الثلاثاء، ٣ فبراير ٢٠٠٩

بلاغ عاجل لوزير الداخليه ووزير المواصلات و الى كل واحد مهتم

اولا دى رساله اى كل واحد ارجو الاهتمام و نشرها على اد ما تستطيع

النهارده فى قطار السادسه و النصف من محطه المنصوره و المتجه الى مدينه طنطا حصل هذه الحادثه
كان فى سيده تبلغ من العمر ما يقرب من 30 عام راكبه هى و ابنتها القطار و زى اى واحده اتجهت لشباك التذاكر و اشترت التذكره و جلست بجوار الشباك اللى بجوار الباب و تحرك بنا القطار و مرت قريه بعد قريه و هى فى امان الله تلاعب طفلتها و اذ بنا نصل الى محطه ميت خلف فجاه نجد احد الشباب يقف على الرصيف و يقف بجوارها و هى طبعا فى امان الله لان مصر بلد الامن و الامان و مش واخده خوانه و عندما بدا القطار يتحرك اذ بهذا الشاب يخرج مطوه من جيبه و فجاه يضربها فى وشها

هذه السيده اخذها الذهول و مش عرفت تتكلم و لا تصرخ و لا تعمل اى حاجه الا بعد اما القطر كان اتحرك بالفعل فاقت من الصدمه و فضلت تصرخ
اتجهنا اليها وجدناها بتبكى و بتقول هو وشى فيه دم بنبص لاقينا وشها غرقان دم
بنسالها فى ايه ؟
قالت انا اللى عاوزه اعرف فى ايه ؟
هو عمل كده ليه ؟
انا عملت له ايه ؟
بيضربنى ليه ؟
طبعا و هى منهاره و كل شويه تسال عن وشها هل حدث له اى حاجه و احنا بنحاول نهدى فيها
و هى منهاره و عماله تبكى
دى صوره السيده بعد الضربه




دى بقى مجموعه صور للقطر تبين ازاى القطر مفهوش الاختراع اللى اسمه شباك
زمان كانت الشببابيك بتكون مكسره
يعنى كنت ممكن تلاقى حدود الشباك و معاه بواقى من الشباك
خشب مثلا ازاز مكسور اى حاجه ممكن تحمى من اى حاجه
الايام دى مفيش اصلا حاجه اسمها شباك
مفيش حدود للشباك
زى ما هتشوفوا
href="https://blogger.googleusercontent.com/img/b/R29vZ2xl/AVvXsEgzvWLEu3UY5ntULoY_dLUdIZvumNH5WtlBKE_m3o0kW70V5zgAliP4kbOqdiFnu1ESWckBiM7qtzJCzVVFOrEDFVbIx5Kt4PvSZznTQVQdK-y3O0tivGMDcMM9cOtJrJ4JujAjAL7_WNgA/s1600-h/4.jpg">



انا بعتذر عن ردائه الصوره لان فوق كل البلاوى دى القطر كمان مظلم

كل واحد فيكم اكيد مفكر ان القطر ده بتاع الغلابه زى ما بيتقال
متعرفوش انه اغلى من العربيات او المواصلات العاديه
يعنى مثلا على شان اركب ميكروباص من المنصوره لسمنود دى فى الميكروباص ب 75 قرش لكن فى القطر ب جنيه و نص من داخل القطر

المهم
كل واحد هيفكر ان دى حادثه فرديه عاديه عابره
محدش يعرف انها كل يوم بتتكر
على طول الخط من المنصوره لطنطا
و فى محطات معروفه كده زى مثلا قريه ميت خلف دى و ميت الكرما و صفط تراب و شبشير الحصه و غيرها كتير

و اكتر من مره حصل ادامى مواقف زى دى
و طبعا مكنتش بقدر اصور ولان القطر بيكون ظلاااااااااااام
و الناس بتروح تعمل بلاغات و بيرجعوا زى ما راحوا

و لو عاوزين تفاصيل موجوده عندى كتييييييير
اكتر من مره اعتداء على بنات و شباب بالضرب بالمطاوى و الامواس اى سرقه الموبايلات و غيرها
و الملفت للنظر ان العمده عارف العيال دى و عارف انهم بيطلعوا على المحطات اما يقلب الناس او يشربوا مخدارات او يسرقوا فى القطارات او يعملوا زى ما عملوا مع الست دى

تخيل لو الموقف ده لا قدر الله حصل معاك انت او مع اهلك او اختك او والدتك
هتسكت ؟

اتمنى ان كل واحد يبقى ايجابى و يحاول ينشر البوست ده
او ياخده عنده فى مدونته

و اخيرا شعار القطارات
كده كده هتموت لو مش بحادث يبقى اما محروقا ( فى حوادث القطارات المحروقه )
او مقتولا ( ممكن تاخد لك مطوه من حيث لا تدرى و لا تعلم )
او من البرد ( القطرات مفيهاش اصلا حاجه اسمها شبابيك )

يبقى اختار موتك بنفسك



......................................................................................

هناك ٢٧ تعليقًا:

بنت الاسلام يقول...

والله يامارو ديه مأساة

انا برده بصرخ مع الست وبقول

عاوزة اعرف ليه
لييييييه

؟؟

من يوم ماجينا للدنيا وكل شيء بيحصل فيها اظن انه بيكون بسبب

ايه السبب هنا بقي

عيال غاوية شر

؟

واذية

؟

و لا مجنونة وهبلة ؟

شيء يحير

ومأسي القطارات في مصر واضح انها لم تقف

عند حد الحرائق المتكررة اللي بتحصل

فيها


دي قلبت بكوارث بس المرة ديه لو دورنا مين المسئول هنقول ايه؟؟

غير التخلف والفقر والجهل والبطالة؟؟

العيال ديه ايه اللي وصلهم للحالة ديه ايه اللي نمي الشر جواهم اتجاه ناس لا يعرفوهم ولا عمرهم شافوهم؟؟

ده وجه جديد من وجوه الضياع والفساد اللي اصبح منظومة متكاملة بيظهر بيها ابناء شعب مصر

والحل لا اعتقد انه في يد وزير الداخلية

ولكنه يمكن في ايد وزير المالية

ولا وزير القوي العاملة

ولا وزير التربية والتعليم

جايز لو كانوا ربوهم كانوا اتعلموا

ان اذية الناس حرام

هننشر البوست لانه مهم بجد

ولعل صوتنا يوصل

تحياتي

محمد مارو يقول...

بطه

ملحوظه

العيال دى بقت دى شغلتها بتطلع تسرق و تضرب و العمده بتاع البلد عارف بكده

و الناس عرفاهم و الحكومه كمان

بس محدش بيتكلم على شان كده الكل هااااااااايص

ريمان يقول...

ايه ده

والله ما صدقت الا اما وفت لصوره

ايه اللى بيحصل ده

وعشان ايه طيب


هما الشبابدول اتجننوا ولاايه بالظبط


طب ليه بجديعمل كده معاها

وات بتقول انك تعرف حالات تانيه زى دى

لا حو ولا وه لا بالله هو فى ايه يا ناس ؟

مش كفايه القطارات اللى بتتحرق وقطاات مص اصلا كلها مش نافعه فى بصله كمان الاجرام ده

استغر الله العظيم

ريمان يقول...

اسفه على الاخطا الاملائيه بس بجد دمى محرووووق

محمد مارو يقول...

ريمان

انتى دمك محروق و مش شوفتى امال لو كنتى شوفتى الموقف بنفسك؟

غير معرف يقول...

والله الموضوع مأساة انا كنت فى طريقى ممن المحلة الى طنطا وحدث عند محطة شبشير خطف موبايل ومرة ساعة
بوست رائع محتاج للتعميم

غير معرف يقول...

فين الامان يابلد الامان
ولا كفايه علينا طول اللسان
فى الاسلكى وال مش لاسلكى
كله تمام
عدا الانسان
ياسلام

محمد سالم تخاريف حالم

عالم حبيب يقول...

الله المستعان

حاجة توجع القلب

محمد مارو يقول...

فكره

اهلا بكى و اتمنى الاهتمام

محمد مارو يقول...

محمد سالم نورتنى
اتمنى انك كنت تسيب لنك مدونتك

محمد مارو يقول...

عالم حبيب

اتمنى الاهتمام

الازهرى يقول...

انا كمان جربت الموضوع ده
واحنا راكبين القطر تلاقى طوب وزجاج مكسور وحاجات كتير تترمى علينا
وفى حالات كتير
ناس بتنصاب

ربنا يهديهم

Unknown يقول...

لا حول ولا قوة الا بالله
اقول اية رحم الله عمر بن الخطاب
امام العدل

محمد مارو يقول...

الازهرى

يا حبى انا مش عاوز الموضوع يقف عند حد التعليق اتمنى نشر الموضوع لحد ما نقدر نعمل حاجه

Empress appy يقول...

دي مصيبه يا مارو وفين شرطه السكه الحديد لا هكتب عن الموضوع
وانا مش زعلانه منك يا خيبه انا بس مشغوله
وانت شايف الوفيات اللى نازله عليا ربنا يرحمهم جميعا

الميكروباص يقول...

في أحد المرات قرأت شكوى في بريد جريدة الاخبار كان صاحب الشكوى يريد أن يعالج ابنه الصغير من الحروق التي اصابته، أتعرف لماذا اصابته الحروق؟ كان هناك صندوق قمامه مولع فيه نار، واحد معدي في الشارع راح شايل الواد ورماه داخل صندوق الزباله !!!!!

يا سيدي الفاضل احنا عندنا حاجات غريبه بتحصل في الشارع

والحقيقه مش عارف اقولك ايه

محمد مارو يقول...

رحاب
ده اللى متوقه منك و الله

انا قولتن انك فعلا مش هتسكتى

اما عن الوفيات فربنا يرحم الجميع و يصبرك و يصبرنا

محمد مارو يقول...

لورانس العرب
يعنى هنسكت ؟
افرض ده حصل لاى حد من اهلينا ؟
ثم ان الست دى ما هى من اهلنا برضو

ahmed_k يقول...
أزال المؤلف هذا التعليق.
قلم رصاص يقول...

لاحول ولاقوة الا بالله

امال بس عمالين يتكلموا ليل ونهار عن التطوير التطوير التطوير لما صدعونا

وطبعا التطوير المفروض يشمل الامن

لكن مين يفهم ومين ينفذ

شكرا اخي محمد على البوست

الفقيرة إلى الله أم البنات يقول...

إنا لله وإنا اليه راجعون
الواحد بقى بيخاف على أولاده من نزل السلم
ربنا يسترها
ويحفظكم ويرد لينا مصر مرة اخرى من ايد السفاحين واللصوص والمرتشين وتجار المخدرات وتجار البشر

الفقيرة إلى الله أم البنات يقول...

إنا لله وإنا اليه راجعون
الواحد بقى بيخاف على أولاده من نزل السلم
ربنا يسترها
ويحفظكم ويرد لينا مصر مرة اخرى من ايد السفاحين واللصوص والمرتشين وتجار المخدرات وتجار البشر

رابطة مدونون من أجل فلسطين يقول...

نتشرف بدعوة سيادتكم للانضمام لنا

رابطة مدونون من اجل فلسطين

http://bloggersforpalestine.blogspot.com/

مدحت محمد يقول...

اكيد الواد ده كان شارب

ايمان روحي يقول...

حسبي الله ونعم الوكي
جد شي بشع
اللهم احمي احينا واحمي شباب امتنا من الضياع
جزاك الله خير علي الموضوع
بس جد شي بخلي الواحد يبكي
بالتوفيق
تحيــــأتي

entrümpelung wien يقول...

Vielen Dank ... Wo neue Themen?

Räumung Wien يقول...


مدونة مميزة
كل تقدير واحترامى لكم ... :)