الجمعة، 21 سبتمبر، 2007

بدأنا العذاب السنوى

بدأنا العذاب السنوى اللى و لله الحمد مش بيتاخر عن ميعاده خالص
كل عام و انتم بخير
و المفروض انى بقول كل عام و انتم بخير فى المناسبات السعيده بس لازم اقولها فى الذكرى السنويه للعذاب
عذاب مش يقل اهميه عن التعذيب فى اقسام الشرطه
عذاب بيستمر تقريبا شهر او شهر و نصف
بس المره دى مش الحكومه اللى بتعذبنا
المره دى احنا اللى بنعذب نفسنا بنفسنا
عذاب بدأت شخصيا الاحظه من حوالى 3 سنوات او اربعه
العذاب ده بيبدأ يوميا من الساعه 12 بعد منتصف الليل و حتى طلوع الشمس
طبعا عرفتوا انا اقصد ايه
لانى واثق انه بيوصل لكل واحد فى بيته
بيوصل للكل و هو بيبدأ يحاول يبنام
بس هيهات انه ينام او يقدر انه يقعد حتى
العذاب اللى اقصده عذاب الفلاحين لينا
بحرق قشر الرز
ااااااااااااااااااااااااااااااااااه والله يتخنق من كتر الدخان
بالرغم انى من الاقاليم و ساكن فى مدينه كبيره مش فى قريه
و المدينه دى بتبعد كتير عن الاراضى الزراعيه الا ان الدخان بيوصل لى و بيخنوقنى
و الله الواحد بيحمل هم منتصف شهر 9 و اوائل شهر 11 كل سنه
ارجو من الاخوه المزارعين و الحكومه المبجله انها تلاقى حل للمشكله دى
الجو و البيئه و الواحد نفسه معدش مستحمل
يا جماعه احنا فى شهر كريم
بطلوا حرق قشر الرز ده
حرااااااااااااااااااااااااااااااااااااااااااااااااااام راعوا ان فى بنى ادمين عيشين معاكم
بس مين يسمع و مين يراعى مين
اشوفكم السنه اللى جايه ان شاء الله و انا بشتكى همى لله من الاخوه الفلاحين و من الحكومه اللى واقفه تتفرج
لحد ما هنموت من الدخان ده

هناك 20 تعليقًا:

حسام مراد يقول...

بعد السلام عليكم

انا بصراجه معرفش المشكله دى بس من الواضح انها بتسببلك مشاكل كتير لدرجه
انك كتبتها فى بوست

بس الفلاحين يعملوا ايه من غير دعم الحكومه ولو فى دعم هايحلوها ازاى

كنت افضل اقتراحك لحولو لها بجانب طرحك للموضوع بما انك على خليفه كبيره بالموضوع

تقبل ارق تحياتى
سلاماااااااااااااااااااااات

shams يقول...

بصراحة يا مارو انا في منطقة مفيهاش قش رز
بس الظاهرة دي مضرة بمصر كلها
منهم لله
حسبي الله و نعم الوكيل

محمد مارو يقول...

اخى حسام
المشكله دى مصر كلها بتعانى منها مشكله قش الرز و السحابه السودا
انا معنديش حلول غير انهم يبطلوا حرف هتقولى و هيودوه فين هقول لك يعملوا زى ما الحكومه تقول

محمد مارو يقول...

اه و الله يا شمس
دى مضره جدا جدا و بتخنوقنى

حسام مراد يقول...

هيه السحابه السوداء دى من اسبابها
انا افتكرت ان السحابه السوداء من عوادم العربيات والمصانع وغيره وغيره
ماتوقعتش ابدا انها ممكن تيجى من الزراعه

ربنا يرحمنا جميعا منها يا رب

فى القلب يقول...

ربنا يعفوا علينا و يرفع همومنا عن قريب
لان خلااااااص
وصل الزبد العلى

الفكر السجين يقول...

ربنا يهون علينا يارب فعلا دخان كل سنة دة بس يا مارو مش بيقعد شهر ونص ولاحاجة دا يدوبك أسبوع يمكن عندكم أنتم بيطول بس دا اللى بسمعة أنا معرفشى أحنا مش بيجيلنا دخان خالص سلام ياقمر

بنت الاسلام يقول...

واضح انها مشكلة

جامدة فعلا

واحدة صديقتي من ايام الجامعة كانت من شربين المهم والدتها راكبة ميكروباص ورايحة تذورها في المدينة الجامعية وقش الارز بيتحرق علي الطريق وحصلت الحادثة وقعت العربية كلها في قلب القش المحروق

وماتت

ومات كل الي في العربية

محروقين

ومن يومها

وانا ادركت فعلا

اد ايه خطورة حريق قش الارز ده

ياريت يرحموا الناس

علشان ربنا يرحمهم

سارة يقول...

بصراحة يامحمد مش عارفة

بس هو المفروض يعملوا فيه ايه؟؟

hekaytna يقول...

يا عم مارو انت متعرفش حاجه عن معاناة الفلاحين يا جماعه شيكارة الكيماوي بقت ب80جنيه وهي اساسا تمنها في بنك التنميه 34 جنيه بس مش موجود لانه بيتباع في السوق السوده من بره بره وبيتقال كله تمام يا فندم اما حرق القش ده بسبب انه الفلاحين مش ممكن تتصرف فيه غير بكده واحنا كلنا عارفين ان البوتجاز وفران الغاز غزت بيوت الفلاحين يعني مبقاش بيستخدموه للطبخ او الخبز او غيره وكمان موضوع انه يتعمل علف للمواشي ده فاشللان تكلفته مرتفعه جدا الحكومه بتتبرع انها ممكن تشتري بالة القش بجنيه واحد يعني قش الفدان ب20 جنيه واستني دورك يا سيد واحنا كلنا عارفين ان الزراعه ليها مواعيد محدده لازم نلتزم بيها وكمان الفلاح بيبص ان حرقه بيفيد الارض احسن من بيعه لانه بيقضي علي الحشايش وبيغذي الارض باقي قدامه حل اما انه يحرقه او ياكله وانتوا بقا اختارو ليه

Monzer يقول...

ازيك يا مارو عامل ايه
وحشنى جدا يا معلم

قش الارز ده قديمة
عاوزكتشم ريحة فى الجو كده غرييييبة قوى
مش عارف مصدرها ايه
ريحة زي ريحة السيبتو كده ولا بنزينمش عارف
بس بتزغلغل عنيا كده، وتصيبنى بقشعريرة
وسألت ناس كتير
صدقوا على كلامى هذا
وسالت سزاقين قالولى من البنزين ال 92
وناس قالت ده بنزين مش عارف خالطينه بمعرفش ايه
المهم
ان فيه ناس مبسوطة
علشان الشعب بيتكيف على رمضان كده
مش عارف يعملوا معانا ايه تانى
يحرقوا بانجو

يالا خير
سلام يا معلم
وابقى طمنى عليك

د محمد يوسف يقول...

على فكره يامارو المشكله دى لها حل ممتاز ويبدأ من أندونيسيا حكاها لنا المهندس ابراهيم أبو عوف عضو مجلس الشعب أثناء حضوره مؤتمر فى أندونيسيا ( الملتقى البرلمانى الاسلامى )
وجدوا هناك ماكينه صغيره تحول قش الأرز الى خشب وعندما قال المهندس للسفير لماذا لانستورها فى مصر قال له أنا بعت للخارجيه ومحدش عبرنى

محمد مارو يقول...

اهلا دكتور محمد فى مدونتى
و الله انا اول مره اسمع الحل ده بس بجد كده حل رائع ارجو من الحكومه ان تتحرك

محمد مارو يقول...

يا رب يخلصنا فعلا يا فى القلب

محمد مارو يقول...

نوسه لاء فعلا بياخد فتره طويله

محمد مارو يقول...

و الله يا منذر مش شميت غير الدخان

محمد مارو يقول...

يعنى يا علاء ع شان غلابه يموتونا ؟

مواطن زهقان يقول...

فعلا يامحمد
المشكلة دى بتسبب اضرار كتيرة
قوى
وةالفلاحين اللى بيحرقوها
قبل اى حدا تانى
بس هما هيعملوا ايه
مفيش حد يوجهم

Mohamed_sobhy84 يقول...

السحابه
عارفها
بس انا مبشوفهاش
انا بحس بيها
اول ما تهل علينا الاقي عيني بتاكلني و انا و حظي لو كانت خفيفه يبقى ترسى على حساسية
اما لو كانت التلوث جامد الاقي دمل طلع في عيني
يلا اهو موسم حلو لدكاتره العيون

غير معرف يقول...

الحقيقه انا اعانى من حساسيه فى الصدر
وطبعا من اول ما الحريق يبدأ واعانى معاناه لا حدود لها
ربنا يرحمنا من الهم اللى فى كل مكان ومن كل حد
بصراحه بقت حاجه مقرفه