السبت، ٢٦ أبريل ٢٠٠٨

قمه الاهمال ديما فى مصر ! رساله لوزير المواصلات

ديما الاهمال ملوش الا بلد واحد و هى مصرنا الحبيبه
هدخل فى الموضوع مباشره
و انتم احكموا
يوم الجمعه الموافق 25 / 4 / 2008
فى محطه قطار طلخا ( المنصورة )
حصل حاجه غريبه جدا
فى قطار بيتحرك من طلخا و بيتجه الى طنطا الساعه 10 مساءا بالتمام
طبعا كلنا الركاب عارفين الميعاد
روحنا قبلها بفتره طويله
انتظرنا شباك التذاكر يفتح مفتحش
انا كنت منتظر من الساعه 9 و نصف وواقف ادام الشباك منتظر البيه الموظف يتكرم و يجى يفتح
ناس كتير كانوا واقفين منتظرين الموظف و كل شويه ميعاد القطار يقرب و يقرب و البيه مش هنا
لحد ما القطر وصل طلخا و البيه برده مجاش
انا وقفت على الرصيف و قولت للناس ياجماعه هنركب القطر و محدش يدفع اى غرامه احنا مش ذنبا حاجه
الناس طبعا كانوا متضايقين جدا بسبب الموقف ده
و ركبوا القطر و عملوا 100 مشكله مع الكمسرى
و هو مصمم على غرامه و هما رافضين
طبعا فى كتير دفعوا الغرامه و سكتوا و فى لاء
انا طبعا واحد من اللى مدفعوش
المشكله مش فى الغرامه المشكله فى الاهمال
الجدير بالذكر ان المفروض شباك التذاكر لا يغلق طوال ال 24 ساعه
و الجدير بالذكر برده ان البيه بيته فى طلخا كان بيتعشى مع اولاده
و الجدير بالذكر برده انى عملت مره مشكله فى نفس المحطه
لانى روحت مره اخد تذكره و القطار واقف على الرصيف البيه الموظف قالى اسف القطر على الرصيف
مش ينفع ابيع تذاكر دى تعليمات
طبعا مش سكت و عملت مشكله و برده ركبت القطر و مش دفعت و لا مليم
دى شويه صور للموقف
بس يا خساره المكان كان ضلمه اوى
و كمان كان نفسى اصور المشاكل اللى فى القطر
بس برده القطر كان ضلمه جدا
الناس واقفه متجمهره


صوره حاولت ابين فيها اسم المحطه بس الدنيا كانت ضلمه



الناس هنا واقفه متغااااااااااااااااااااااااظه


هناك ١١ تعليقًا:

ميرا ( وومن ) يقول...

اهمال مآسي ظلم سرقة نهب
يبقي انت اكيد اكيد في مصر
لا تعليق

Unknown يقول...

من المنصورة للمنيا
انا بسافر كل يوم اربعاء الساعة خمسة الفجر بجى احجز من الليل يقولى قبل القطر بساعة وطبعا استحالة بتلاقى اى موظف فى المحطة الساعة خمسة الفجر يحجزلك يعنى مش عندك بس يا مارو دى مصر كلها
علشان المساواة بين المحافظات
ولا ايه

تحياتى

ابراهيم يقول...

اعتقد ان هذة اغلب الصورة الموجودة في مصر لكن الجميع لاييد ان يصدق ويحاول ان يجمل في الصورة
ادعوك لزياة مدونتي واتمني التواصل الدائم بيننا

المنسى يقول...

هههههههههههه
عملوها معاك باحلو
أًلها بتحصل معايا بس مش بالظبط أوى يعنى
وفى حاجات أكتر من كده
أنت مقريتش البوست بتاعى بتاع ومازال المصرى صابرا
إقراه يامارو
تحياتى

Tamer Nabil Moussa يقول...

الاهمال هو الاهمال

لامبرر لة ولاعذر

وعارف لو كان بياع التذاكر شوفتة

وحد عاتبة على التاخير

ولا فى فى الدماغ

وممكن يطلعك غلطان

تحياتى

حمادة زيدان يقول...

مارو حبيبي
هاحكيلك موقف صغير كان المفروض اعملوا بوست لوحده
المهم كنت راجع الصعيد وكنت حاجز تانية مكيف وكان المفروض هايطلع من رمسيس الساعة 9 يعني يجي الجيزة عالساعة 9 وربع ... المهم روحت انا وصاحبي المحطة عالساعة 9 علشان ده قطر مكيف يعني محترم وهيجي في معاده ... المهم روحنا استنينا ربع ساعة مجاش , نص ساعة معبرناش , ساعة ولا هو هنا , وبعد ساعة ونص بالتمام والكمال جه القطر , ولما سألت الكومساري ليه القطر اتأحر رد عليا وقال
مكنواش لقيين جرار يا بيه
خلص الموقف
وهي دي مصر يا قلبي

rtrcbh يقول...

ههههههههههه
هفش غلى وأقول ايه بس
أجمل ما فى الامر موقفكم بعدم دفع الغرامه مهما حدث
ربنا يوفقك ومدونه جميله وننتظر منك المزيد
وجزاكم الله خيرا والسلام عليكم

موناليزا يقول...

احييك على موقفك فى عدم دفع الغرامة
وسؤالى هنا فى موقف ذى ده العيب برضه على البلد ولا اللى فيها

mostafa rayan يقول...

البلد كلها بقت كدة بقي شيء يخنق

طلاب من أجل مصر يقول...

اخي الكريم دية مش اول مره
دية بتحصل كتيييير جدا
والناس خلاص عايزه تمشي الامور وخلاص
ربنا يكون في العون
وبكره الفجر هيطلع
بعد الليل مفيش غير النهار
ارق تحياتي
س ا ر ه

Tamer Nabil Moussa يقول...

السلام عليكم

ازيك ياصاحبى

اخبارك اية

فى انتظار جديدك


تحياتى