروح المتحمسة دي من المؤتمر فده دليل نجاح

لو كلنا خرجنا واحنا ناويين فعلا نقولهم لا بكل الطرق وبكل الوسائل
او نقولهم الاسم اللي حضرتك اخترته جيم اوفر يبقي ده دليل نجاح

لو كلنا خرجنا واحنا متفقين اننا احنا الجيل اللي هيقول لا وان البداية مننا يبقي ده دليل نجاح


وبعدين الاهم بئا ان الكل خرج وهو متفق ان جو اسكندرية لا يعلي عليه
وان ناس اسكندرية زي دكتور ابراهيم واستاذ هيثم ناس روعة
وده طبعا اهم اتفاق في اليوم
هههههههههه

قطوف يقول...

اول زياره للمدونه وشجعتنى أوى وعجبنى حماسك وإصرارك غلى إنت تروح إسكندريه مخصوص عشان تحضر المؤتمر أنا بكلم بقالى كتير اوى وعمرى مدخلت اجانب التطبيقى بس أنا أخدت جرعة حماس وأنا بقرا البوست وكنت متتحمس أوى وحسيت إن لسه فيه أمل
بارك الله فيك
ومدنتك جميله
وعجبنى الاسم
وياريت تشرف المدونه بزيارتك

طرقعات فجائية يقول...

السلام عليكم يامحمد كان نفسى اقابلك واتشرف بك واقوم معاك بواجب الضيافة ولكن قدر الله وماشاء فعل فقد توفى زميل دراسة وجار عزيز عن 38 سنة بالسكتة القلبية مما احزننى وحال دون حضورى اللقاء بنقابة المحامين فالى ان القاك لك خالص تحياتى
طارق الجيزاوى

سارة يقول...

جييييييييم اوفر

والله يامارو المهم لما الجيم يخلص منكونش احنا الخسرانين

عجبنى اوى انك غيرت الاسمواننا لازم نعمل حاجة

بس هناعمل ايه

ده مش غلاسة والله

بجد عايزاك تفكر فى اللى ممكن نعمله

مبروك وبالتوفيق

مهندس مصري بيحب مصر يقول...

كل ما أقرا عن اللقاء في مدونة أحس بالندم على إني ما روحتش رغم ان كان عندي ظروف بس الموضوع طلع كان جميل و يستاهل السفرو الإعتذار عن أي إرتباطات تانية
الممرة الجاية إن شاء الله و نشوفكوا كلكوا
سلام يا مارو

Desert cat يقول...

كان نفسى اكون معاكو
بس للاسف المسافه بعيده جدا
ان شاء الله ربنا يسهل ونشوف بكره مصر احلى

اسلام رفاعى يقول...

ازيك يامارو
الله ينور انت شرفت اسكندرية على فكرة انا شوفتك فى المؤتمر بس كنت مشغول شوية ماعرفتش اتعرف عليك بس خير
وان شاء الله العد التنازلى للنظام ده بدأ مع يلا نفضحهم

محمود الششتاوي يقول...

انت رافع ايدك ليه ؟؟

جمعاوى يقول...

منور يا عم مارو

أنا ع العموم من الإتنييين اللى إنت بتقول إنك ناسى أساميهم

يالا مش مهم

المهم تكوت إتبسطنت ف اسكندرية

و عجبانى أوى الاسم الجديد للمدونة

تحياتى

محمد مارو يقول...

Anonymous
اه و الله عندك حق ربنا بستر

محمد مارو يقول...

حلم الحريه يا رب يكون كلنا حماس

محمد مارو يقول...

سى السيد
شرفتنى و نورتنى و ارجو ان نتواصل

محمد مارو يقول...

نو بروبلم
اولا البقاء لله و الهمكم الله الصبر و السلوان
ثانيا كفايه عندى تشريفك لى

محمد مارو يقول...

ان شاء الله مش هنخسر يا ساره
لان معانا الحق و الحق ديما منتصر

محمد مارو يقول...

مهندس مصرى
حصل خير بس اتمنى انى اراك معانا ديما يا رب و نتشرف بمعرفتك

محمد مارو يقول...

قطه الصحراء
كان معانا ناس من بعييييييييييييد
بس حصل خير

محمد مارو يقول...

يا عم اسلم كان نفسى اتعرف عليك

محمد مارو يقول...

ششتاوى
كانت ايدى بتوجعنى

محمد مارو يقول...

اسف يا جمعاوى و الله معلش الزهايمر بئه
بس انت مش قلت لى اسم التانى

أمير القلوب يقول...

السلام عليكم
اخي الكريم: وفقكم الله إلى ما يحبه ويرضاه وإحنا معاكم حنفضحهم وربنا يخلصنا منهم قريب
والإسم الجديد ده جامد بجد وإختيارك موفق
تقبل تحياتي

محمد مارو يقول...

امير القلوب
يا رب يوفقنىو اياكم لما يحله و يرضاه

غير معرف يقول...

جينا نعلق متاخر ياخسارة

كنت اتمني نكون من اول الناس المباركين علي التغيير

جيم اوفر اسم جديد وجميل يامارو

وتفسيرك له وضحه اكتر واكتر

وان شاء الله نعيش ونشوف

جيم اوفر

لكل ظالم

تحياتي

بنت الاسلام

غير معرف يقول...

اخى الحبيب..محمد

قد تكون هذه اول مره لى فى مدونتك

لكن أحسست انى دخلت هنا من قبل

انا كمان كان نفسى احضر

الأستاذ هيثم دعانى

بس ظروف العمل والمشاغل

انشاء الله نلتقى

اخى الحبيب حمادة زيدان كلمنى كتير عنك

ربنا يحفظك

ويحفظ مصر

أخوك نيجــر

محمد مارو يقول...

اخى احمد سعيد
اهلا بيك فى مدونتى و منور ديما و ارجو ان نتواصل

محمد مارو يقول...

بطه
كل ده تاخير برضه ؟

فى القلب يقول...

ربنا يوفقك يا مارو
و تقدر تعمل حاجه
و التجمع ده و ضحتلنا أنه كان مفيد جدا

حسن مدني يقول...

والله يا محمد رفعت معنوياتي
وأنا كل ما أقرأ مدونة تحبطني أكثر من اللي قبلها
شكرا لك

محمد مارو يقول...

سى الاستاذ حسن
انت فين يا عم

nour el 3ozamaa يقول...

حاج مارو تمام والله عايزين الروح ده تبقي موجوده دايما

تحياتى ليك يا ريس