الجمعة، ٢٦ أكتوبر ٢٠٠٧

يا ريت تشارك

اخوانى المدونين والمدونات

السلام عليكم ورحمه الله و بركاته

كتير منا معارض للنظام وبرضه كتير موافق ع النظام

( الاختلاف فى الراى لا يفسد للود قضيه )ا

ع شان كده اتمنى انى اعرف من كل واحد  معارض للنظام هو عاوز ايه من النظام

يعنى تتمنى ايه من  مبارك و الحكومه و الحكومات

و لو موافق عليه عاوز اعرف انت موافق عليه ليه ؟  

ممكن واحد يقول و هى ده حاجه عوزه كلام ما البلد  باينه و فيها كل حاجه اهه

انا عاوز اعرف كل واحد بيفكر ازاى و كل واحد عاوز ايه

احتياجاتى غير احتياجاتك  غير احتياجات ناس كتير

ع شان  كده عاوز اجمع  المطالب   

و طبعا ع شان  محدش يتاثر برأى حد انا هخلى البوست ده التعليقات فيه غير مرئيه الا لما ينتهى الموضوع
ادخل و اكتب مش هتخسر حاجه  

بس   يا ريت تكتب فى الاول  انت موافق  ع النظام و لا معارض له  
(  متخفش امن الدوله مش بيدخل عندى )  خد  راحتك

و يا ريت   تاخد راحتك ع الاخر  و خد وقتك فى التفكير

اتمنى ان  تكون الاراء بدون  تجريح او  اساءة لاى راى

هناك ٢١ تعليقًا:

محمد مارو يقول...

اخوانى الاعزاء اتمنى ان نعلق و يعجبكم الموضوع

سارة يقول...

والله يامارو انا مش طماعة

عايزة ريس منتخب بجد انشالله يطلع مين مش مهم المهم يكون منتخب بجد

وعايزة حكومة بتحترم المواطنين وتحميهم من نفسها قبل اى حد تانى
بمعنى اصح مش يبقى حاميها حراميها

عايزة كمان مساواة وعدل حقيقى وحرية

وسيبنا من الحكومة شوية

عايزة شعب ايجابى وصاحى مش يسيب حقه وكمان يراعى حقوق غيره

هيييييييييييه خلتنى احلم يامارو وفقت عالحقيقة المرة

بوست جامد بستحق التفكير

بنت الاسلام يقول...

اولا انا مش موافقة علي النظام

ثانيا عاوزة ايه من النظام

عاوزاه نظام عادل قيادته قيادة عادلة

نفسي اشوف كل مصري نايم في بيته ومش شايل هم اكل او شرب ليه ولعياله

نفسي اشوف كل شاب وفتاة في البلد بيشتغلوا وبينتجوا وبيغيرول وبيطوروا

نفسي اشوف الشرطة في خدمة الشعب بجد

نفسي احس ان رئيسي انا اول مابيفكر فيه لاني شعبه مش الكرسي والمنصب

نفسي اشوف كل واحد صاحب حق ياخده من غير واسطة ولارشوة

نفسي اشوف كل مريض فقير بيتعالج في مستشفي نظيفة وسرير نظيف مش ملوث

نفسي اشوف كل مسئول همه الاكبر هو مصلحة البلد ديه

لو قعدت اتكلم من هنا لغاية ماموت مش هخلص

لكن حقيقي قلبي محروق قوي علي البلد ديه نفسي اشوفها احسن بلد باحسن قادة باحسن رئيس باحسن نظام

ياتري هشوفها كدة في يوم

اوحتي ولادي او حتي احفادي

ياتري

؟؟؟

تحياتي
بنت الاسلام

hekaytna يقول...

انا لا انا معارض ولا مؤيد انا حالي حال غالبية الشعب معرفش حاجه في اي حاجه ممكن تسميها سلبيه او جهل لكن بجد انا مش عاوز حاجه غير اني الاقي وظيفه كويسه بس اما غير كده مش فارقه معايا لان كله واحد

ريهام يقول...

انا ضد النظام والموضوع هايل على فكرة ومش عارفه العيب فى مين احنا ولا الحكومه اللى صح؟ بس النظام مش الحكومه وبس ده منظومه كامله بتضم الشعب والحكام ولو ليا طلبات معينه من النظام او الحكومه هيكون توفير فرص العمل والحياه الكريمه للناس وكمان الرعايه الصحيه لان الخدمات الطبيه فى بلدنا زفت والحمد لله

ريهام يقول...

انا ضد ومع النظام يعنى مش كل النظام مساوئ وعيوب وكمان النظام مش عباره عن الحكومه والحكام وبس النظام كمان يعنى الشعب هى حلقه والكل بيدور فيها وبيكمل التانى لو ليا طلبات من الحكومه هيكون توفير فرص العمل والحياه الكريمه والعنايه الصحيه اللائقه بالبنى ادمين مش الحيوانات وفى اوضاع كتيره ياريت تتغير زى الرشوة والمحسوبيه بس كل ده مش هيحصل فى يوم وليله بس اتمنى يتحقق

هشام رمضان يقول...

الصراحة اخاف من امن الدولة بس على العموم انا كل مشاكلي في الحياة بسبب صغر سني هي كالآتي : افساد التعليمي و الدراسي من جميع الجهات و النواحي و الزوايا , و الفقر اللي احنا فيه و زاد و غطى ان المكرونة بقت بـ 4 جنيه , و العيش في الفرن بالضرب و الشتيمة او الوسطة و شئ شخصي : المراهقة و سيبك من دي , و انتشار الاغاني و الكلام الفاضي ده و تيجي تقول لواحد حرام يقولك ايه يا عم الشيخ .. و الكلام ده ,, انا عارف ان ده ملوش دعوة بمبارك بس برده كلكم راع و كلكم مسئول عن رعته فهو مسئول عن فساد العقول و تخلفها ,, على فكرة في حاجات كتير مش عاجباني بس يعني اهه ,, و ختاماً : لما ربنا وزع الارزاق محدش عجبوا رزقه الفقير نفسه يبقى غني و الغني يريد الاستزادة و لما ربنا وزع العقول كل واحد عجبوا عقله و فاكر نفسه عبقري .. ! تحياتي

nosha يقول...

والله يا أخويا يا مارو انا من المعارضين بشدة بسبب حال كل الناس وبسبب إنهم مش لاقيين أي حاجة محتاجها أي شعب في العالم وهو الاستقرار والعيشة الكريمة والكرامة والحرية في التعبير عن كل شيء في حياتهم بالطريقة اللي تريحهم بلا مهانة أو زل أو ديكتاتورية سواء داخل الجمهورية أو خارجها في أي دولة في العالم وخاصة الشباب اللي قربوا يموت جواهم كل أمل وكل حلم لحياتهم ومستقبلهم ومفيش قدامهم إلا التفكك والظلام وبس
وكفاية كده بقى لإني لو كتبت هكتب بوست بحاله على رأيي وعلى اللي أنا شايفه من وجهة نظري
موضوعك جميل جداً يا مارو .... وأوعى تكون مرشد ولا مخبر لأمن الدولة وتودي ليهم أرائنا وتحبسنا
سلام يا حبيبي

ابن رشد يقول...

اية يا مارو دة اول واحد يعلق انت ينفع كدة
بص يا سيدي انا مبدئيا معترض على النظام كليا
لانه تأسس و بني على فساد
اما مطالبي اية فانا عايز اكون بني ادم
انسان
عايز حقوقي كانسان
ابقى محترم في بلدي

محمد الجغرافى يقول...

الموضوع ميه ميه يا عك الحج

و أكيد انا غير موافق بالمره على النظام
و غير موافق على مبارك

ربنا ياخده هو و ابنه فى طيارة واحده

انت فعلا صدقت فى حكاية ان كل واحد له احتياجاته الخاصة .

بس الموضوع مش فى الخاص الموضوع دلوقتى على المصلحه العامه .. وبعد كل ده و الناس لسه جبانه
وعندها سلبيه و بتخاف

وبصراحه من كتر الفساد معنتش عارف افرق بين ايه اللى عايز يتغير بسرعه و ايه اللى لازم يتغير حالا

بس الاهم ان كل حاجة هتتغير

غير معرف يقول...

بالكاد أي نظام كما له مميزات فله عيوب لكن دائما ما العيوبتمحو المميزات فليس العيب في رئيس الجمهوريه ذاته لكن إما في قراراته أو حكومته فالنظام دائما مايقع في خطأ تنفيذ القرارات بصورةخاطئه فالعيوب منها ترك البنيه التحتيه والأهتمام بالبنيه الأساسيه مما أدي الي التقصير في كلاهما وأيضا الديموقراطيه التي تؤدي الي الديقتاطوريه في التنفيذ فالديموقراطيه يجب حين تطبيقها ان يكون لها قوانين حدود لقي تقننها وتحافظ عليها ليس كما يحدث الأن فما يحدث في بلدنا العزيزه ليس سوي تطور وتغيير عشوائي وغير مرتب وهذا ما جعلنا نصل إلي ما نحن فيه الأنكما أيضا الإهتما بالبنيه الأساسيه وترك اهم شيئ وهو العنصر البشري مما أدي الي الفساد والإنحلال وتفتت القيم والأخلاق والمبادئ كما أيضا تجاهل التاريخ والوصول إلي مرحلة أصبحنا فيها مجرد عرائس خشبيه تحركها أيد أعلي كما أصبح يؤثر فيها ولا تؤثر هي في أحد كما كان في السابق فالحكومه والنظام يحتاجان الي دم جديد فهي تحتاج الي تنظيف ليس نظيف

Unknown يقول...

اللي أنا عايزه منه

أنه يغور في داهية

حسن مدني يقول...

بداية أنامعارض للنظام..
لعدة أسباب
ولكن أنا سأقفز إلى ما أريده من النظام
أريد نظام يحفظ كرامة الإنسان في مصر وكرامة المصري في الخارج
نظام يحافظ على مصالح وسمعة مصر في العالم
نظام يحترم القانون، ويطبقه بغض النظر عن الأفراد

أريد نظام يكفل للمواطنين، إختيار الحكام ومحاسبتهم وعزلهم إذا اقتضت الضرورة
أريد نظام يفتح فرص العمل والاستثمار والتعليم للمواطنين، وهم سيقدمون التنمية
أريد نظام يحافظ على التوازن الداخلي للمجتمع، سواء التوازن السياسي، أو الاجتماعي أو الاقتصادي
أريد نظام له نظام إبتداء، ثم نظام
متوازن عاقل يتيح للشعب بعد ذلك تحديد المسار الذي يريده ويفضله. فإذا وصلنا إلى هذا النظام، يمكننا أن نطالبه بماهو فوق الحد الأدني الذي ذكرته سابقا
تحياتي

انـتــصار عــبـد الــمـنـعـم يقول...

أريد أن أقول لهم
سيــــبــــونـــــا نعيــــــش
في ســـــلام

سها السباعي يقول...

انا مش عايزة حاجة من حد
انا مقتنعة ان لو كل واحد في موقعه شاف شغلة كويس حسب متطلبات شغله كله هيمشي تمام
لكن احنا بنستخسر ندي وبنقول على قد فلوسهم
ما يعرفش اللي بيقصر في موقعة ان فيه غيره في موقع تاني هيقصر معاه
وانه لما يمد ايده في جيب اخوه اخوه برضه هيمد ايده في جيبه
وان لو كل واحد جمل المتر المربع اللي هو واقف فيه البلد دي هتبقى جنه
لكن الكل بينضف جوه بيته ومش مهم بره
طب ما هو بره ده احنا بنمشي فيه وبنشوفه
يعني كل واحد يبدا بنفسه قبل ما يلوم ويحاكم غيره
لان مافيش في ايدينا غير الكلام
لا يبقى نشتغل احسن ما نتكلم
وبعدين هوا احنا لو قلنا للنظام اللي انا مش عارفة هو مين والا مين بالضبط احنا عايزين كذا وكذا هيديهولنا والا هيعملهولنا
ياعم خلى توكلك على الله
وما حك جلدك مثل ظفرك
فتول انت جميع امرك
واذارحت مكان حكومي تخلص ورقة وتقضي مصلحة وما اتقضتش
حسبن عليهم ولا يهمك
بس لما ترجع انت شغلك ما تعملش زيهم
خليك انت الكبير
ودعونا نعمل في صمت
نحن رجال افعال لا اقوال

Unknown يقول...

اتمنى ان يكون الحساب و الوصول للوظائف بالترقي و ليس بلأقدميه
اتمنى توفير وظائف
اتمنى النظر الى المواطن
اتمنى القضاء على الاحتكار بأنشاء مصانع تنافس المصانع المحتكره و تهدف للربح ايضا و تكون ايراد للحكومه
اتمنى الديمقراطيه
اتمنى ان المرتب يكفي الموظف فلا ينتظر 2 جنيه رشوه

غير معرف يقول...

والله يا واد يا ماروا فكرة حلوة , وهو الواحد يفضفض معاك شوية.
أنا أولاً رافض النظام ومش عاوز أقولك أني بكره , والأسباب يا عمنا هاقولهالك
النظام عندنا أعمي مش بيشوف , يعني الواحد يحبه لية تخيل الواحد بيتخرج وكله أمل أنه يبتدي مستقبله أو يبتدي حتى من الصفر وبعد ما بيتخرج حتى الصفر مش بيلقيه وتلاقي اللي معاه واسطة شغال وزى الفل ,
النظام المصري ما تعرفلوش نظام , آه والله , يعني شوية تلاقية علمانى , وشوية تلاقية إسلامي , وشوية تلاقية اشتراكي , وأخيراً رأسمالي وولا الناس ولا النظام عارفين هما عاوزين إية.
ثالثا النظام المصري لا يهتم بالإنسان المصري وبيعتبر الناس أرخص من أى حاجة تانية في البلد , يعني مفيش أهتمام بالصحة , والأسعار مولعة , والناس مش لاقية تاكل وده كله غير الأمن ومشاكله الكتير.
ومطالبي يا أخي أنهم ينزاحوا عنّا ويرحمونا ويرخصوا الأسعار وويوظفوا الشباب , والقضاء يستقل وما يبقاش خدام , وشيخ الأزهر يبقي فعلاً شيخ للأزهر مش شيخ الريس , ويبقي في حرية بجد للصحافة , والناس تعيش بكرامتها , وخلاص يا عمنا خلصت ومعلش طولت عليك
أخوك
حمادة زيدان

الشريف / جمال طة يقول...

الى كل من يرغب فى التضامن معى التعليق وربط اللنك بمدونته مع تحياتى


لكــــــــــى تعـم الفائــدة على الجميع

مصائب قوم عند قوم فــــــــوائد

http://gamal51.blogspot.com/

خالد حفظي يقول...

شكلك كده ناوي تتجوز بقرار جمهوري

Ahmed Al-Sabbagh يقول...

نظرا لتميز مدونتك تمت أضافتها لدليل الصباغ للمدونات

===============================

شاركنا الشعب الأمريكى أحزانه على ضحاياه فى ذكريات سبتمبر/أيلول الأليمة

لكن دعونا نُذّكر العالم بالجرائم الأمريكية التى أرتكبتها الولايات المتحدة ضد أبرياء وأطفال ومدنين

شارك وأدعم فكرة تخصيص يوم 30 أكتوبر يوما للجرائم الأمريكية


أحمد الصباغ

غير معرف يقول...

عتقد ان وصف من يحكمون بصر بانهم نظام مبالغة. هدول شوية لصوص لا نظام ولا هباب.

تفضلوا بزيارة مدونتي مدونة كاريكاتور العرب:

http://arabcaricature.blogspot.com/

وشكراً

اسمحلي قمت باضافة اللينك بتاعك في مدونتي