الخميس، 28 فبراير، 2008

مبارك هتتحرك امتى ؟ اطفالنا بيموتوا

مبارك سيادتكم هيتحرك امتى ؟
فلسطين متبهدله و غزه محاصره و اهلنا فى غزه بيموتوا
و برده معاليك ساكت
و بتقول ان امن مصر خط احمر لا يمكن لاحد ان يتجاوزه
و اهو الخط اصبح بمبى اهوه
مش احمر
العدوان الاسرائيلى المتواصل على غزه و صل لنا
و برده انت ساكت
واحد يقولى وصل لنا ازاى ؟
اقوله على فترات ليس متباعده اسرائيل
عماله تموت اما فى الجنود المصريين او فى اهل رفح
و برده بتقول ان امن مصر خط احمر
النهارده بئه طفله كانت بتلعب ادام بيتها على الحدود
بين مصر و غزه
القناصه الاسرائيليه موتتها
و برده بتقول امن مصر خط احمر
انا مش عارف هو انا عندى عمى الوان و لا انت اللى عندك عمى الوان
اعتقد انك مش بتشوف اصلا
يا مباااااااااااااااارك
انقذ اطفالنا اهلنا على الحدود
و ياريت تكون عربى و تتحرك من اجل فلسطين اكتر من كده
و افضل وصف للحاله دى ما قاله احمد مطر
قصيده عباس
بيقول فيها
عباس وراء المتراس ،
يقظ منتبه حساس ،
منذ سنين الفتح يلمع سيفه ،
ويلمع شاربه أيضا، منتظرا محتضنا دفه ،
بلع السارق ضفة ،
قلب عباس القرطاس ،
ضرب الأخماس بأسداس ،
(بقيت ضفة)
لملم عباس ذخيرته والمتراس ،
ومضى يصقل سيفه ،
عبر اللص إليه، وحل ببيته ،
(أصبح ضيفه)
قدم عباس له القهوة، ومضى يصقل سيفه ؛
صرخت زوجة عباس: " أبناؤك قتلى، عباس،
ضيفك راودني، عباس ،
قم أنقذني ياعباس" ،
عباس ــ اليقظ الحساس ــ منتبه لم يسمع شيئا ،
(زوجته تغتاب الناس)
صرخت زوجته : "عباس، الضيف سيسرق نعجتنا" ،
قلب عباس القرطاس ، ضرب الأخماس بأسداس ،
أرسل برقية تهديد ،
فلمن تصقل سيفك ياعباس" ؟"
(لوقت الشدة)
.إذا ، اصقل سيفك ياعباس

هناك 26 تعليقًا:

بنت الاسلام يقول...

مش عارفة ااقول حاجة

نو كومنت

CheToS يقول...

اللى انت متعرفوش ان حدود مصر والله اعلم المقصود بيها شرم الشيخ بس انما غير كدا فهو خارج مصر للعلم بشئ أرخص حياه على مستوى سطح الأرض هى حياه الشخص المصرى .... ولا عزاء للسيدات

محمد مارو يقول...

فعلا يا بطه نو كومنت

محمد مارو يقول...

شيتوس
و الله عارف اللى بتقول عليه ده

مـحـمـد مـفـيـد يقول...

ولا حياه لمن تنادي

محمد مارو يقول...

فعلا يا مفيد

only spot يقول...

يا مارو قلوها فى الامثال يا مكبرنا يا مصغرنا
الانسان كلما تقدم فى السن يعود كما بدات دورة حياته طفلا اكثر تمركز وتمحور حول ذاته والغرور يركبه وده بالظبط حالة صاحبنا طبعا المبدا ده مش معمم بس فى حالة صاحبنا واضح جدا النه بيعانى منه
انا كمان حاسه انى اصيبت بعمى الالوان وعدم القدره على التفريق حيث ان الاسود هو لون العدل والابيض هو لون الفساد والشئ الغريبب تلك الايام
خالص تحياتى

حمادة زيدان يقول...

حبيبي
الموضوع فعلاً زاد أوى عن الحد وأصبح رخم أوى .... أنا عرفت بموضوع البنت المصرية اللي ماتت النهاردة ... ربنا يفتح بصيرة الحكومة المصرية وتفتح الحدود ولو لساعات علشان الناس تاكل وتشرب بس ... وربنا معاهم
اخوك
حمادة زيدان

كريم عاطف يقول...

مبارك لو كان عايز يتحرك كان اتحرك من عشرين سنة، مبارك مش مهتم بالناس اللي بتموت في البلد اللي بيحكمها ياترى هيهتم بغزة اللي هو مش بيحكمها؟
التحرك الوحيد المطلوب دلوقتي أنه يتحرك من فوق العرش بتاعه ويغور

ريهام يقول...

اولا سلام عليكم
وثانيا احييك يامارو انك كتبت عن موضوع غزة والحصار واخيرا الطفله المصريه الشهيده اللى قتلت بغير ذنب بس دى مش اخر ولا اول ضحيه للاسرائليين وبتمنى فعلا ان مبارك يعمل حاجه وكفايه كلام عن الخطوط الحمرا والخضرا وكفايه الوان بقى احسن شكلها هترسى على اللون الاسود والغياذو بالله

عموما انا سمعت ان فى استجاوب لوزير الخارجيه فى مجلس الشعب عن الموضوع ده واتمنى يلاقى رد

مدحت محمد يقول...

ناقص يقولو فلسطين هتحتل مصر
كلام هايف
والله
وضحك على الدقون
تحياتى ليك يامارو

appy يقول...

يا نهار ابيض انت بتكلم بجد ده امتى الله يخرب بيتهم بس
طي بوالجيش فين مات فى الحرب والشرطه فين طفله طيب فين الاخوان مقوموش مظاهرات على موت الطفله دى
ولا هى فلسطين بس واحنا ملناش اهميه ولا هما مش مصريين ومهتميين بالفلسطنيين بس

منك لله رفعت الضغط عندى
خلى بقى بتوع المظاهرات يورونا خيبتهم قفلوا عليها ليه ولا اقرع ونوزهى وباب النجار مخلع
منهم لله كلهم بما فيهم اونكل مبارك ده

محمد مارو يقول...

والله يا حماده الواحد زهق

محمد مارو يقول...

كريم مبارك مهتم بنفسه و بالكرسى بتاعه بس

محمد مارو يقول...

و الله يا ريهام لا استجواب هيقدم و لا هياخر و فى الاخر ممكن البنت تطلع هى اللى غلطانه

محمد مارو يقول...

مدحت
مش فاهم تقصد ايه

محمد مارو يقول...

ايوه يا ابى
الكلام ده حصل و لا حياة لمن تنادى

بنوته مصرية يقول...

حسبي الله ونعم الوكيل فيهم

ربنا عليهم

امتي العرب يصحو بقي

تحياتي
رودي

محمد مارو يقول...

يا هلا بالبنوته المصريه على مدونتى
اهلا بكى و نورتى المدونه

و سلميلى على البنوته الصغنتوته

Soooo يقول...

ولد
!!!!!!!!!!!
انت ازاي بتكلم مبارك وتقوللو انت شكلك مابتشوفش اصلا
؟؟؟؟
انت اتجننت؟؟؟
اكيد اتجننت؟؟؟
اه اه اه
بس
لقطتك
انت قصدك علي مبارك
طب مش تقول كده .. انا جات في دماغي مبارك شهر الصوم
-----
حبه جد بقى .. شوف يا مارو .. قبل اي حاجه .. مع احترامي لكل الناس بمختلف معتقداتهم وتفكيراتهم
بدل ما البلد مقلوبه مظاهرات على غزة .. يعملو مظاهرات على الفساد اللي ملى البلد
يعملو مظاهرات على دم البنت المصريه اللي عالحدود واتقتلت غدر برصاص احنا مش عارفين من مين
يعملو مظاهرات على الفلوس اللي اتهربت ولسه بتتهرب بره مصر لغاية مابقينا خلاص بناكل في بعض
يعملو مظاهرات على طوابير العيش اللي بقى بينضرب بيها المثل وبيطلع عليها النكت
يعملو اي حاجه مفيده لبلدهم

انما ابص على بره .. واطرمخ على اللي بيحصل جوا .. ده يبقى اسمه ايه؟؟؟؟؟؟




سلامووووووووووز

walaa يقول...

انت بتكلم مين
واحد بياخد الأوامر بتاعته من امريكا
واسرائيل
والله انت غلطان اللى انت كتبت عنه اصلا
لان الراجل ده عميل لأمريكا وبيقولها علنى
احنا كنا زمان مستعمرين من الاجانب
لكن دلوقتى المصيبه اكتر لان الاستعمار بقه من ولاد البلد
فحسبنا الله ونعم الوكييييل
تحياتى ولاء

عمرو سلامة يقول...

يابنى مبارك ده مش بيحس والله العظيم .. مش عنده اى احساس ... ده عاجز ياعم عن الكلام وعن الفعل وعن اعطاء القرار ... النااااااس بيموتوا والريس بيقول لن نترك اهلنا جوعى ... يفتح المعابر ياعم ... حراااااااام ياريس اللى بتعمله ده .. والله العظيم انت هتتحاسب حساب اليم ... ومسيرك هتموت مش هتعقد كتير .. ونهايتك الظالمه قربت

محمد مارو يقول...

سيدتة العجوز صاب الثلاثين

اهلا بيك يا مان

انت بتقول (
يعملو مظاهرات على دم البنت المصريه اللي عالحدود واتقتلت غدر برصاص احنا مش عارفين من مين )

انا بقولك الرصلص معروف انه من اسرائيل

و انا معاك اننا لازم نعمل مش مظاهرات و بس احنا لازم نتحرك اكتر من المظاهرات


بس برده

من لا يهتم بامر المسلمين فليس منهم

محمد مارو يقول...

ولاء

انتى بتقولى ولاد البلد ؟

هو مبارك من ولاد البلد؟

محمد مارو يقول...

يا عمر انت بتقول نهايته قربت ؟

يابنى انا حاسس ان نهايتنا احنا اللى قربت و ان هو لسه شباب

محمد مارو يقول...

شكرا لكم