السبت، 28 أبريل، 2007

عندى كلمتين

عندى كلمتين عاوز اقولهم بخصوص موضوعين
الموضوع الاول بخصوص رئيس الجمهموريه السيد محمد حسنى مبارك
و الموضوع التانى بخصوص التوريث للسيد جمال مبارك

نخش فى اول موضوع
عن السيد حسنى مبارك
اولا مبارك واحد من اهم قاده الحرب اللى كان له الفضل الكبير ( بعد ربنا طبعا ) فى نجاح اول طلعه جويه فى حرب اكتوبر 73 و اللى من خلال الحرب دى قدرنا نستعيد عزتنا و كرامتنا و كمان ارضنا و محدش ينكر الدور اللى كان سلاح الطيران بيلعبه فى تامين الجنود و عبورهم بسلام لاهم مانع الا و هو قناة السويس
ثانيا تولى مبارك حكم مصر
و زى ما انا بقول و فى رائى ان مبارك كان مستلم مصر خربايه لا كان فيها طرق و لا تليفونات و لا كهرباء
مش كده و بس ده حتى كانت العلاقات الدوليه بايظه خالص لا كان فيه علاقات عربيه و لا حتى بعض الدول الاوربيه زى روسيا
و بضل الله و مجهودات مبارك تم استعادت هذه العلاقات مرة اخرى
و مصر بئت عروسه
و بئت شويه حلوه و التليفونات دخلت حتى فى العزب و كمان الكهربا و الطرق و الكبارى كل ده انجازات لا نستطيع ننكرها
بس ع الجانب الاخر فيه مجموعه كبيرة من الاخفاقات
و من اهمها
اولا و قبل كل شىء الفقر و الفقر و الفقر و الفقر
ثانيا الفساد اللى كان فى عهد السادات و ناصر مش زى الان ابدا الان الفساد استفحل و بئت الرشاوى عينى عينك و كمان بتنطلب بالبق ( الفم )
و مش كده و بس دى كمان المحسوبيه انتشرت اوى و كمان وصلت العدوه للدول العربيه ( صدرناها ) يعنى
يعنى زى ما فيه انجازات فيه اخفاقات
و انا عندى بعض الطلبات للسيد مبارك اتمنى انه يخدها فى الحسبان
اولا و قبل كل شىء الاهتمام بالوضع الاقتصادى للبلد و تحسين مستوى الدخل هتقولى ازاى احنا معندناش موادر هقول لك لاء احنا عندنا بس لو قضينا على الفساد و السرقه بتاع الكبار هنكون دوله بموادر
ثانيا نفسى نكون كلنا ادام القانون واحد و نلغى كلمه انت متعرفش انت بتكلم مين ؟
يعنى لو وزير او خفير يكونوا ادام القانون واحد هتقولى ما ده موجود هقول لك ده ع الورق بس
الاقسام بتاع الشرطه مش بتقدر غير على الغلابه بس نفسى بجد نكون زى بريطانيا تونى بلير زيه زى اى واحد امام القانون و فى اقسام الشرطه
اخيرا اللى بتمناه نبطل التعذيب اللى فى اقسام الشرطه و نعامل المواطن باحترام فى القسم
ده بخصوص السيد محمد حسنى مبارك
اما بخصوص جمال مبارك
فانا بقول انه مش وحش و كمان مش كويس احنا لسه مش شفنى منه حاجه رسميه بس بالرغم من كده انا واحد من الناس اللى برفض فكرة التوريث لجمال مبارك لان مصر مش ملكيه مصر جمهوريه يعنى مينفعش انى جمال يجى بالتوريث
هو لو عاوز يجى يجى يالانتخابات ( اللى غالبا ما هتتزور ) و للاسف
انا عاوز تكون الفرص ادام جمال متساويه مع غيره من الشباب و المواطنين
و مش عوزين نعيد تجربه سوريا
اصل لو جمال هو اللى جه كده هيكون هيثم ابن جمال هو اللى هيمسك بعده
و تتحول مصر لملكيه
ع العموم انا ببعت برقيه تهنئه لجمال بمناسبه عقد قرانه اليوم
و شكرا
ملحوظه لو فى اى اخفاقات انا نستها او اننجازات نستها برضه او زدتها ممكن تقولى و تشرفنى بتعليقك

هناك تعليقان (2):

intissar abdulmonaem يقول...

أستاذ محمد
كلام جد باسلوب ساخر مهذب
لي تعقيب بسيط
الدول العربية أوغيرها لم تكن في حاجة لخبراتنا في الواسطة والمحسوبية
فأنا عايشت في دول قريبة أشياء قد نعتقد أنها لا تحدث إلا في المريخ
ولكنهم ليسوا مثلنا في النشر والتجريح بل يخفون ويخفون
ولا ينشرون الا ما يحبون غيرهم أن يعرف

عمر الشرقاوى يقول...

محمد مارو العزيز لقد وحشتنى كلماتك المتوازنه والواقع ان حسنى زى ما له انجازات عظيمه فله اخفاقات اعظم وبعدين هو كان بيدفع حاجه من جيبه ما هو من قوت الشعب يارجل انت بتهنى جمال على زواجه اعتقد عشان تهنى واحد زى ده لابد تكون جزمتك نضيفه
هذا الذى يضع خيره شباب البلد فى السجون ويتزوج