الأحد، ١١ نوفمبر ٢٠٠٧

غطينى و صوتى عليه يامه

غطينى و صوتى عليه يامه و ياريت الكل يصوت معاها
ما خلاص الحكومه موتتنا خلاص و هتموتنا اكتر و اكتر
لاء لاء انا مش بتكلم ع المواطن اللى الحكومه عذبته فى العمرانيه و لا مواطن المنصورةو
لا بنت الفيوم اللى الحكومه داستها بالعربيه ادام اهلها
لاء لاء
دول ارتاحوا خلاص و المفروض نشكر الحكومه انها ريحتهم بدرى
انا عوزكم تصوتوا عليه لان الحمكومه المصريه خلاص هتجوعنا اكتر و اكتر و اكتر
من ما نحن جاعنين الان
ازاى يا ولاد ؟
بكل بساطه و بعمليه مش يعملها غير شويه ابلسه و شياطين
و فى اجتماع الشياطين و الابلسه السنوى
اللى بيسموه مؤتمر الحزب الوطنى السنوى
( بالظبط زى الاجتماع اللى عمله ابو لهب للتخلص من رسول الله صلى الله عليه و سلم )
لما اتفقوا و خرجوا بفكره شيطانيه ازاى يتخلصوا من رسول الله و فى نفس الوقت قبيله بنى
هاشم مش تقدر تتكلم و اتفقوا انهم يضربوه ضربه رجل واحد
نفس الفكره بس طبعا لله المثل الاعلى و لرسوله
و لهم هما المثل الاوطى و لحزبهم
الناس دى اتفقت ع الشعب المصرى الجعان الغلبان المعدوم انهم يتخلصوامنه بفكره عبقريه
عن طريق رفع الدعم عن اى شىء ( طبعا ان كان فى دعم اصلا ) و قال ايه هيدوا للناس
فلوس و ده هيكون دعم مادى بدل المعنوى
يا خراااااااااااااااااااااااااااااااااااابهم
يعنى كده يا ولاد ممكن رغيف العيش يوصل لربع جنيه او نصف جنيه و يدولك هما شلن
زياده
هما طبعا اول سنه هيدولك الشلن ده و بعدين هيكبروا دماغهم سنه ورا سنه زى ما عملوا
فى التموين اللى كنا نسمع عنه
او فى البطاله اللى كل يوم بيكبروا دماغهم بيها
اه طبعا الراجل الكبير ماشى بئه و عوزين يلموا فلوس اكتر و اكتر اصله فاكر انه هياخدها
معاه
او فاكر انه ممكن يدخلها بفلوسه او يشترى له حته فردوس كده ع النيل تحفه
يا عم راعى ربنا بئه
الناس غلابه
و الله و الله و الله مش عارفين يشتروا الرغيف ابو شلن
هيشتروا ابو ربع او نصف جنيه
حررررررررررررررررررررام
انا عن نفسى باصص للموضوع ده بصه تشاؤوميه جدا
ربنا يستر بئه
اه بالحق نسيت اسال الابلسه دول
انتم هتوصلوا ازاى الدعم المادى ده للناس ؟
يعنى هتدوا لكل واحد الشلن الزياده ده ازاى ؟
عن طريق التموين ؟
انا مليش بطاقه تموين زى ما كل الناس عارفه
لان زى ما الكل عارف انا بطاقتى التمونيه ع بطاقه الاسره لكن لما اتجوز بعد عمر طويل و اجيب ربع عيل ده ملوش تموين
امال عن طريق الرقم القومى ؟
بجد مش عارف بس تانى ربنا يستر
امتى بئه يارب نخلص من البلد دى ع خير
ادعوا لى اخلص بئه

هناك ٣٩ تعليقًا:

hekaytna يقول...

خليها تغطينا كلنا يا حبي بس مسالة الشلن دي انا موافق عليها لو هيدوني شلن انا مواااااااافق لاني مبعرفش اجيب العيش ده بجد
خالص تحياتي

محمد مارو يقول...

و الله يا علاء يا ريت تيجى بس ع بهدله الطابور
انت بكره هتشوفه فاضى بس مش هتعرف تشترى لانك مش معاك اصلا
يبئه ايه الوضع بئه

ريهام يقول...

والله ليك حق تقول غطينى وصوتى يا اما انا لو اعرف كده وقريت الموضوع من بدرى لازم كنت انضم ليك ونصوت سوى هى الناس ناقصه غولب على رايك ده الدعم ده كان القشايه اللى الناس بتتعلق فيها بدل الغلاء اللى فى السلع ربنا يعين الشعب ده على حكاموا وربنا يستر وميجيش اليوم اللى ناكل فيه ظلط واسمنت ولا ناكل دراع بعض ونبقى من اكلى لحوم البشر
ياريت ترجع اسم مدونتك فش غليلك لانه متهيالى انسب دلوقتى للموضوع اللى كلمتنا عنه بجد الله يطمنك يامارو كان مستخبى فين موضوع الدعم ده عننا مش يمكن يامارو احنا اغنيه ومش محتاجين الدعم بس بندعى الفقر؟؟ هههههههههه شعب لئيم صح؟ واخيرا يلا نصوت يالهوووووووووووووووووووى

عصفور المدينة يقول...

ده المشكلة يا محمد إن أول ما يصرفوا الشلن مثلا المذكور ده حتلاقي كافة التجار رفعوا الأسعار بريزة

أو ممكن يلغوا الشلن قصاده

حسبنا الله ونعم الوكيل

غير معرف يقول...

واد يا ماروا , أنا متغطي وبيصوتوا عليا أصلاً , بص مع أنه الدعم مش موجود أصلاً غير في التموين والعيش , بس هما ولاد ".........." أستغسروا فينا وقالوا ده كتير عليهم .
تعرف يا ماروا أنه مفتى الجمهورية أصدر فتوى أنه الشباب إللي غرقوا في إيطاليا طمعاين ومش شهداء , وكمان فتوة بتقول أنه البنت إللي دهستها عجلات الشرطة منتحرة وليست شهيدة .
يعني ما كفهمش أنه الناس بتموت , دول حتى الشهادة بيبعدوها عنهم
على العموم
حسبي الله ونعم الوكيل
حمادة زيدان

boswsalem يقول...

مارو حبيبى

انا هاجج من البلد دى بكره قبل ما يبيعونى

وان شاء الله اذا ربنا فتح عليا حشترى من الرقيق المصرى على قد ما اقدر

واعتقهم لوجه الله

قول معايا

منهم لله

محمد مارو يقول...

عزيزنى ريهام
انتى خايفه احسن يبجى اليوم اللى ناكل فيه زلط و اسمنت؟
ده احنا فى اليوم ده نكون ملوك يا بنتى انتى تعرفى الاسمنت بكام الان ؟
ده اغلى من جاموسه بحلها
عالعموم ياللهمع بعض
يالهوووووووووووووووووووووووهم

محمد مارو يقول...

عصفور المدينه
مفيش شلن عندنا اصلا
العيل الصغير دلوقتى بيقول هات جنيه
ع شان يشترى لبان

محمد مارو يقول...

حماده
طبعا يا حبيبى لازم المفتى يقول عليهم مش شهداءلان الشباب دىكانت بتحاول تتفلفص من فقر الحكومه لكن بركت الحكومه وصلت لهم و جابتهم الارض
الحكومه عوزه تجوعنا
و احنا بنحاول نعدل من مستوانا ؟
بجد ده حرام
يعنى الحكومه هتتعب ع الفاضى ؟
يالله بئه قول معايه
يالهوووووووووووووووووووووووووووهم

محمد مارو يقول...

حبيبى ثروت بص و سلم
تروح و ترجع لنا بالف مليون سلامه
عقبالى يارب
اما اخلص ع خير من البلد دى
و ليك منى دى لولولولولولولولولوولولولولولولولى
و ليهم منى دى يالهووووووووووووووووووووووووووووهم

حسن مدني يقول...

يا مارو دي نظرة مستقبلية، أنت مش واخد بالك
دي الخطة الشاملة للقضاء على الفقر والبطالة والتدخين وحل أومة المواصلات في نفس واحد،
أولا مافيش حد ح يلاقي ياكل عشان يدخن، ثانيا كل الفقراء والعاطلين ح يموتوا وبكده قضينا على الفقر والبطالة،
ثالثا الناس الفقراء لما يموتوا يفضوا المواصلات
رابعا ودي مش مقصودة بس جت معاههم، المعارضة أغلبها من الفقراء اللي بيعانوا ومع كده مش راضيين يبعتوا بناتهم يشتغلوا جواري في السعودية، مش لو كانوا قبلوا كانوا دلقتي يشتروا الرغيف أبو جنيه ونصف..
شقت ازاي المعاضة مفترية والحكومة عندها بعد نظر

ربنا يتولانا جميعا
تحياتي

ابن رشد يقول...

ياااااااااااااااااااااااااااه يا مارو لسة فاكر الرغيف ابو شلن
دة مات من زمان
ابو ربع و نص هيبقى بجنية
انا كتن هغطيك و اصوت مع امك
بس كدة خلي امك تغطينا احنا الاتنين و تصوت دة اذا مش متنا قبل ما هي تصوت

غير معرف يقول...

للأسف يا مارو ... ماما مش حتعرف تصوت لأنها صوتها اتنبح و اتخرست

سارة يقول...

والله يامارو
هو كان مؤتمر كله خراب

عايزة اقولك كمان ان الكهربا هتزيد
اصل الريس طلب اعادة هيكلة اسعار الكهربا

كمان كل ده كوم والخطة الخبيثة للتوريث كوم

والله يامارو الواحد اتخنق ومش عارف يلاقيها منين فى البلد ده ومع الناس ده

محمد مارو يقول...

بدر الف الف سلامه ع ماما ان شاء الله هما يارب

محمد مارو يقول...

ياخبرابهم يا ساره
هنعمل ايه و لا ايه بس

mohammed alsha3r يقول...

يخرب بيت اسلوبك يامارو

يااااااااااااااما

صووووووووووووتى


على مارو وخلينا نرتاح


يالهووووووووووووووتى

لا اسلوب جيد

ويخرب بيت الحكومه

ويخرب بيت اللى يزعلك يامارو

غير معرف يقول...

يبنى انت بتصدق ان فيه دع م اصلا

كله فى الكالتشى زى ما قال عادل امام

الحلزونه

اه يامه الحزونه

تسلم يا قمر

ربنا يوفقك

ويعدينا كلنا على خير

اخوك نيجــر

غير معرف يقول...

وياريت عاجب يا محمد ...حتي بعد ما نموت يشتمونا ويقولوا طماعين ...!!! مش سيبنا عايشين ولا ميتين ...!!!

غير معرف يقول...

كلام جميل..
طلب صغير ممكن تقولنا على الطريقة لإضافة شريط أخبار الجزيرة نت.
مشكور سلفاً.

فى القلب يقول...

ربنا يطلعنا منها على خير فعلا

و يسترها معنا الواحد معتش عارف هترسى على ايه

بنت الاسلام يقول...

عاوز تخلص من البلد يامحمد طيب ومين هيبقالها بس

عارفة ان كلامك في حرقة كبيرة جدااا واحساس كبير بالظلم لينا كلنا

بس مش الحل انا نخلص منها الحل اننا نخلص البلد منهم

لانها بلد الشرفاء

غير معرف يقول...

بسم الله الرحمن الرحيم
الاخوة والاخوات الاعزاء الافاضل
بكل الحب والود اطرح عليكم فكرة تاسيس
اتحاد المدونين المصريين
واتمنى ان تشرفونا بالزيارة على المدونة المقترحة للاتحاد
وابداء الراى فى
ميثاق الشرف
والائحة التنظيمية
واهداف الاتحاد
ويمكنك كتابة رايك فيما هو موجود وابداء الملاحظات التى تثرى العمل
وللانضمام للاتحاد اكتب طلب الانضمام فى سجل الزوار
العنوان
http://egyptadwin.maktoobblog.com
الى اللقاء وفى انتظار تواصلكم
عن المؤسسون
حسن توفيق
هيثم ابو خليل
عضوا اتحاد المدونين العرب

تفضل بترك طلب العضوية فى سجل الزوار

مدحت محمد يقول...

ههههههههههه
مدونتك تحفة بجد
وجامدة
الصراحة دخلتها بمحض الصدفة بس عجبتنى اوى
تناولك للمواضيع بدم خفيف
يشد اى حد يقرا عندك
ضحكتنى اوى وانت بتقول اجتمعت الحكومة
زى ماكان بيجتمع ابو لهب لقتل الرسول
صدقنى صح
مفيش فرق
خالص تحياتى

صانعة الحرية يقول...

حسبنا الله ونعم الوكيل
والله يا اخ محمد احنا عندنا عيش ابيض
الرغيف بقى تقريبا ب15 قرش
والله قطر الرغيف لا يتعدى 6 او 7 سم
يعنى تكله على مرتين
ان شاء الله هبقى اصوره واحط الصوره فى المدونه

وعلى راى اللى بيقول
هو اللى مجوعنا هو
هو اللى معريينا هو
وحسبنا الله ونعم الوكيل

وكمان لما الحكومه بتزود الموظفين قرش
التجار بيزودوا البضاعه قرشين
وحسبنا الله ونعم الوكيل

البلد بتتهد علينا
شعار الحزن الوثنى للعام المقبل

AMRO .O. ABDELHALIM يقول...

هاى محمد
الادراج جميل ومتميز
انا شايف ان الناس كلها ناوية تجيب بطانية وتتغطى
بعتقد ان الدعم لايمكن هيستمر ، انه بينتاقص اتفق معك والسبب هو طبيعة المسار اللى بيتطور فى ظلوا النظام الاقتصادى
تحياتى

محمد مارو يقول...

شكرا يا شاعر الف شكر و نورت مدونتى

محمد مارو يقول...

نيجر
ربنا يسترها معانا كلنا

محمد مارو يقول...

استاذ هيثم طبعا الكلام لسياده المفتى

محمد مارو يقول...

كاريكاتور العرب حاضر اميلى اهوه maro_tatu@yahoo.com
ع شان اقول لك ع الطرييقه
هى بسيطه جدا مجرد كود هتحطه بس للاسف انا مش هعارف اكتبه فى تعليق

محمد مارو يقول...

فى القبل
يارب ياخويه يارب انا بتمنى

محمد مارو يقول...

فى القبل
يارب ياخويه يارب انا بتمنى

محمد مارو يقول...

بطه
ياريت بس يسيبونا نمشى
البلد مش بلدنا خليهم يجبوا شعب بئه ع مزاجهم
احنا مش عجبنهم

محمد مارو يقول...

دوحه ربنا يخليك انت اللى عسل

محمد مارو يقول...

ولسه يا صانعه الحريه و الله لسه

محمد مارو يقول...

امرو
اهلا بيك فى مدونتى

غير معرف يقول...

هههههههههههه
مفيش حد هايغطيك خليك كده فى البرد لما تنشف ابقى قابلنى لو حد سال عنك احنا بنكتب من غلبنا ومن قرفنا
ولا ايه ياخال

رانيا الجبالي يقول...

الموضوع حلو جدا بس حكاية الدعم دي اصلا مش موجوده حتي ايام ما كان فيه دعم احنا خلاص في ايام الهزيان ياما هتحصل صحوه وبعدها ياما نموت ياما نعيش يا هنفضل في هزيان ونموت من غير صوت معدش فيه لغة حوار بين الناس والحكومه وكمان رغيف العيش دلوقتي بعيد عنك غير ان سعره غلي بتحصل عليه خناقات وفي الاخر لايصلح للاستخدام الادامي وبيبقي من نصيب الطيور ولو اتكلمت يبقي انت الغلطان وفعلا احنا غلطانين هي الحكومه فاضيهلنا دي وراها مسئوليات كتيره واهوالشعب يستحملها منها وعليها

ahmed mefrh يقول...

ديما انتا كده يا عمى مصعبها علينا
ههههههههههه
و بتقولوا على مقالاتى انها قاتمه و ليس فيها امل
امال عيزينا نعمل ايع بس يا عم محمد
و قال ايه عايزينا نجوز و نفتح بيت
ربنا يا اخى يفتح نفوخهم

انا قرا فعلا تقرير عن هذا الموضوع و لو انتا قرات مقال الاستاذ عبد الحليم قنديل النهارده فى الدستور الاسبوعى بيأكد كلامك


اعتقد باننا رايحيحن فى ستين داهيه حبيبى و الناس اهم حاجه ساكته

تحياتى اليك و الى الغطا اللى حتغطى بيه رايك لما تصوت

ابو مفراح