صدام كان فى الاول و الدور على البشير

افتتحت الولايات المتحده حربها على العرب و المسلمين و اخدت العراق

و ضحت بصدام ليله عيد الاضحى المبارك (مع انه من الاشهر الحرم اللى لا يجوز فيها الاعدام )و

عنيها كانت على سوريا

بس الظاهر لاقت ان الوقت مش مناسب قالت ناخد السودان

و اتهامتها للسودان و برضو مبارك عربيه

بالرغم من الاستنكار و الوعيد و الشجب و الادانه لقرار اعتقال البشير

الا انه برضو بمباركه عربيه

و هتخلص على السودان و بعدين سوريا و طبعا ايران قبلهم

و برضو ساكتين و بنتفرج

بس عاوز اقول كلمه للحكومه المصريه و السعوديه و الاردنيه

اللى بتقال عنهم معتدلين

عاوز اقولهم و افكرهم بمقوله
اكلت يوم اكل الثور الابيض

ماشى يا عرب ؟

ماشى يا امه المليار
ماشى يا امه العزه و الكرامه

بس الله يرحمهم
طبعا اقصد العزه و الكرامه مش الحكومات

اللى يغيظ فى الموضوع

ان الغرب مش شايفين الا العرب

و جمبا كيان صهيونى مغتصب و محكمه العدل الدوليه نفسها ادانت بناء الجدار الفاصل
و برضو عنيهم على العرب و بس

ما تبصوا مره كده لغزه و شوفوا اهلها و حاكموا شارون و اولمرت و باراك و نتنياهو
حاكموا بوش على اللى عمله فى العراق و افغانستان

قبل ما تحكمونا حاكموا اعداء الاسلام و اعداء الانسانيه

بس فى الاخر اقول معاهم حق فى اللى بيعملوه
اه معاهم حق
طالما احنا ساكتين

لطيفه تبدع فى الكام يوم اللى فاتوا

اصدرت الفنانه لطيفه فى الكام يوم اللى فاتوا البومها الاخير

بعنوان

فى الكام يوم اللى فاتوا

و طبعا كاعادتها تنوعت الاغانى ما بين الرمانسى اوى و الرومانسى اللايت و الحزين و اغنيه بالعود رائعه و ده غير الاغانى السريعه

انا ملاحظ فرق واضح بين البوم لطيفه اللى فيه فن بجد
و بين البوم تامر حسنى اللى فيه اسفاف بجد
مع انى من معجبى تامر جدا
الا ان البومه الاخير سىء جدا
من حبه الافش و لا حبه لاحلى حاجه فيها و تلميحاته البايخه
او الاغنيه الكئيبه المتشائمه

مع لطيفه تسمع و تستمع بجد فى الالبوم الاخير
فى الكام يوم اللى فاتوا


و اخترت اروع

الاغانى بالنسبه لى

و هكتب كلمتها

اولا اغنيه سبنى شويه

توزيع : تميم
ألحان : وليد سعد كلمات : نادر عبد الله

الكلمات بتقول
سبنى شويه لوحدى على شان متضايقه شويه
متقلبش عليه مواجعى و تتعب فيه
ده و انا اد و نفسى اتكلم و اشتكى منك خايفه لا تيجى على جرحى و تزودها عليه
ليه هو انت فاضيلى على شان اجى و احكى معاك ؟
ده انت بتبقى معايه و جمبى و مش لاقياك
و اللى مأثر فيه بجد اننا شيفاك ابعد واحد عنى و اقرب واحد ليه
شايله فى قلبى انا منك بس انا مخبيه
راضيه معاك بقليلى و بستهتر بيه
ليه و ازاى تبقى انت اهم الناس فى حياتى و محسسنى انى مليش اى اهميه ؟

اما عن الابداع الاخر
فهو فى اغنيه كنا زمان اقوى

كلمات : بهاء الدين محمد ألحان : حمدى صديق
توزيع : مدحت خميس

الكلمات بتقول
كنا زمان اقوى كنا فى جراحنا اقوى و عذبنا كان بيمر
ايوه زمنا اتغير دلوقتى جرح صغير يجرحنا طول العمر
كان دمعنا جوانا غالى مكنش صوته حزين و عالى
بقى دمعنا طول الليالى دمع كله اهات و مر

احساسنا زمان كان يتحمل مهما الحياه تقسى علينا
بنعشها برضو و بنكمل و لا دمعه بتبان فى عنينا

اغنيه انا عمرى ما هنساك
الكلمات بتقول
انا عمرى ما هنساك انا ديما فكراك
انا اسمى اللى معاهم و انت كل الباقى معاك

طيب انا هنسى ايه ؟ طيب انا هنسى ليه ؟
من الاول و من الاخر عمرى من قلبى مسمحاك
اطمن و ارتاح مش باقيه على جراح
انا باقيه على حب و عمره ما اتغير و لا راح
مبقولش انى ملاك انا فعلا حباك
و برغم البعد اللى تعبنى انا عايشه مصلحاك

اما بقى اغنيه العود و اللى تريح الاعصاب بجد
اسمها لو سهران حبيبى بتقول
لو سهران حبيبى و على بالك هوايه
يبقى انت الليله دى كده سهران معايه
انا زيك سهرانه حبيبى و بفكر فى هواك
و القمر اللى شايفه انا شيفاه معاك
و حياة اللى بينا و القمر اللى بينا
انا حاسه الليله ده حبيبى ان احنا اتقابلنا

بتفكر فى حالى و بفكر فى حالك الشوق اللى جانى انا عارفه انه جالك
لو حتى قمرنا ليله لو ليله هجرنا
على ضيه و فى خيلنا هنكمل نهارنا

ده غير اغنيه فى الكام يوم اللى فاتوا و غير اغنيه مارينا و غيرها و غيرها
البوست ده اهداء لاخويه و صاحبى و حبيبى
حماده زيدان صاحب مدونه كلام و خلاص اصله عاش لطيفه
لينك مدونته اهوه كلام و خلاص

ألحقونا هنقفل مدوناتنا و نقشر كوسه

قانون «ذبح» الفضائيات .. والـ «فيس بوك»!

بقلم مجدي الجلاد ٩/٧/٢٠٠٨
في أدبيات السياسة والحكم.. يذهب المفكرون إلي التفرقة الواضحة بين الأنظمة السياسية


القائمة علي حكم المؤسسات، وتلك التي تحكم وتدير بـ«عصا» الشمولية والسلطوية..

الأولي تقوم علي احترام المبادئ الديمقراطية وتقدس حرية الرأي والتعبير، وتدافع بقوة عن


تداول السلطة، والثانية تتحصن وراء «فرد حاكم»، وتكبت الحريات، وتستدعي من خزائنها كل

ما من شأنه إسكات الأصوات الإصلاحية، وضخ الدماء في عروق النظام الحاكم بأي ثمن.

وكنت حتي وقت قريب، أعتقد واهماً أن الرحم المصري يحمل جنيناً يريد أن يتشكل..

جنيناً إصلاحياً، حتي لو لم تكتمل قسماته وملامحه،


جنيناً يولد علي كف تيار ليبرالي جديد،

ويرضع شيئاً من الحرية، ويتنفس برئة التعددية،

ويشب يافعاً في أجواء «الديمقراطية»،


مهما كانت ناقصة.

ولكن بدا لي أن حلمي، وحلمك، يتبخر كل يوم،

وينكسر كل ساعة علي صخرة إصرار


النظام الحاكم علي سياسة إدارة البلاد بـ«وصاية الفرد»،


وإرادة حفنة قليلة من الأشخاص

يتحلقون من حوله، ويبتكرون الوسائل الكفيلة بضمان استمرار الوضع «كما هو عليه».

واليوم..

نحن أمام أحدث ابتكار واختراع توصلت إليه الحكومة لإتمام مهمتها في وضع

الشعب المصري داخل «حظيرة الصمت»..


مشروع قانون الجهاز القومي لتنظيم البث


المسموع والمرئي، وهو - لمن لا يعرفه -


البديل الأكثر تشدداً وصرامة لـ«وثيقة تنظيم البث


الفضائي في المنطقة العربية»، والتي حاربت مصر من أجل إقرارها،

وعارضتها دول عربية عديدة،

فآثرت حكومتنا الارتداد إلي الخلف، أو بمعني أدق إلي الداخل،


وصاغت قانوناً مصرياً خالصاً، وفقاً لنظرية «شعبي وأنا حرة فيه»،

وما رفضه العرب في وثيقة،


ستفرضه قسراً وقهراً علي المصريين في قانون.

القانون الذي وضعوا مشروعه المبدئي،

ويستعدون لإقراره في البرلمان مع بدء دورته الجديدة،

هو الأخطر بين ترسانة القوانين والإجراءات المقيدة للحريات العامة،

ويكفي أن نعرف من نصه


أنه ينص علي إنشاء جهاز للرقابة علي مضمون ومحتوي جميع

وسائل البث


«المحطات التليفزيونية والإذاعات ومواقع الإنترنت بما فيها الفيس بوك»،

يرأسه وزير الإعلام، وعضوية ممثلين عن وزارات الداخلية


والخارجية والاتصالات والثقافة والمالية،


وهيئة الأمن القومي،

كما ينص علي التحكم التام في منح التراخيص والتصاريح بالبث وإعادة

البث المسموع والمرئي في مصر لكل أنشطة البث


في النطاق الجغرافي المصري، بما في ذلك

«المناطق المنظمة بتشريعات خاصة»،


وهو ما يعني دخول الفضائيات المرخص لها ضمن

«المنطقة الحرة» في نطاق عمل الجهاز..

والأكثر قسوة

أن القانون ينص علي الرقابة علي المحتوي، ويعاقب بالحبس كل من يدلي

ببيانات أو معلومات تتعلق بنشاط الجهاز..

أي أنه سيمنع وسائل الإعلام من نشر أي أخبار

أو مقالات حول نشاطه، وكأنه «جهاز أمن قومي» لا يجوز الاقتراب منه.

وكأي قانون تريده الحكومة،

سيمر هذا القانون علي «مطبخ» البرلمان، وحتماً سيحصل

علي الموافقة بالإجماع خلال دقائق معدودات،


وسيكون علي المحطات الفضائية والإذاعات

ومواقع الإنترنت بث ٢٤ ساعة يومياً من المسلسلات وأغاني «الفيديو كليب»،


ومسابقات بجوائز لمن يحل هذه الفزورة «يعدي البحر ومايتبلش»


و«قد الكف ويلف العالم لف»،


وسوف نقضي أوقاتنا مع برامج «التوك شو»،

وهي تناقش قضية «الخرس الزوجي» و«كيف تحافظين علي نضارة بشرتك في الصيف»..

أما الإنترنت والفيس بوك، الذي أزعج النظام خلال الأشهر الأخيرة، فسوف يحوله هذا القانون

إلي منتدي لرسائل الحب والغرام، وتبادل أحدث الرنات وأغاني هيفاء وهبي ونانسي عجرم..

خالص تحياتي إلي «حكومتنا الرشيدة»!

--------------------------------

مش قلت لكم


هنقفلها ونقعد فى البيت علشان الحكومة تستريح

فى انتظار اراؤكم لكيفة التصدى لهذا القانون


لابد من العمل معا من اجل الدفاع عن حقوقنا فى حرية التعبير


من خلال مدوناتنا او مواقعنا الالكترونية

منقول عن اتحاد المدونين المصريين اضغط هنا

ايه النفاق ده

عالم التدوين على اد ما هو عالم جميل و ممتاز
و على اد ما عرفنا بناس فى غايه الجمال و الروعه سواء ادبيا او سياسيا او دينيا او حتى اجتماعيا
الا انه زيه زى اى مجال سلاح ذو حدين
و فيه الحلو و الوحش
الحلو انا ذكرته

انما الوحش من وجهة نظرى

هو كميه النفاق اللى فيه
الكل بينافق فى بعضه
قليل اوى لما الاقى حد بيقول كلمه حق

و بلاش ذكر اسامى بدل ما اكون منافق انا كمان

النفاق بيتمثل فى التالى

اولا
تلاقى الواحد او الواحده من دول يدخل المدونه و هاتك يا مدح و ايه الجمال و ايه الروعه دى

زى يا خويه ما يكونوا حفظين كلمتين و بيرددوها فى كل البوستات

مفيش مره واحد يدخل ينقد باحترام بهدف البناء يعنى النقد البناء مش تلائيه خالص انسى يا عمور

ثانيا بقى
التعليقات

يعنى على شان تعلق عندى لازم الاول اعلق عندك او ربما لو علقت عندى لازم ارد ليك الزياره

احيانا كتير بدخل مدونات و مش بلاقى كلام اقوله و خاصه لو كان الموضوع عجبنى على شان كده ممكن ادخل و اخرج بدون ما اعلق

المصيبه بقى
ان تلاقى الاخ او الاخت من دول بيتباهو بكميه الكومنتات

ده يقول ده انا بعدى ال 50 كومنت و اللى يقول انا عديت ال 100 كومنت فى البوست الفلانى بتاعى

ميعرفش انه جاب الكومنتات دى لانه كان فى الاساس داخل كل المدونات دى و هما بيردوا له الزياره

دول انا بسميهم مهوسى التعليقات

و المصيبه الاكبر ان كتير منهم مش بيقرا الموضوع اصلا و بيعلق بناء على التعليق اللى على البوست نفسه
يعنى يقرا تعليقين تلاته و يقول زيهم

على شان كده انا بقول

عذرا يا جماعه

لو هتدخل مدونتى يبقى اهلا بيك
بس عوزك تنقدنى و تقولى اذا كنت غلطت او تصححلى

انما هتدخل تمدح على طول الخط انا مش بحب كده
و كمان لو هتعلق يبقى بليز اقرا الموضوع الاول و بلاش تعلق بناء على التعليقات

انا الحمد لله مش مهووس تعليقات

يكفينى ان واحد بس يدخل يقرا و يناقشنى و نتحاور و نتعلم من بعض افضل من ان الكل يدخل يشكر من غير حتى ما يقرا

تحياتى لكم

الصداقه

هما شابين جمعهما القدر منذ الصغر فى حى واحد و منطقه واحده
هو ادم و صديقه ادهم
ادم كان انسان ملتزم دائما مش شيخ و لكنه بيخاف من ربه و مش بيحب يعمل حاجه غلط
ادهم كان انسان فلاتى شويه و كل يوم مع بنت و ماشى ورا شهوته
و عندما كبرا و دخلا المدرسه جمعهما ايضا فصل واحد لانهما مشتركين فى نفس حروف الاسم تقريبا
و انتقلوا معا من مرحله الى مرحله اخرى و دخلوا معا نفس الكليه و لكن لان ادم دائما شاطر و بيذاكر دخل جامعه القاهره
بينما ادهم دخل جامعه الزقازيق و لكن نفس الكليه

و فى يوم فى امتحان البكالوريوس و ادم رايح يمتحن جاله تليفون ان صديقه ادهم عمل حادثه و بالرغم من انها كانت حادثه بسيطه
الا ان ادهم رفض الذهاب للامتحان
و ذهب للاطمئنان على صديقه و لحسن الحظ انه جه لان ادهم كان بحاجه لنقل دم سريع
و ع الفور تبرع له ادم بدمه فقد اتضحا انهم ايضا مشتركين فى نفس الفصيله

و الاتنين عادوا السنه سويا لم يكن ادم ندمان ابدا انه عاد السنه بسبب صديقه
و تخرجا معا فى العام اللى بعده

و اشتغلوا فى نفس الشركه
و كان بينهم كل حب و تعاون و موده
و الكل بيحسدهم على حبهم لبعض و على صداقتهم لبعض
وظل ادم على التزامه و ادهم على بوظانه و كل يوم مع واحده

و لكن بدا ادم يشعر ان ادهم متغير من نحيته كل واحد منهم اصبح له ادواته الخاصه مع ان الاتنين كاونوا واحد فى كل شىء حتى الملابس كانوا بيلبسوا لبس بعض
و لكن بدا ادم يشعر ان ادهم عاوز حاجته لوحدها و حاجه ادم لوحده
حتى ادم كلم ادهم و قاله مالك انت متغير منى ليه انت زعلان منى ؟
قاله لاء بس انا مرتاح كده

و بالفعل كل واحد اصبح له متعلقاته الخاصه به
و مرت الايام
و فى يوم جه اتصال لادهم ان ادم بين الحياة و الموت و عمل حادث رهيييييييييييب
انتقل ادهم على الفور للمستشفى
الدكتور قاله محتاجين نقل دم فورا و الدم فى المستشفى لا يكفى و فصيلته نادره جدا
الكل عارف ان ادهم الوحيد اللى ممكن ينقذ ادم
واحد صاحبهم قاله يلا يا بطل ادى دمك لادم سدد اللى عليك
ادهم ساكت و رافض يتكلم او يتحرك
الكل بيبصوا له باستغراب اتحرك يا ادهم ادم بيموت و انت بتتفرج
ادهم ساكت و لا هو هنا
الكل بدا يشعر ان ادهم ندل و اللى يسمعه كلام او شتايم و اللى يتف عليه
ام ادم تقوله منك لله ابنى بيموت صديقك بيموت اخوك بيموت انقذه و هو و لا هو هنا

الكل بدا يتحرك و نزلوا الشارع يدوروا على دم لادم من اى حد
دخل ادهم على ادم العنايه المركزه و هو بيبكى و يقول له سامحنى يا صديقى
لا اقدر ان اعطيك دمى
انت كنت من فتره بتقولى انت متغير منى ليه و كنت عاوز تعرف انا فصلت حاجاتى عن حاجاتك ليه
جه الوقت اللى لازم تعرف ان صديقك مصاب بالايدز يارتنى كنت سمعت كلامك و بعدت عن الحرام انا كنت بفصل حاجات عن حاجاتك على شان خايف عليك
و النهارده بيطلبوا منى اديك دمى
تقولهم ايه؟
اقولهم انا دمى هيموته مش هيحيه ؟
اقولهم ان دمى فاسد و ان دمك طاهر
لو اديتك دمى هتعيش بس هتعيش مزلول زى كده خايف احسن حد يعرف ان دمك ملوث و هتعيش منبوذ و بعد كده هتموت و الكل بعيد عنك
و كارهك و خايف منك و يمكن محدش يمشى فى جنازتك او انك تموت رافع راسك الكل بيحبك قولى اعمل ايه و بدا يبكى و يبكى و يبكى هنا نظر له ادم بابتسامه بسيطه و اخذ يده على صدره و رااااااااااااااااااااااااااح للعالم الابدى الخلود

وزير التعليم لك منى كل احترام

بجد انا بحترم قراره جدا
الخاص باعلان رسوب كل الطلاب اللى غشوا فى الامتحانات و عددهم 21 طالب و طالبه
و كمان ملهومش دور تانى

ما هو مينفعش يريحوا طول السنه وواحد تانى عمال يحرق فى اعصابه و فى دمه و يجوا هما يدخلوا كليات القمه

بجد لاول مره بحترمه و برفع له القبعه

و بقوله انا معاك بكل قوتى

معاك فى قرارك هذا

مع انى عارف ان التسريب مسؤليتك
و لازم تتحاسب و الطلاب يتحاسبوا و اللى سربوا الامتحانات يتحسبوا
لان دى قضيه مجتمع باكمله

بس انت بتحاسب اللى عندك و هما الطلبه انت لا قاضى و لا محكمه على شان تحاسب الباقيين

و انت كده عملت موقف ممتاز
اولا
لانى اسمع ان كتير من الطلاب دى ولاد مراكز مرموقه
ثانيا على شان لو بعد كده اتعرض على اى حد منهم الامتحانات يبلغ فورا

عقبال بقى ما نلاقى حد يحاسبك انت كمان
و عقبال القضاء ما يحاسب اللى سربوا

لو بدانا بالطلبه بعد كده هيخافوا
لو حاسبنا المظفين اكيد بعد كده هيخافوا
لو حاسبناك شخصيا اكيد بعد كده هتخاف و تحافظ اكتر على القوانين

عايشين فى مجتمع باااااااااااايظ

اه و ربنا مجتمعنا اقل كلمه نقولها عليه مجتمع بايظ

لا فيه احترام للكبير و لا للصغير و لا لاب و لا لام

امبارح استوقفنى مشهد مهيب بجد

كنت ماشى فى احد شوارع المنصورة

و عند اشاره مرور

عربيه كسرت الاشاره و كانت هتعمل حادثه المهم

العسكرى راجل حوالى 50 سنه او 55 سنه

قام واخد نمره العربيه و بيعمل ليها مخالفه

ببص لاقيت العربيه نزل منها اربع شباب حوالى 20 سنه

و اللى كان سايق قاله انت بتعمل ايه با ابن ال000000

الراجل قاله بعملك مخالفه قام الشاب ده رايح عليه و عاوز يضربه تدخلنا و بعدناه عنه
و قاله انا هعرفك ازاى تاخد نمره عربيه اسيادتك

و زعقنا للواد ده اوى و ركبناه العربيه طبعا بعد اما العسكرى قطع المخالفه و ربنا يستر على العسكرى بقى

.................
مشهد اخر

المستشفى
لى واحد زميلى طبيب امتياز لسه روحت مره النبشطيه اليليه فى مستشفى حكومى فى المحله
و فجاه المستشفى اتملت ناس
واخد صايع جه مخبوط سكينه نافذ
فى ثوانى ببص لاقيت كل الاطباء خلعوا البلاطى البيضه بتاعهم
ووقفوا يتفرجوا
بقوله فى ايه ؟
قالى عندنا تعليمات فى حادثه زى دى نخلع البلاطى على طول لحد ما الدكتور الكبير يجى

بقوله و ليه كده ؟
قالى بننضرب
من الاهالى و من الصيع
و قالى مره الدكتور الكبير بتاعهم بيدى لواحد حقنه بس الواحد ده كان حد مهم الظاهر و القنه تقريبا وجعته قالى نزل عليه بالالم علو وشه
احنا كل يوم بننضرب يابنى

........................
المدرسه
طبعا ده كوم و اللى بيحصل فى المدارس و الجامعات كوم تانى

مشهد اخر
عيال تتهجم على المدرسين و يضربوهم طبعا فاكرين صدام و اللى عمله فى المدرسه بتاعته مش صدام حسبن انا اقصد صدام المصرى اللى ضرب مدرسته

و فى الجامعات الدكاترة بتنضرب

من الطلبه
و ده ليه يا ترى؟

اعتقد ان سواء ضرب عسكرى المرور او الدكتور فى المستشفى او المدرس او دكتور الجامعه ده كله راجع لسبب واحد بس

هو فشل النظام التعليمى فى مصر

لان قالولنا زمان ان الوزاره اسمها التربيه و التعليم
يعنى التربيه قبل التعليم
حاليا شالوا التربيه دى خاااااااااااالص و بقت التعليم بس

و برضو مفيش تعليم

حاليا بيعلوا من شان الطالب اوى لحد اما يفجر
بحجه حريه الابداع
و الكلام ده من سنه 1989
من ساعة المعتوه حسين كامل بهاء الدين ما مسك

و اهتم بالطالب و فضله على المدرس
و من وقتها
لافى تعليم و لا تربيه و لا شوفنا طالب واحد مبدع

بعكس التعليم زمان اللى خرج لنا الشعراوى و زويل و محمود مختار و غيرهم و غيرهم

انا بقول
انا الحريه المطلقه للطالب مش تنفع
الثواب و العقاب فى كل الامور
ده اصلا شرع ربنا اللى هما ميعرفهوش اصلا
ربنا اللى خلق الجنه و النار

يبقى لازم يكون فى ثواب و عقاب
للطالب اللى يغلط يتعاقب ليس بالضرب و انما باى شكل و اللى يقدم شىء كويس نمدحه و نقف معاه

لو كل طالب عرف كده اعتقد ان المجتمع هيتغير لان التعليم فى كل بيت و لان الاهالى مش فاضيه اصلا لتربيه ابنائهم

هو و هى قصة حب

هى / فتاة صغيره جميله و لكنها فقيره
هو / شاب جميل انيق
هى / كل يوم تجلس امام احد المحلات الكبيره لتبيع الذره المشوى
هو / يمر امامها يوميا و هو راجع من كليته
هى / كل امنياتها ان يقف و يتكلم معها و ان يشعر بها
و بمدى حبها له
كل يوم يمر من امامها و هى كل يوم تنظر اليه بشوق و لهفه و لكنه لا يشعر بها مطلقا

فى يوم كان فى قمه اناقته و شياكته و عندما رأته هكذا ظلت تنظر أليه و تنظر اليه بكل شوق و حب و لهفه و اعجاب و تتمنى ان يكلمها و فجاه نظر اليها هو

يا الاهى هل اخذ باله انها تنظر اليها

انه ينظر اليها و يتقدم أليها انه يتقدم أليها
و هى اتكسى وجهها بالحمره و الجخل
تقول لنفسها ماذا اقول له عندما يكلمنى يا ربى ساعدنى
انه مازال يتقدم و هى مازلت مرتبكه و ما
بين الشعور بالفرح و الخجل
كل جسدها يرتعش كلما قرب منها
و فجاه و صل اليها لينظر فى واجه احد المحلات لتعديل ملابسه
و تركها هى مصدومه فى امنيتها
دون ان شعر بها

الإخوان يا خيبتهم ..... المعارضة خدعتهم والحكومة غلبتهم

الإخوان يا خيبتهم ..... المعارضة خدعتهم والحكومة غلبتهم
للمرة الألف ينزلق الإخوان المسلمون بمصر في نفس الحفرة ..

دخلوا المعركة بدون برنامج أو فكر أو أيدولوجية واضحة

وخرجوا منها كعادتهم خالين الوفاض وليس ذلك فحسب بل وبتجديد العداء للنظام وزيادة عدد المعتقلين في صفوفهم .

هوايتهم الركض خلف الخاسر ومعاداة الرابح

. عجبي على هكذا جماعة .

بدأت الحكاية حينما إنتبه رئيس الجمهورية محمد حسني مبارك لحركة كفاية اللولبية الشمهورشية فلم يفوت الفرصة ليضع نفسه في قائمة المصلحين في المزارع العربية - الدول العربية – وعلى حساب المعارضة ظناً منه أنه بحركة إصلاح واحدة سيمحو تاريخة الإستبدادي على مدى ربع قرن من الزمان جلس فيه متربعاً على عرش مصر متسلطاً فيه على رقاب العباد متعمقا ً في الديكتاتورية التي جعلت منه ظالماً وطاغية

. منفرداً بتحديد مصير المصريين إلى أن وصل الحال لما هو عليه الأن من فساد وفقر وبطالة ودمار إجتماعي وإنهيار أخلاقي وجوع وتشرد في بلاد الله ..

مبارك وحده المسؤول الأول والأخير عنه .

حينما إنتبه مبارك لهذه الحركة وهي حركة كفاية ورأى مالها من إنتشار سريع ودعم إعلامي كبير من فضائية الجزيرة

.أدرك على الفور بحسه القمعي الذي إمتزج بخبرة السنين أن هذه الحركة سوف يكون لها بعض الأثر فبادر على الفور بإختراع إصلاحي ألا وهو تعديل المادة 76 من الدستور والمتعلقة بإنتخاب رئيس الجمهورية .. ولم ينسى أن يوصي ترزية الدستور بوضع مجموعة من الشروط لا يمكن أن تتوافر في أي من الثمانين مليون مصري إلا له هو أو ولي عهده الأمين السيد جمال مبارك

.. على الأقل في الوقت الحاضر .. كما أن تلك الإصلاحات وبغض النظر عن الشروط التى وصفتها المعارضة بالتعجيزية من شأنها أن ترفع أسهم مبارك في البيت الأبيض أو البيت الإنجليزي أو أي بيت غير بيوت المصريين

بإعتبار أن ما صار هو خطوة على طريق الإصلاح السياسي بالبلاد

.وتم تعديل المادة تعديلاً رائعاً زاد من إعجابي بذلك الترزي وبطريقة تفصيله الرائعة والتي لم يغفل فيها دراسة مستفيضة لما يسمى بالمعارضة في مصر وطبعاً هذه الدراسة أفضت إلى أن حجم تلك المعارضة ليس له عدد –

وبالتالي ستكون النتيجة الحتمية هي فترة رئاسية جديدة لسيادته . لأنه لا معارضة تذكر بمصر فهم مجموعة هتيفة وخلاص .وكان من الطبيعي أن يتم ذلك العمل على مراحل

.. فالمرحلة الأولى إستفتاء على التعديل الدستوري وتكون نتيجته موافقة ساحقة .

والثانية هي إعادة إنتخاب مبارك من جديد وذلك لأن أقوى منافسيه لن يحصد أكثر من إثنين بالمائة مما سيحصده مبارك وبشرط نزاهة الإنتخابات حتى وإن أشرف كوفي عنان بنفسه على هذه الإنتخابات

. وأعجبني في السيد ترزي الدستور أنه إستثنى قيادي أحزاب المعارضة من تلك الشروط التعجيزية حتى تتم تعريتهم تماماً أمام من صدقهم من الغلابة محدودي المعرفة والمبهورين بالحنجورية والشعارات البراقة.

وما كان من المعارضة إلا محاولة حفظ ماء الوجه بأن يقلبوا الطاولة أو بالأحرى – كرسي في الكلوب وإجري – ويفعلوا مثل الأطفال

.. إما أن يكون اللعب على هواهم أو مش لاعبين

. وعليه أعلنوا مقاطعتهم للإستفتاء وأصدروا بياناً يناشدون فيه أهل المحروسة بأن يقاطعوا ذلك الإستفتاء لأنه إذا جرى الإستفتاء وتمت الموافقة على التعديل سيكونون مطالبين أمام مؤيديهم بدخول المرحلة الثانية وهي الترشح لمنصب الرئاسة والذي هو نتيجته معلومة مسبقاً وهي فوز أل مبارك ليس بالتزوير وإنما بالأغلبية لأن هذا هو الواقع وذلك بسبب فشل تلك الأحزاب في جمع مؤيدين لها لعدم وجود برنامج يجتذب الجماهير أو الإفتقار لوجود شخصية ذات طابع قيادي لها تأثير على الجماهير ..

وظنوا أن الناس ستستمع لكلامهم أو أن الناس تصدقهم من الأصل بل وصدقوا أنهم هم من يتحدث بإسم مصر والمصريين وأنهم أدرى الناس بمصالح الشعب إلخ إلخ إلخ ....ولم يعي الإخوان المسلمون هذا وإنساقوا كعادتهم في طريق ليس لهم به علم وإنضموا لمقاطعة الإستفتاء وتحرك الدم في عروقهم فنظموا المظاهرات وكانت النتيجة معاداة جديدة للنظام بدلاً من أن يبدوا حسن النية وأن يستذكون ولو لمرة واحدة في تاريخهم ويقفون على الحياد كجماعة إصلاحية معتدلة ليثبتوا للناس بأن الدم قد تجدد والفكر تغير بالجماعة وأصبح فيهم من يقرأ الأحداث قراءة متأنية واعية .. بل هرعوا وراء المعارضة الهشه وفتنتهم شعاراتها الكاذبة والأكثر من ذلك أنهم وقعوا في فخ قد تم نصبه لهم بإحكام وهو الإتصال مع الأمريكان بعدما خيل لهم ظنهم بأن أمريكا مستعدة لأن تتعاون معهم لمراعاة مصالحها في المنطقة كأل سعود مثلا و تفقد شخصية مثل شخصية مبارك في المنطقة وفي هذا الوقت بالتحديد والذي هو أحوج ما تكون فيه لوجوده .. وذلك الظن هو نتيجة التعالي والتكبر والغرور التي هي سمات الإخوان المسلمين المميزة .. وما هي النتيجة ؟؟كل الناس تتحدث الأن عن أن الإخوان المسلمون يريدون لمصر ما أراده الجلبي وعلاوي من دمار للعراق من أجل الوصول للسلطة .. الإخوان وضعوا أيديهم في يد امريكا التي تقتل إخواننا بالعراق كل يوم وتدعم قتل إخواننا بفلسطين كل ساعة وأبادت إخواننا في أفغانستان ويتربصون بالمسلمين في إيران وبإخواننا في سوريا من أجل مصلحتهم ومن أجل أن يصلوا للسلطة .هذه هي صورة الإخوان المسلمون الأن .. هذه المرة خسروا كل شيء وبأيديهم لا بيد عمرو .. لماذا ؟؟ لأنهم يفتقدون للفكر الواقعي ويعيشون في غياهب ظلمات أفكارهم منذ سنين .. فهم يتباهون بعدد المعتقلين منهم وبالظلم الذي يتعرضون له .. هم مدمني الشكوى ينتظرون حتى يأكلهم من أمامهم ثم يولولون سنيناً ويقولون لكل من يقابلهم نحن ضحايا ونحن مسالمين ونحن ذوي نوايا حسنة ونحن و نحن ونحن .... ولا يكفون عن الولولة .. مثلما صرح حسن شادي بالخمسينيات أنه قد إتفق مع عبد الناصر أن يعطيهم حكم مصر بعد الثورة ونفي عبد الناصر ذلك الإتفاق وكان رد حسن الهضيبي مرشد الإخوان وقتها رداً يملأه التعالي والتكبر والغرور حيث قال لعبد الناصر – إذن فأحدكما كاذب – إن كان هذا عقل كبيرهم فما بالك بالتابعين ولما سألوا حسن شادي - هل وثقت هذه الإتفاق مع عبد الناصر قال – لا .. إحنا قرينا الفاتحة – أيوجد مثل هذه أفكار ياناس؟؟وماذا عن إخوان اليوم .ألا يوجد في هذه الجماعة من تنبه لعدم تدخل نقابة المحامين أو نقابة الأطباء أو الصيادلة في هذه اللعبة بإسم النقابة وهم من عودنا الإعتصام والتظاهر لأصغر الأحداث بمصر وذلك لأنهم فهموا اللعبة مبكرا ففضلوا عدم المشاركة في هذا المزاد الرخيص . أين حنجورة مصطفى بكري مما يحدث ولماذا لم يلق بنفسه في هذه الحلبة ؟ الجواب .. لأنه قرأ الأحداث جيداً وإستنبط النتائج فقرر عدم اللعب في مباراة ذات نتيجة معلومة مسبقاً؟ حتى الأحزاب التي إتبعتها جماعة الإخوان تعي اللعبة وتقدر نتائجها ولم ينظموا مظاهرة واحدة تحمل إسم أي من أسمائهم بل كلهم لعبوا بإسم حركة كفاية للتغطية وذلك طبعا لما لهم من خبرة في أسلوب الكر والفر مع النظام فهم يدرون ماذا يريدون وماذا يفعلون في كل مرة .. فقط الإخوان المسلمين من أغمض عيناه وسار في الطريق بدعوى الثقافة والفهم والعضلات وبدون أي وعي ولا إستفادة من التجارب السابقة.ألم يفكر ذلك المرشد المغرور المتعالي أبو مليون متظاهر ماذا سيقول عنه الناس هو وجماعته بعد التحالف مع الناصريين الذين علق عليهم الإخوان المسلمين فشلهم لنصف قرن.. وكثيرا ما أدعوا أن التجربة الناصرية كانت قاسية عليهم وان الناصريين هم إخوان الشياطين وأنه لولا جمال عبد الناصر ومن بعده الناصريين لإمتدت جماعة الإخوان المسلمين من مشارق الأرض لمغاربها في نشر الدين الإسلامي .. كيف بعد ذلك كله يتم تحالف بين حدي السيف أهو من أجل المصلحة والوصول للسلطة أم من أجل الدين؟؟بل و كيف تثنى لهم وضع ايديهم في يد الشيوعيين والعلمانيين التجمعيين ؟ أليسوا هؤلاء مرتدين عن الدين وجب قيام الحد علهيم أم أن المصلحة والوصول للسلطة يقتضيان إغفال الدين الأن ؟ بل كيف يتم التعاون مع حركة كفاية ووضع يد الإخوان المسلمين في يد قياديها المسيحيين أمثال جورج إسحق وغيره ؟ أليس هؤلاء المسيحيين كفار ولا بد أن نقاتلهم أو يخرجوا من مصر أو يدفعوا الجزية ؟؟ أليس هذا كلامكم ؟!! أين الدين الأن؟؟ أم أن المصلحة تقتضي تعطيل الدين في هذه المرحلة ؟ كفاكم تحارة بإسم الدين .. كفاكم تجارة بإسم الدين .. كفاكم تجارة بإسم الدين يا جماعة الإخوان المسلمين .. فما أنتم إلا في السلطة الطامعين .أين خطاب الإخوان المسلمين الذي يتماشى مع العصر الحالي ؟ أين مبدأ الإخوان المسلمين الثابت والذي يمكن أن نتخذه مرجعية لهم.. وأين وأين وأين ؟ عجبي على هكذا جماعة !!!وفي الختام أهنىء حسني مبارك على ذكاؤه فيما يلي :- إلتقاط أول خيوط سطوع حركة كفاية.- إختيار ترزية عباقرة لصياغة مواد الدستور .- تعرية قيادي أحزاب المعارضة بمصر بإلقاء الكرة بملعبهم .- وقوع الإخوان المسلمين في الفخ وخروجهم من المولد بلا حمص

هذا المقال منقول من جروب الوطواط الفدائى baheyya@yahoogrou ps.com

و لا يعبر كله عن ارائىو اختلف معه فى بعض النقاط و ان كنت اتفق جدا مع كثير منه و اريد رد من الاخوان عليه

سيدتى ! حذائكى يدل على جمالك ارجوكى اهتمى بيه

ملاحظ حاجه غريبه اوى بين الفتيات و الانسات

كل واحده منهم بيتكون اخر شياكه و عامله شعرها او حجابها على احدث موضه

بس للاسف يجوا للقدم و بيلبسوا اى حاجه فى رجليهم ساعات بتوصل لشبشب عادى و بيسموه سابو

السابو مش وحش طبعا بس بيكون له لبس معين يمشى معاه يعنى مش مع كل الملابس

اخر حاجه حصلتلى و خلتنى اكتب البوست ده

كنت ماشى فى ميدان التحرير من فتره و شوفت بنات كتير فى منتهى الشياكه والاناقه و للاسف تيجى توصل للقدمين تلاقى اسوا ما يكون

على اساس ان محدش بيهتم بالحذاء اصلا و محدش هيبص له

افتكرت ساعتها فيلم مطار الحب بتاع فؤاد المهندس

بصراحه الفيلم بيتناول قضيه مهمه بس الناس فاكره انه بيهرج

كان بيقول حذائكى يدل على انوثه طاغيه

اه و ربنا جمال البنت بيبدأ من حذائه

ا

لان اهتمامك بيه دليل على الاهتمام بكل تفاصيل الاناقه

فيا جميلتى يا سيدتى يا اجمل مخلوقات ربنا ارجوك اهتمى بحذائك فهو دليل الاناقه

ملحوظه

مش عاوز حد يفهمنى غلط بالموضوع ده

و حياتنا مش كلها سياسه لازم برضه نهتم ببعض التفاصيل الصغيره

اخر مهازل الداخليه المصريه و اللى يعيش يا ما يشوف

مش كفايه معيشنا فى دوله بوليسيه
مش كفايه بيعذبوا فى المواطنين
مش كفايه بيموتوا فينا
لاء دول من بجاحتهم و من جبروتهم بيعملوا كده و يزعلوا لو واحد مننا قال اه او اتالم من التعذيب
اخر المهازل
فى صحفيه شابه اسمها شيماء جمعه و الاخ علاء القهموجى بيشتغلوا فى جريده الدستور و كمان كل من الاخ كمال حافظ و محمد الحنفى من جريده الكرامه كان وصلهم خبر ان فى ظابط اسمه محمود ابو المكارم
فى المنصوره عذب مواطن و رماه من الدور التانى
الصحفيه دى ومعاها الاخوه راحوا و عملوا حوار مع اهل المواطن و سجلوه على الام بى ثرى
و بعدين نشروا
الظابط لما عرف كده طبعا خاف احسن يحصله زى ما حصل مع الظابط اللى عذب عماد الكبير
راح لاهل المواطن
و قالهم و اكيد هددهم انهم يسحبوا كلامهم
و بالفعل الاهل قالوا احنا مش قولنا كده بالرغم ان التسجيلات موجوده
المهم الاخت شيماء الظابط رافع عليها قضيه قذف و سب و لها جلسه يوم 25 /5
بالزمه ده اسمه كلام ؟

يا مواطنين يا مدونين يا بشر
هنسكت لحد امتى ؟
شوفتم الحكومه الديمقراطيه بتعمل ايه ؟

شعار الداخليه

من حقى اعذبك و لو اتكلمت هحبسك
تحياتى لكم
و عيشوا فى مصر الموكوسه

خدوا الزياده مش عوزنها

زودوا المرتبات 30% الشعب الغلبان و المطحون فرح ياعينى

يا شعب متفرحش اوى كده

اهو زود المحروقات 40% ابسط ياعم

رساله لمبارك بقى

يا مبارك فى مصرنا الحبيبه

ناس مرتبها 300 جنيه و ناس تانيه مرتبها 3000 جنيه

اللى بياخد 300 جنيه زاد ووصل مرتبه الى 390 جنيه

و اللى بياخد 3000 جنيه و صل مرتبه الى 3300 يعنى زاد 300 جنيه يعنى مرتب واحد من الغلابه

يعنى برده هما اللى كسبانين برده

و فى الاخر ترجع و تقول عاوز موارد للبلد

يا مبارك اللى تعبانين الناس الغلابه اللى بياخدوا 100 و 200 و 300 جنيه

لكن اصحابك ووزرائك و رجالك و الحاشيه بتاعك مش تعبانين فى حاجه

بدل ما تبحث عن موارد

اولا بطلوا سرقه فى البلد

ثانيا ممكن اوى تخلى الزياده دى للى مرتبهم تحت ال 500 جنيه و اللى فوق ال 500 يكون لهم نسبه تانيه و اللى فوق ال 1000 نسبه تالته و هكذا

على شان نقرب الشعب من بعضه

و نقلل الهوه الكبيره اوى دى

من الاخر يا عم

مش عاوزين الزياده بتاعك دى خدها و سبنا فى حالنا مدام احنا اللى بننضر و الكبار اللى بيستفيدوا

ملحوظه

انا كنت كاتب موضوع بقول هو اضراب 4/5 ده ليه؟

بجد مكنتش فاهم

كنت بقول لنفسى الريس زود اهوه يبقى نعمل اضراب ليه؟

الان بقول احنا ساكتين لييييييييييييييه؟

كمان عاوز اقول حاجه

يا مبارك مش كل الشعب موظفين انت ناسى ان العوطليه بالكوم ؟

انت ناسى ان كتير مننا على باب الله ؟

هيجيب منين بقى ؟ اللى ملوش اى دخل و المواصلات زادت اهه

سؤال :هو اضراب 4/5 ده ليييييييه ؟

بجد ان مش عارف و متحير اوى و عاوز حد يفهمنى

انا عاوز افهم هو الاضراب اللى جاى ليه ؟

مش مطالبنا زياده الاسعار و القضاء على الغلاء ؟

الراجل اهو كتر خيره و ربنا يعمر بيته و يوسع خزاينه اهو اتكرم علينا و زود المرتبات 30% انا عارف انهم مش كفايه
بس اهو زى ما بيقول امكانياتنا
مش كده و بس ده المفروض الزياده تكون من اول 7 قال لاء الزياده من الشهر ده

كمان جهاز حمايه المستهلك بيحذر التجار من غلاء الاسعار مع زياده المرتبات و قال هيكون فى عقوبات رادعه
فبجد مش فاهم

بس ياريت دعاة المؤامرات اللى هيقولوا دى لعبه و كلام فاضى يحسسنى ان الحكومه عاوزه تموتنا مش عاوزه تريحنا
بلاش من ده انا عاوز كلام موضوعى و كلام يقنع

وانا مستعد للاقتناع

محدش يفهم انى حولت وطنى او حاجه انا بس عاوز افهم الهدف ايه بعد الزيادات دى

جماعه الاخوان الملسمون و الله مكسوف لكم سلف

وصلنى اليوم خبر يهلك من الضحك

الخبر بيقول ان جماعه الاخوان المسلمين هيشاركوا فى اضراب 4/5

خير االلهم اجعله خير

هو ظهر منسق للاضراب ده ولا ظهر له تنظيم ولا ظهر اجنده ولا حد اعلن مسؤليته عن الاضراب ده و لا على شان المحاكمات العسكريه انتهت ؟

اه هو كده

لحد الان لم يظهر لا تنظيم و لا اجنده واضحه و لا حد اعلن مسؤليته و لا اى حاجه خالص نفس الموقف اللى فات

اللى اتغير بس هو المحاكمات العسكريه

ايوه

المحاكمات اتحكم فيها خلاص و انا زعلت جدا على شان الظلم اللى وقع عليهم

كمان زعلت اوى من موقف الاخوان ده

بصراحه و بكل وضوح بدات احس انهم مش بيعملوا لمصلحه الشعب

بدات اشعر انهم كل همهم مصلحتهم الشخصيه

وااااااااااااااااااااااااااااااا اسلااااااااااااااااااااااااااااااااااااااماه

فين رجالك يا دين الاسلام اللى بيقولوا للاعور انت اعور فى عينه

فين اللى همهم دينهم ووطنهم مش السلطه

فين اللى بينفذوا كلام و حديث رسول الله صلى الله عليه و سلم و هو بيقول

كلمه حق فى وجه حاكم ظالم جهاد فى سبيل الله

صدق رسول الله صلى الله عليه و سلم

واااااااااااااااااحسرتاه

على صدمتى فى جماعه زى الجماعه دى

يا رب افضل احبهم زى ما انا بحبهم و صورتهم مش تهتز امامى

اللى يضحك بقى

اصحابنا و اخوانا اللى كانوا بيدافعوا اوى و بشده على قرار الجماعه بعدم المشاركه

بالرغم انهم كانوا بينقلوا رسايل الاوف لاين بينهم و بين بعضهم و بيقولوا و بيدعوا للاضراب لحد القرار ما طلع

و الله مكسوف لهم سلف

اللى يموت من الضحك هما هما هيدافعوا برده عن المشاركه

اللى هيقولك ان الاضراب هيكون فى البيوت

و اللى هيقولك مش اعتصام و اللى و اللى و اللى

هو حنا كنا عاوزين ايه اكتر من الجلوس فى البيوت ؟

هو احنا دعونا للتخريب و التكسير و لا اى حاجه ؟

الاضراب اللى فات كان بيقول خليك فى بيتك

اشمعنى الان يا اخوان

على العموم و الله انا مكسوف لكم سلف

انا بفش غلى معاكم و بس حد عاوز يفش غله ؟

الظاهر هرجع اسم المدونه كلام و فش غليل تانى

قمه الاهمال ديما فى مصر ! رساله لوزير المواصلات

ديما الاهمال ملوش الا بلد واحد و هى مصرنا الحبيبه

هدخل فى الموضوع مباشره

و انتم احكموا

يوم الجمعه الموافق 25 / 4 / 2008

فى محطه قطار طلخا ( المنصورة )

حصل حاجه غريبه جدا

فى قطار بيتحرك من طلخا و بيتجه الى طنطا الساعه 10 مساءا بالتمام

طبعا كلنا الركاب عارفين الميعاد

روحنا قبلها بفتره طويله

انتظرنا شباك التذاكر يفتح مفتحش

انا كنت منتظر من الساعه 9 و نصف وواقف ادام الشباك منتظر البيه الموظف يتكرم و يجى يفتح

ناس كتير كانوا واقفين منتظرين الموظف و كل شويه ميعاد القطار يقرب و يقرب و البيه مش هنا

لحد ما القطر وصل طلخا و البيه برده مجاش

انا وقفت على الرصيف و قولت للناس ياجماعه هنركب القطر و محدش يدفع اى غرامه احنا مش ذنبا حاجه

الناس طبعا كانوا متضايقين جدا بسبب الموقف ده

و ركبوا القطر و عملوا 100 مشكله مع الكمسرى

و هو مصمم على غرامه و هما رافضين

طبعا فى كتير دفعوا الغرامه و سكتوا و فى لاء

انا طبعا واحد من اللى مدفعوش

المشكله مش فى الغرامه المشكله فى الاهمال

الجدير بالذكر ان المفروض شباك التذاكر لا يغلق طوال ال 24 ساعه

و الجدير بالذكر برده ان البيه بيته فى طلخا كان بيتعشى مع اولاده

و الجدير بالذكر برده انى عملت مره مشكله فى نفس المحطه

لانى روحت مره اخد تذكره و القطار واقف على الرصيف البيه الموظف قالى اسف القطر على الرصيف

مش ينفع ابيع تذاكر دى تعليمات

طبعا مش سكت و عملت مشكله و برده ركبت القطر و مش دفعت و لا مليم

دى شويه صور للموقف

بس يا خساره المكان كان ضلمه اوى

و كمان كان نفسى اصور المشاكل اللى فى القطر

بس برده القطر كان ضلمه جدا

الناس واقفه متجمهره

صوره حاولت ابين فيها اسم المحطه بس الدنيا كانت ضلمه



الناس هنا واقفه متغااااااااااااااااااااااااظه

نظام ظاااااااااااااااااالم

نظام ظااااااااااااااااااااااااالم

ظاااااااااااااااااااااااااااااااالم ظااااااااااااااااااااااااااااااااااااااااااااااااالم

صرخه من كل كيانى

صرخه الم لانى اشعر بكل اهالى المسجونين فى المحاكمات العسكريه

طبعا لازم اقول انا بقول نظام ظااااااااااااااااالم ليه

اليوم تم الحكم فى قضيه الاخوان المسلمين المحالين للمحاكمات العسكريه

و ايضا الحكم فى قضيه هانى سرور المتهم بتلويث دم المواطنين باكياس الدم الفاسده و موت البعض

طبعا الحبس و السجن و العداوه للاخوان ليه ؟ لانهم عاوزين خير للبلد دى

و الحب و الحنيه و الحريه و كل الرعايه لسرور ليه ؟

لانه عاوز يفسد و يموت الشعب

هى دى مصر يا عبله

هى دم مصر يا مصريين

هو ده النظام

النظام اللى امر بسجن خيرت الشاطر 7 سنوات

و اطلاق حريه هانى سرور

مش هانى بس

و ممدوح اسماعيل اللى موت 1000 مصرى فى لمح البصر

و كمان اطلاق سراح وزير المواصلات اللى تسبب فى احراق قطار باكمله ليله عيد

و اطلاق سراح وزير الثقافه اللى بسبب تم حرق دار ثقافه باكمله

فى مصر على شان بابا مبارك يحبك و ماما سوزان تجيب لك حاجات حلوه كتييييييييييييييير

اعمل حاجه واحده او خلى هدفك واحد

موت على اد ما تقدر من المصريين

احرقهم

غرقهم

اقتلهم

لوث دمهم

غيبهم عن الوعى بالمخدرات

طبعا كل ده عن طريق انضمامك للحزب الوطنى اعمل اللى انت عوزه فى الشعب ده و لا حد يقدر يكلمك

لكن لو اتهبلت و فكرت فى خير للمصرين و مصلحتهم

مفيش غير المحاكمات العسكريه

انا قولت و انت اختار

و اخر كلمه عاوز اقول

انا نفسى اصرخ نفسى اعيط بسبب الحكم الظالم ده بالرغم انى لست اخوان

بس بكره الظلم و الاستبداد

لا حول ولا قوه الا بالله

ملحوظه

انا فى حداد على الحكم ده و مدونتى من الان باللون الاسود

حداد لحد ما اقدر اروق تانى

ادعوا لى و ادعوا لاهالى المعتقلين ربنا يصبرهم

سؤال للاخوان

سؤؤؤؤؤؤؤؤؤال بيلح عليه لاحبائى فى الله الاخوان المسلمون

سمعنا طبعا عن رفض الامن استخدام اى شعارات على اسس دينيه و ده فى اشاره واضحه و صريحه للاخوان المسلمين

و مش كده و بس ده تقريبا فى نص فى الدستور عن كده

طيب الاخوان المسلمين شعارهم الاسلام هو الحل

طيب و الحل ؟

هتعملوا ايه فى الوضع الجديد ده؟

هل ستضربون عرض الحائط عن نص القانون ؟

و يحصل صدام مع الامن ؟

ام ستتخلون عن شعاركم الاسلام هو الحل و هيكون التغير هو الحل او الاصلاح هو الحل او الائتلاف هو الحل ؟

او مااااااااذا ستفعلون ؟

طبعا مش عاوز واحد مخه صغير يفهم انى ضد الشعار ده

انا من المتمسكين بيه و عاوزه بس بما انى مسلم من حقى اعرف الجماعه ناويه على ايه

و ده مش سر عسكرى و لا حاجه من حقنا كلنا نعرف الاجابه و شكرا

المحله الكبرى من مدينه صناعيه لثكنه عسكريه

تحولت مدينه المحله الكبرى من مدينه صناعيه و اهر مدينه لصناعه الغزل و النسيج فى مصر كلها لثكنه عسكريه

فقبل اضراب 6 مايو كانت السمه الاساسيه لمدينتى مدينه المحله الكبرى هى التجاره و الصناعه و البيع و الشراء و طبعا الصناعه

و خاصه صناعه الغزل و النسيج و كل المنسوجات القطنيه

لو كنت تمشى فى الشوارع كنت تلاقى حركه البيع و الشراء و العمال بملابسهم المعتاده و منظرهم البأس و فى ايدهم كيس الاكل اللى فيه وجبه بسيطه

تساعدهم على تحمل التمانى ساعات داخل الشركه اللى بنسميها الورديه

اما الان و بعد اضراب 6 مايو لا تجد فى الشوارع لا بيع و لا شراء فقط تجد رجال الامن المركزى

بملابسهم السوداء و اعدادهم الكثيفه و معداداتهم و الشوم و العصيان

بالاضافه الى رجال الشرطه

مدينه المحله الكبرى بها يومين للبيع و الشراء هما يومى التلات و الجمعه

و اللى بنسميهم سوق الجمعه و سوق التلات

بينى و بينكم كنا الاول بنكره اليومين دول

بسبب الزحام الشديد

حيث يتى للمحله ناس من كل انحاء مصر للشراء من منتجاتنا لان لها جوده عاليه و اسعار رخيصه

اليوم هو الجمعه و المفروض يكون زحمه

سوق الجمعه اليوم فاااااااااااااااااااااااااااااااااااااااااااااااااضى

على غير العاده طبعا

اليوم تجمدت حركه البيع و الشراء

يا ترى مين المستفيد من كل هذا ؟

مدينه المحله الكبرى ولعت فى يوم الاضراب و الحكومه تطلق الرصاص الحى

لبت مدينه المحله الكبرى الدعوه للاضراب و الاعتصام

فمنذ الصباح لا ترى احد من المواطنين فى الشوارع و اغلقت المحلات ابوابها بناء على الاضراب او ربما خوف

و لو كنت تمشى فى المدينه حتى الساعه الثانيه ظهرا لاترى اى مواطن سوى عربات الامن المركزى و فقط

و نحكى القصه بالتفصيل
انا مواطن من المحله الكبرى و كنت عايش لحظه بلحظه الاضراب و الاعتصام و اقدر افسر لكم ليه حصل كده
سياده الباشا عمرو اديب اللى بيقول ناس من بره المحله و ناس دخيله و مش عارف ايه
بصراحه كلام فارغ
و مفيش لا ناس من بره و لا حاجه
كله من اهل المدينه
بس ليه حصل كده؟
اولا شعب المحله شعب مسالم جدا
بس زى ما بيقولوا اتقى شر الحليم اذا غضب
فعلا دى ابسط مقوله ممكن تقال عليهم
و كمان الحكومه مستفزه جدا
و بسبب ده و بسبب استفزاز الحكومه تقدر نفس ايه اللى حصل
تعالوا معايه نتابع اليوم من الساعه 7 لحد الساعه 9 مساء و نشوف مراحله
من الساعه 7 لحد الساعه 5 عصرا تواجد مكثف مكثف لقوات الامن فى كل مكان
مش كده و بس ده بلطجيه الحكومه لو شافوك واقف ممكن يضربوك و يمشوك
و ده حصل معايه شخصيا
كنت واقف الساعه 10 الصبح امام مقر الحزب الوطنى و كنت بحاول اصور التواجد الامنى بس فى الخفاء
لاقيت بلطجى اقصد مخبر
لاء مش مخبر دول 4 مخبرين
جولى انت واقف هنا ليه
قولت الله هو مش ده شارع و من حقى اقف فيه ؟
قالى لاء ده مقر الحزب قولت له طيب ده برده موقف عربيات سرفيس و عاوز اركب اعمل ايه اجرى ورا الميكروباص ؟
و اتعور على شان خاطر سياده الحزب بتاعكم
قالى احنا نقلنا الموقف ادام امشى يلا طبعا بصوت عالى
قولت له طيب
قالى امشى يلا
بس اخوكم رخم
كان فى واحد بيبيع جرايد جمبنا قمت واقف ادمه و فضلت اعمل انى بشترى الجورنال
و مش مشيت الا بمزاجى
المهم
طول الفتره دى و الناس بجد مخنوقه و حاسه انهم فى سجن
لو مشيت عند الشون متعرفش تمشى من الامن
الناس مخنوووووووووووووووووووووووقه
و بيقولوا لبعض
هانت الشركه هتطلع اهه
طبعا انتم عارفين ان عمال الشركه 30000 مواطن
على شان كده الناس مستنياهم يعملوا المظاهره و يخلصونا من الامن ده
المهم
الشركه بتخرج 3 ونصف بالظبط
و خرجت الشركه و روحوا العمال فى بيوتهم
لحد الساعه 4 و نصف تقريبا
الامن لسه خانق على الناس
اسيبكم مع مجموعه صور للى حصل النهارده فى مدينه المحله الكبرى

اولا صور لقوات الامن

تشوفهم و هما واقفين تقول ايه اسود استنى لاخر الليل

الصور بتاعهم و هما اسود

شويه شباب قالوا لازم نعمل حاجه الشركه روحت و سابونا
قاموا مولعين فى البنزينه
و بكل جبروت الحكومه و بكل قوه و استعراض العضلات و الامكانيات
البلد كلها اتحولت لثكنه عكسريه بجد
متعرفش الامن جه منين
و عمال يضرب فى الكل
الشعب هاج و ثار
و كل واحد كان بيجرى فى كل مكان لحد ما اتجمعوا مع بعض
و هنا بدوا فى ضرب الطوب
و الحكومه بدل ما تحتوى الامر طلعت الامن كله
و من المعروف ان فك المظاهرات بيتم على مراحل يعنى الاول يخرج القوات و بعدين الميه و بعدين الغازات المسيله
و بعدين الدفاع المدنى يظهر و بعدين الجيش لو انقلاب
المهم
دول على طول ضربوا غازات على الناس
الناس هاجت اكتر
و من الخنقه طول النهار بجانب الاحساس بالظلم
اعتبروا نفسهم فى حرب مع الحكومه

حرب بمعنى الكلمه
و الله حرب الناس كانوا بيتصرفوا كانهم فى حرب مثلا
صلوا صلاه الحرب فى الشارع كان نفسى اصورها بس الموبايل كان فاصل شحن للاسف
و الحومه و هما بيصلوا ترب برده
و كمان الناس
كانوا بينظموا نفسهم
شويه يجوا من هنا و شويه يروحوا هنا
و شويه فوق الكوبرى على شان نحاصر الامن من كل مكان
كان تنظيم عفوى من الناس
مش حد كبير و لا حد من بره المحله
دى كانت افكار بتطلع فجاه
و الحكومه عماله تصعد
جابوا المدرعات و بدا ارصاص الحى
مش كده و بس من كتر الجبروت بتاع الحكومه
قسم اول مركز شرطه
طلع الناس المحبوسه تحرى بالسيوف اه سيوف و الله سيوف
اسلحه بيضاء
و هاتك يا ضرب فى الشعب بالسيوف و اخد اخد له سيف على دماغه و دماغه اتفتح و الحكومه تطلق الرصاص الحى

ودى صور الحرب

اولا صور الشعب الغاضب

قامت الحكومه رده باقنابل المسيله للدموع و الرصاص المطاط

و الصور اهه

و طبعا الناس مش سكت قاموا للاسف مولعين فى البلد يا معلم
و الصور اهه

مش كده و بس الناس من مدى حبها لمبارك و لحزبه حافظوا اوى على ممتلكات حزبه

طبعا تعرفوا ان انتخابات المحليات على الابواب و اليافطات القماش ماليه البلد

شوف يا مبارك الناس بتحب حزبك ازاى

اتفرج و اتمتع

بعد كل العنف ده الاسود اللى كانوا فى الاول خافوا و جريوا و انسحبو

الصور توضح و هما بيجروا زى القطط ههههههه

بعد كده بدات تعيد الانتشار من جديد

و بينسحبوا

اما عن الاصابات تعالوا شوفوا

يعنى يا عمرو يا اديب محدش جه من بره
دول كانوا شباب فى العشرينيات
و 18 و 15 سنه
و كلهم من سكان المحله
باين من لبسهم اللى طالع بالترنج و اللى لابس شبشب و اللى لابس جلابيه
حتى اللهجه
كل ده بيدل على انهم محلاويه
و محلاويه صرف
الناس كانت مخنوووووووووووووووووووووووووووووووووووقه اوى
و مصدقوا يتنفسوا
و يفشوا غليلهم
اما اللى بيقول فى سرقات
الناس اللى دخلت المدرسه كانوا بيكسروا فى الكمبيوترت مش بيخدوها و يمشوا يا عمرو باشا
يعنى الامن بتصرفاته الهمجيه هى السبب و الدليل كده
ان الناس فى البيوت كانت بتحدف طوف و ميه و زباله من البيوت على قوات الامن
بس للاسف
البلد باظت
و انا مش مع اللى حصل خاااااااااااااااااااااااااااااااالص
سواء من الشعب او من الحكومه
و كنت واقف اقول للشباب بلاش الممتاكات العامه بلا تكسروها
والله و الله و الله كانوا بيسكتوا
بس العدد كان كبيبر اوى و استفزاز الحكومه اكبر
كنت اسكت ناس ناس تعمل
للاسف قله وعى من الشعب
بس برده الناس كانت مخنوقه
من الامن و استفزاز اكبر من الامن
و انتهت الحرب بانسحاب قوات الامن زى ما انا مصور
و انتهت بزغاريط الحريم

للاسف ده كان حاجه تزعل

رغيف العيش اهم من المحليات يا فضيله المرشد العام

طبعا لا اخفى مدى حزنى لموقف جماعه من اشد الجماعات حبا الى قلبى

و هو موقف جماعه الاخوان المسلمين من الاضراب و من الاعتصام

و احب اقول يا سياده و يا فضيله المرشد العام اعتقد ان القرار ده بسبب انشغالكم فى المحليات و لولا المحليات

لكنتم معنا لحظه بلحظه

زى ما كنتم مع عمال غزل المحله فى اضرابهم و زى ما كنتم مع موظفى الضرائب العقاريه

بس احب اقول برده

احنا لسنا فى دوله ديمقراطيه على شان تنشغلوا بالسياسه عن حياة الناس

و معروف ان نتيجه الانتخابات لصالح الحزب الوطنى

و مش معنى كده انى بقول نياس او حاجه لا قدر الله

سيروا على خطاكم

و كملوا دوركم لكن بعد اما نجيب لقمه العيش

و بقول لفضيله المرشد

رغيف العيش اهم من المحليات

و مش عارف فوضى ايه اللى تقصدوها

مع ان الرسول صلى الله عليه و سلم قال

كلمه حق فى وجه حاكم ظالم جهاد فى سبيل الله

صدق رسول الله صلى الله عليه و سلم

كلمه الحق دى احنا بننادى الكل يقولها مع بعضه

ازاى جماعه بتتكلم بالاسلام و مش بتقول كلمه الحق دى ؟

اعتقد انه قد خالفكم كثير من الصواب للاسف بالقرار ده

حكومه جبانه مبتجيش الا بالعين الحمرا

بعد ما اثبتت الحكومه المصريه فشلها على كل المستويات

السياسيه

و الامنيه

و التعليميه

و الصحيه

كله كله فاشل

النهارده قدموا اثبات جديد انهم مبيخفوش الا من العين الحمرا

و ده كان ظاهر مع انتفاضه عمال غزل المحله او موظفى الضرائب العقاريه

لكن النهارده قدموا الدليل و البرهان

كلنا طبعا سمعنا عن انتفاضه الشعب بتاع يوم 6/4

و اللى الكل هدد فيها بالعصيان و الاعتصام نتيجه ارتفاع الاسعار

الحكومه الجبانه

الفاشله عملت ايه؟

نزلوا النهارده ناس من بتوع التسعيره اللى مكناش بنسمع عنهم من زمان نزلوهم فى الشوارع

لاجبار التجار على تخفيض الاسعار

و الجديد

النهارده ازازه الزيت ب 9 جنيه بدل 11 ونصف

كيلو الرز ب 2 بدل من 3ونص

كيلو الطماطم ب 2 بدل من 5 جنيه

بالرغم من التطور ده الا انه مش كافى

عاوزين كمان و كمان و كمان

يعنى لازم لازم لازم نعمل اللى متفقين عليه ان شاء الله

و دى دعوه للاضراب و التمسك بيه و ليس العكس
بلا خوف و بلا تردد
لان

الحكومه اثبتت ان ده افضل اسلوب للتعامل مع امثالهم

و الله انا بقول الكلام ده بناء على اسعار مدينتى مش عارف عندكم ايه الاخبار